2003-2004 (PDF)

ᓄᓇᕗᒻᒥ ᒪᓕᒐᓕᐅᕐᕕᒃ

ᐊᕐᕌᒍᑕᒫᖅᓯᐅᑏᑦ ᐅᓂᒃᑳᑦ
ᐊᐃᕐᕆᓕ 1, 2003-ᒥᑦ ᒫᔾᔨ 31, 2004-ᒧᑦ

ᕌᐳᑦ ᔅᑖᓐᐱᐅᕆ, P.C., Q.C.
ᐃᒻᒥᒧᑦ ᐊᒡᕕᐊᕈᑎᖃᖅᑕᐃᓕᒪᓂᕐᒧᑦ ᑲᒥᓴᓇ

ᒪᐃ 31, 2004

ᔫᐱ ᓄᑕᕋᕐᒧᑦ, ᒪᓕᒐᓕᐅᖅᑎ

ᐅᖃᖅᑎ,

ᓄᓇᕗᑦ ᒪᓕᒐᓕᐅᕐᕕᐊᓄᑦ,

ᐃᖃᓗᐃᑦ, ᓄᓇᕗᑦ

ᐅᖃᖅᑏ:

ᒪᓕᒃᖢᒍ ᓈᓴᐅᑎᓕᒃ 57 ᐃᓗᐃᑦᑑᑦᑎᐊᕐᓂᕐᒧᑦ ᐱᖁᔭᕐᔪᐊᖅ, ᖁᕕᐊᓱᒃᑐᖓ ᑐᓐᓂᖅᑯᑎᖃᕈᓐᓇᕋᒪ ᐊᕐᕌᒍᑕᒫᖅᓯᐅᑏᑦ ᐅᓂᒃᑳᖏᓐᓂᒃ ᓄᓇᕗᑦ ᒪᓕᒐᓕᐅᕐᕕᐊᓄᑦ, ᐱᒋᐊᕐᕕᖃᖅᑐᑦ ᑮᓇᐅᔭᓕᕆᓐᓇᐅᑉ ᐊᕐᕌᒍᖓᓐᓂ ᐊᐃᕐᕆᓕ 1, 2003-ᒥᑦ ᒫᔾᔨ 31, 2004-ᒧᑦ.

ᐃᓚᓐᓈᑦ,

ᕌᐳᑦ ᔅᑖᓐᐱᐅᕆ

ᖃᕆᓴᐅᔭᒃᑯᑦ ᑐᕌᕈᑖ: rstanbury@assembly.nu.ca

607 Edgewater Cr., Burlington, ON L7T 3L8

ᐊᑭᖃᓐᖏᑦᑐᖅ ᓄᓇᕗᒻᒥᐅᓄᑦ: 1-888-398-2785

ᓱᒃᑲᔪᒃᑰᕈᑖ/ᐅᖄᓚᐅᑖ: 1-905-637-6576

www.integritycom.nu.ca

ᐊᕐᕌᒍᑕᒫᖅᓯᐅᑏᑦ ᐅᓂᒃᑳᑦ 2003-2004
ᐃᒻᒥᒧᑦ ᐊᒡᕕᐊᕈᑎᖃᖅᑕᐃᓕᒪᑎᑦᑎᓂᕐᒧᑦ ᑲᒥᓴᓇ

ᐊᕐᕌᒍᒧᑦ ᐊᑐᖅᑐᑦ

ᐅᑯᐊ ᐊᕐᕌᒍᑕᒫᖅᓯᐅᑏᑦ ᐅᓂᒃᑳᑦ, ᑕᓪᓕᒪᒋᓕᖅᑕᕋ, ᐅᓂᒃᑲᐅᓯᖃᖅᑐᑦ ᐱᕙᓪᓕᐊᓯᒪᓂᑯᓂᒃ ᐊᐃᕐᕆᓕ 1, 2003-ᒥᑦ ᒫᔾᔨ 31, 2004-ᒧᑦ. ᑕᒪᓐᓇ ᐊᕐᕌᒍᑦ ᐃᓱᓕᕝᕕᐅᔪᖅ ᐊᒻᒪᓗ ᐱᒋᐊᕐᕕᐅᓪᓗᓂ -- ᐃᓱᓕᕝᕕᐅᓚᐅᖅᖢᓂ ᓄᓇᕗᒻᒥ ᓯᕗᓪᓕᖅᐹᑦ ᒪᓕᒐᓕᐅᖅᑎᖏᑦ ᐊᒻᒪᓗ ᐱᒋᐊᕈᑕᐅᓪᓗᓂ ᑐᒡᓕᐊᓂ ᒪᓕᒐᓕᐅᖅᑎᓄᑦ. ᑕᒪᓐᓇ ᐊᕐᕌᒍᑦ ᐊᓯᔾᔨᕐᓂᐅᓚᐅᕐᒥᔪᖅ, ᒪᓕᒐᓕᐅᖅᑏᑦ ᓇᑉᐸᓪᓗᐊᖏᑦ ᐃᓕᒃᑲᓐᓂᖅᖢᑎᒃ, ᐊᒻᒪᓗ ᑕᐃᒃᑯᐊ ᐃᓇᖏᖅᑕᐅᔪᑦ ᓂᕈᐊᖅᑎᓐᖑᖅᖢᑎᒃ ᖃᐅᔨᒪᓂᖅᓴᐅᓕᖅᖢᑎᒡᓗ ᒐᕙᒪᒃᑯᑦ ᖃᓄᖅ ᐊᐅᓚᓂᖃᕐᒪᖔᖏᑦ ᐊᒻᒪᓗ ᖃᓄᐃᑦᑐᓂᒃ ᐊᒃᓱᕈᕐᓇᖅᑐᓄᑦ ᑎᑭᑕᐅᓯᒪᖕᒪᖔᖏᑦ.
ᐱᖁᔭᕐᔪᐊᖅ

ᓄᓇᕗᒻᒥ ᓯᕗᓪᓕᖅᐹᑦ ᒪᓕᒐᓕᐅᖅᑏᑦ ᓯᕗᓪᓕᐅᔾᔨᓯᒪᓪᓚᕆᓚᐅᖅᑐᑦ ᑐᓐᖓᕕᓕᐅᑦᑎᐊᕈᒪᓪᓗᑎᒃ ᒐᕙᒪᒃᑯᒥᖕᓂᒃ. ᑎᓕᔭᐅᓚᐅᖅᑐᖓ, ᓯᕗᓪᓕᖅᐹᖑᓪᓗᖓ ᐃᒻᒥᒧᑦ ᐊᒡᕕᐊᕈᑎᖃᖅᑕᐃᓕᒪᑎᑦᑎᓂᕐᒧᑦ ᑲᒥᓴᓇᐅᓪᓗᖓ, ᖃᐅᔨᓴᐃᖁᔭᐅᓪᓗᓂ ᒐᕙᒪᖃᕐᕖᑦ ᐊᓯᕗᑦ ᖃᓄᐃᑦᑐᓂᒃ ᐃᒻᒥᒧᑦ ᐊᒡᕕᐊᕈᑎᖃᖅᑕᐃᓕᒪᑎᑦᑎᓂᕐᒧᑦ ᐱᖁᔭᖃᕐᒪᖔᖏᓐᓂᒃ ᐊᒻᒪᓗ ᐊᑐᓕᖁᔭᓕᐅᖁᔭᐅᓪᓗᖓ ᓄᓇᕗᒻᒥ ᓴᓇᐅᒐᕐᒥᒃ ᐱᖁᔭᖅᑖᕋᔭᕐᓂᑦᑎᓐᓄᑦ, ᐱᖁᔭᕐᔪᐊᖅ ᐊᑎᓚᐅᖅᓯᒪᒐᑦᑎᒍᑦ ᓄᓇᑦᓯᐊᕐᒥ ᐊᕗᑎᒐᑦᑕ. ᐅᓂᒃᑳᓕᐊᒃᑲ, ᐃᓗᐃᑦᑑᑦᑎᐊᕐᓂᕐᒧᑦ ᐱᖅᑯᓯᖅ, ᓴᖅᑭᓚᐅᖅᓯᒪᔪᖅ ᐃᓗᐃᑦᑑᑦᑎᐊᕐᓂᕐᒧᑦ ᐱᖁᔭᕐᔪᐊᖅᑎᒍᑦ, 7-ᒋᔭᐅᓪᓗᓂ ᓄᓇᕗᒻᒥ ᐱᖁᔭᕐᔪᐊᖅᑖᓵᕆᔭᐅᓚᐅᖅᑐᓂᑦ, ᐊᑐᓕᕆᐊᓚᐅᖅᓯᒪᓪᓗᓂᓗ ᔪᓚᐃ 1, 2001-ᒥᑦ. ᒪᓕᒐᓕᐅᕐᕕᖕᒥ ᓯᕗᓪᓕᖅᐹᑦ ᒪᓕᒐᓕᐅᖅᑏᑦ ᐊᖏᓚᐅᖅᓯᒪᔪᑦ ᐃᒻᒥᓂᒃ ᐊᒻᒪᓗ ᑭᖑᕚᖏᑦ ᓯᕗᓪᓕᐅᔾᔨᖃᑦᑕᕐᓂᐊᕈᒪᓪᓗᑎᒃ ᑕᖅᑲᒃᑯᓂᖓ ᐃᒻᒥᓂᒃ ᐃᓱᒋᖅᑳᓐᖏᓪᓗᑎᒃ, ᐊᒻᒪᓗ ᐋᖅᑭᒃᓯᓚᐅᖅᖢᑎᒃ ᑐᓐᖓᕕᒋᔭᐅᓂᐊᖅᑐᓂᒃ ᐊᒻᒪᓗ ᓵᑕᒃᓴᐅᔪᓐᓇᕐᓂᕐᒥᖕᓂᒃ ᒪᓕᓐᖏᑦᑑᓂᐊᓐᖏᒻᒪᑕ ᑖᒃᑯᓂᖓ ᐱᖁᔭᕐᔪᐊᕐᓂᒃ.

ᐃᓗᐃᑦᑑᑦᑎᐊᕐᓂᕐᒧᑦ ᐱᖁᔭᕐᔪᐊᑉ ᑐᓐᖓᕕᖓᑦ ᒪᑐᐃᖓᑦᑎᐊᕐᓂᐊᕈᒪᓂᖅ, ᑕᒪᓐᓇᓗ ᐊᑐᖅᑕᐅᓗᓂ ᓂᕈᐊᖅᑏᑦ ᒪᓕᒐᓕᐅᖅᑎᒃᓴᒥᖕᓂᒃ ᓂᕈᐊᖅᖠᖃᑦᑕᕐᓂᐊᕈᓐᓇᖅᖢᑎᒃ ᖃᓄᐃᑦᑐᑐᐃᓐᓇᕐᓂᒃ, ᐊᒻᒪᓗ ᑐᓐᖓᕕᖏᑦ ᑕᖅᑲᐅᖓ ᖃᐅᔨᒪᔭᐅᑦᑎᐊᕐᓗᑎᒃ ᐃᒻᒥᒨᖓᔪᑦ. ᒪᓕᒐᓕᐅᕐᕕᖕᒥ ᒪᓕᒐᓕᐅᖅᑏᑦ ᐊᕐᕌᒍᑕᒫᖅ ᖃᐅᔨᒃᑲᐃᖃᑦᑕᕆᐊᖃᖅᑐᑦ ᓇᑭᑦ ᑮᓇᐅᔭᖅᑖᖅᐸᓪᓕᐊᒪᖔᕐᒥᖕᓂᒃ ᐊᒻᒪᓗ ᖃᑕᓐᖑᑎᖏᑦᑕ ᐱᖁᑎᖏᑦ ᑮᓴᐅᔭᓕᐊᖏᓪᓗ ᓇᑭᓐᖔᕐᒪᖔᖏᑦ. ᐃᖅᑲᓇᐃᔮᒥᓂᒃ ᐱᓕᕆᐊᖃᖅᑎᓪᓗᒋᑦ, ᓇᓗᓇᐃᖅᓯᖃᑦᑕᕆᐊᓖᑦ ᖃᓄᐃᑦᑐᑐᐃᓐᓇᕐᒥᒃ ᐃᒻᒥᒧᑦ ᐊᒡᕕᐊᕈᑎᖃᕐᒪᖔᕐᒥᖕᓂᒃ ᐊᒻᒪᓗ ᑲᑎᒪᖃᑕᐅᔭᕆᐊᖃᓐᖏᖢᑎᒃ ᐃᓱᒪᓕᐅᖅᑐᖃᕐᓂᐊᖅᑎᓪᓗᒍᓘᓐᓃᑦ ᐃᒻᒥᒧᑦ ᐊᒡᕕᐊᕈᑎᖃᕐᓂᐊᕈᒥᓇᖅᑐᖅᑕᖃᑐᐊᖅᐸᑦ ᑕᐃᒪᐃᓐᓂᐊᕋᓱᒋᒍᑎᒡᓘᓐᓃᑦ. ᒪᓕᒐᓕᐅᖅᑏᑦ ᖃᑕᓐᖑᑎᖏᓪᓗ ᑐᓐᓂᖅᑯᓯᐊᓂᒃ ᐱᔪᓐᓇᓐᖏᓚᑦ ᑎᑎᕋᕐᕕᖏᓐᓄᑦ ᐊᒃᑐᐃᓂᖃᕐᓂᐊᑐᐊᖅᐸᑦ, ᐊᒻᒪᓗ ᑕᒪᓐᓇ ᐊᑐᓐᖏᑦᑑᔪᓐᓇᕐᓂᖓ ᒪᓕᒐᖃᐅᖅᑐᖅ ᑭᓯᐊᓂ ᐊᑐᖅᑕᐅᓗᓂᐅᒧᓐᓇᖅᑐᖅ, ᐊᒻᒪᓗ ᓇᓗᓇᐃᕆᐊᖃᖅᖢᓂᔾᔪᒃ.

ᐱᖁᔭᕐᓂᒃ ᒪᓕᖕᓂᐊᕐᓂᖏᑦ ᒪᓕᒃᖢᒋᑦ, ᒪᓕᒐᓕᐅᖅᑏᑦ ᐊᑕᐅᓯᐊᕐᓗᒍ ᐃᒻᒥᒧᑦ ᐊᒡᕕᐊᕈᑎᖃᖅᑕᐃᓕᒪᑎᑦᑎᓂᕐᒧᑦ ᑲᒥᓴᓇᒥᒃ ᑲᑎᒪᖃᑎᖃᕈᓐᓇᖅᑐᑦ, ᐊᒻᒪᓗ ᑖᓐᓇ ᑲᒥᓴᓇ ᖃᖓᑐᐃᓐᓇᑦᑎᐊᖅ ᑲᑎᒪᖃᑎᒋᔭᐅᔪᓐᓇᖅᖢᓂ ᐊᒻᒪᓗ ᐃᓐᓇᐃᑦ ᐅᖃᖃᑎᒋᔪᓐᓇᖅᖢᓂᒋᑦ ᐃᓄᐃᑦ ᐅᒃᐱᕆᔭᖏᓐᓂᒃ ᖃᐅᔨᒋᐊᒃᑲᓐᓂᕈᒪᒍᓂ. ᑕᐃᒪᐃᑦᑑᒐᓗᐊᖅᑎᓪᓗᒍ, ᑭᓇᑐᐃᓐᓇᖅ ᐃᒻᒥᒧᑦ ᐊᒡᕕᐊᕈᑎᖃᖅᑕᐃᓕᒪᑎᑦᑎᓂᕐᒧᑦ ᑲᒥᓴᓇᒥᒃ ᐊᐱᕆᔪᓐᓇᖅᑐᖅ ᒪᓕᒐᓕᐅᖅᑎᒥᒃ

ᒪᓕᓐᖏᑦᑐᖃᕋᓱᒋᓐᓈᓯᒃᐸᑦ, ᐊᒻᒪᓗ ᓯᖁᒥᑦᑎᔪᖅᑕᖃᕐᓂᖅᐸᑦ, ᐊᑐᓕᖁᔭᓕᐅᕈᓐᓇᖅᑐᖅ ᐃᓂᖅᑎᐅᑎᓂᒃ ᐊᑐᖅᑎᑦᑎᔪᓐᓇᕐᓂᕐᒥᒃ, ᐃᓂᖅᑎᐅᑏᑦ ᐊᔾᔨᒌᓐᖏᑦᑑᔪᓐᓇᖅᖢᑎᒃ, ᓲᕐᓗ ᓱᑯᔭᐅᓂᒃᑯᑦ ᐊᒻᒪᓗ ᑕᖅᑲᒃᑯᓄᖓ ᒪᒥᐊᓐᓂᒃᑯᑦ, ᑮᓇᐅᔭᐃᖅᑎᑕᐅᓂᒃᑯᑦ ᐅᕝᕙᓘᓐᓃᑦ ᐊᓂᑕᐅᖁᔨᓂᒃᑯᑦ. ᒪᓕᒐᓕᐅᕐᕕᒃ ᐃᓱᒪᓕᐅᖅᑎᐅᕗᖅ ᐊᒻᒪᓗ ᓂᕈᐊᖅᑏᑦ ᑭᖑᓪᓕᖅᐹᒥᒃ ᓂᓪᓕᕈᓐᓇᖅᑎᑕᐅᓗᑎᒃ.

ᒪᓕᒐᓕᐅᖅᑏᑦ ᐊᖏᖅᓯᒪᓂᕐᒥᒍᑦ ᓇᓕᐊᑐᐃᓐᓇᖅ ᓯᖁᒥᑦᑎᔪᖅᑕᖃᓚᐅᖅᓯᒪᓐᖏᑦᑐᖅ ᓱᓕ ᐃᓗᐃᑦᑑᑦᑎᐊᕐᓂᕐᒧᑦ ᐱᖁᔭᕐᔪᐊᕐᒥᒃ. ᑕᒪᓐᓇ ᓯᖁᒥᑦᑎᔪᖅᑕᖃᓐᖏᓐᓂᖅ ᓱᕐᕋᒃᑕᐅᓇᓱᔾᔮᖅᑐᒃᓴᐅᓐᖏᑦᑐᖅ ᓇᓕᐊᑐᐃᓐᓇᕐᓄᑦ ᒪᓕᒐᓕᐅᖅᑎᓄᑦ. ᐃᓗᐃᑦᑑᑦᑎᐊᕐᓂᕐᒥᒃ ᑐᓐᖓᕕᖃᕐᓂᖅ ᑕᐃᒪᓐᖓᓕᒫᖅ ᐃᓱᓕᕝᕕᖃᓐᖏᑦᑐᖅ ᐊᒻᒪᓗ ᐊᑐᖅᑕᐅᑦᑎᐊᖅᑎᓪᓗᒍ ᑕᖅᑲᒃᑯᓄᖓ ᑕᑎᒋᔭᐅᔪᓐᓇᖅᓯᕙᓪᓕᐊᓲᑦ, ᐊᒻᒪᓗ ᑕᐃᒪᐃᖏᓐᓇᖁᓪᓗᒍ ᐃᖅᑲᓇᐃᔮᕇᓐᓇᕐᓗᒍ ᑭᓯᐊᓂᐅᔪᖅ.
ᑎᑎᕋᕐᕕᒃ

ᐃᒻᒥᒧᑦ ᐊᒡᕕᐊᕈᑎᖃᖅᑕᐃᓕᒪᑎᑦᑎᓂᕐᒧᑦ ᑲᒥᓴᓇ ᐃᓗᐃᑦᑑᑦᑎᐊᕐᓂᕐᒧᑦ ᐱᖁᔭᕐᔪᐊᕐᒥᒃ ᑲᒪᔨᐅᕗᖅ, ᒪᓕᒐᓕᐅᖅᑎᓄᓪᓗ ᖃᐅᔨᒪᔨᑕᕆᔭᐅᖃᑦᑕᖅᖢᓂ ᐃᓄᑑᖃᑎᒋᓪᓗᓂᒋᑦ ᐃᓗᐃᒃᑲᐅᑎᓪᓗᒋᓪᓘᓐᓃᑦ, ᐱᔪᓐᓇᕐᓂᖅᑖᖅᑎᑕᐅᓯᒪᓪᓗᓂᓗ ᒪᓕᒃᑲᓗᐊᕐᒪᖔᖏᓐᓂᒃ ᖃᐅᔨᓴᐃᔪᓐᓇᕐᓂᕐᒥᒃ ᐊᒻᒪᓗ ᐊᑐᓕᖁᔭᓕᐅᕈᓐᓇᖅᖢᓂ ᐃᓂᖅᑎᐅᑎᓂᒃ ᐊᑐᖅᑕᐅᔭᕆᐊᖃᖅᑐᓂᒃ ᐊᑐᖁᔭᐅᔪᓂᒃ ᒪᓕᒐᓕᐅᕐᕕᖕᒧᑦ.

ᑖᓐᓇ ᑎᑎᕋᕐᕕᒃ ᐱᔭᒃᓴᖅᑖᖅᑎᑕᐅᓯᒪᖕᒥᔪᖅ ᓄᓇᕗᒻᒥ ᓂᕈᐊᕐᓂᓕᕆᓂᕐᒧᑦ ᐱᖁᔭᕐᔪᐊᖅ ᐊᑐᖅᑕᐅᑦᑎᐊᕋᓗᐊᕐᒪᖔᖓᓂᒃ ᓇᐅᑦᑎᖅᓱᖅᑎᐅᓂᕐᒥᒃ, ᐱᔪᓐᓇᕐᓂᖅᑖᖅᑎᑕᐅᓯᒪᓪᓗᑎᒃ ᒪᓕᒃᑲᓗᐊᕐᒪᖔᒥᓄᑦ ᐊᖏᕈᑎᓂᒃ, ᑖᓐᓇ ᓂᒍᕈᑕᐅᒧᓐᓇᖅᑐᖅ ᐃᖅᑲᖅᑐᐃᕕᑦᑎᒎᖅᑎᑕᐅᓐᖏᖔᕐᓂᕐᒥᒃ, ᐱᖁᔭᕐᔪᐊᕐᒥᒃ ᓯᖁᒥᑦᑎᔪᖅᑕᖃᕐᓂᕋᖅᑕᐅᑎᓪᓗᒍ>

ᐃᒻᒥᒧᑦ ᐊᒡᕕᐊᕈᑎᖃᖅᑕᐃᓕᒪᑎᑦᑎᓂᕐᒧᑦ ᑲᒥᓴᓇ ᐃᒻᒥᓂᕿᕗᖅ, ᒪᓕᒐᓕᐅᕐᕕᖕᒧᑦ ᐊᒃᑐᐃᓂᖃᓐᖏᖢᓂ, ᓂᕈᐊᖅᑕᐅᓲᖑᓪᓗᓂᓗ ᒪᓕᒐᓕᐅᖅᑎᓄᑦ ᐱᔨᑦᑎᖅᑎᐅᔪᓐᓇᖅᑎᑕᐅᓪᓗᓂ "ᐱᑦᑎᐊᕐᓂᓕᒫᖓᓂ" ᐃᓕᓯᒪᓂᖓᓗ ᓄᑖᕈᕆᐊᖅᑎᑕᐅᒃᑲᓐᓂᕈᓐᓇᖅᖢᓂ ᑕᓪᓕᒪᑦ ᐊᕐᕌᒍᑦ ᐊᓂᒍᕐᓂᑕᒫᖏᑦ.

ᑎᒃᑯᐊᖅᑕᐅᕐᖓᓚᐅᖅᓯᒪᔪᖓ ᑎᓴᒪᓄᑦ ᐊᕐᕌᒍᓄᑦ ᐊᑐᖅᑕᐅᓪᓗᑎᒃ ᓄᑕᐅᓐᖏᑦᑐᑦ ᐱᖁᔭᕐᔪᐊᑦ, ᓯᕗᓪᓕᖅᐹᒥᓗ ᓄᓇᕗᒻᒥ ᐃᒻᒥᒧᑦ ᐊᒡᕕᐊᕈᑎᖃᖅᑕᐃᓕᒪᑎᑦᑎᓂᕐᒧᑦ ᑲᒥᓴᓇᓐᖑᖅᑎᑕᐅᓚᐅᖅᓯᒪᓪᓗᖓ, ᐃᓕᓯᒪᓂᕋᓗ ᐃᓱᓕᓚᐅᖅᖢᒍ ᓄᑖᑦ ᐱᖁᔭᕐᔪᐊᑦ ᐃᓗᓕᖏᑦ ᐊᑐᖅᖢᒋᑦ ᓯᕗᓪᓕᐅᓪᓗᖓᓗ ᐃᓱᐊᓄᑦ ᑎᑭᓚᐅᖅᓯᒪᓪᓗᒍ. ᑖᒃᑯᐊ ᐱᖁᔭᕐᔪᐊᑦ ᐊᑐᖅᖢᒋᑦ ᑲᒥᓴᓇᕆᔭᐅᔪᖅ ᐃᓕᓯᒪᐃᓐᓇᕐᓂᐊᖅᑎᓯᒪᔪᖅ ᑎᒃᑯᐊᖅᑕᐅᒃᑲᓐᓂᕐᓂᕐᒥᓄᑦ ᑭᖑᕝᕕᖅᑎᒃᓴᖓᓘᓐᓃᑦ ᑭᓯᐊᓂ ᑎᒃᑯᐊᖅᑕᐅᒃᐸᑦ.
ᓇᓗᓇᐃᔭᐃᓯᒪᔪᑦ ᐅᓂᒃᑳᑦ

ᐃᓗᐃᑦᑑᑦᑎᐊᕐᓂᕐᒧᑦ ᐱᖁᔭᕐᔪᐊᖅ ᐊᑐᖅᖢᒍ ᒪᓕᒐᓕᐅᖅᑏᑦ ᐊᑐᓂ ᓇᓗᓇᐃᔭᐃᓯᒪᔪᓂᒃ ᐅᓂᒃᑳᓂᒃ ᑐᓂᓯᖃᑦᑕᕆᐊᖃᖅᑎᑕᐅᔪᑦ ᑎᑎᕋᕐᕕᖕᒧᑦ, ᐱᔭᕇᖅᓯᓯᒪᔭᕆᐊᖃᕐᕕᖓᑕᓗ ᐅᓪᓗᖓ ᓇᓗᓇᐃᖅᑕᐅᓯᒪᓪᓗᓂ ᐃᒻᒥᒧᑦ ᐊᒡᕕᐊᕈᑎᖃᖅᑕᐃᓕᒪᑎᑦᑎᓂᕐᒧᑦ ᑲᒥᓴᓇᒧᑦ, ᐊᕐᕌᒍᑕᒫᖅᓯᐅᑏᑦ ᐅᓂᒃᑳᖏᓐᓂᒃ ᓇᓗᓇᐃᔭᐃᓯᒪᔪᓂᒃ ᖃᑕᓐᖑᑎᒌᑦ ᑮᓇᐅᔭᖁᑎᖏᓐᓂᒃ. ᑎᑎᕋᖅᑎᒧᑦ ᐅᖃᐅᔾᔭᐅᓚᐅᖅᑐᖓ ᓯᕗᓪᓕᖅᐹᒥ ᒪᓕᒐᓕᐅᖅᑎᓕᒫᑦ ᓇᓗᓇᐃᔭᐃᓚᐅᕐᓂᕋᖅᖢᓂᒋᑦ ᒪᐃ 31, 2003 ᐃᓱᓕᕝᕕᖓᑕ ᑐᖔᓂ.

ᐱᖁᔭᕐᔪᐊᖅ ᐊᑐᖅᖢᒍ ᓂᕈᐊᖅᑕᐅᓵᖅᑐᑦ ᒪᓕᒐᓕᐅᖅᑏᑦ ᑕᖅᑲᒃᑯᓄᖓ ᒪᑐᐃᖓᔪᓂᒃ ᐅᓂᒃᑳᓂᒃ ᑕᑕᑎᖅᓯᓯᒪᔭᕆᐊᖃᕐᒥᔪᑦ ᐅᓪᓗᑦ 60 ᑐᖔᓂ ᑕᐃᒪᓐᖓᓂᑦ ᓂᕈᐊᖅᑕᐅᓚᐅᖅᑎᓪᓗᒋᑦ. ᑕᒪᑐᒪᓂ ᐊᕐᕌᒍᒥ, ᒪᐅᓇᑐᐃᓐᓇᖅ ᓂᕈᐊᕐᓂᖅᑕᖃᓚᐅᖅᑐᖅ ᐊᒻᒪᓗ ᑭᒃᑯᑐᐃᓐᓇᕐᓄᑦ ᓂᕈᐊᕐᓂᖅᑕᖃᓚᐅᖅᖢᓂ. ᑎᑎᕋᖅᑎ ᐅᓂᒃᑳᓚᐅᖅᑐᖅ ᒪᓕᒐᓕᐅᖅᑏᑦ ᓂᕈᐊᖅᑕᐅᓚᐅᖅᑐᑦ ᓯᕗᓪᓕᖅᐹᓄᑦ ᒪᓕᒐᓕᐅᖅᑎᓄᑦ ᒪᐅᓇᑐᐃᓐᓇᖅ ᓂᕈᐊᕐᓂᖅᑕᖃᓚᐅᖅᑎᓪᓗᒍ ᑕᑕᑎᖅᓯᔪᐃᓐᓇᐅᓚᐅᖅᑐᑦ ᑕᑕᑎᕆᐊᓕᖕᒥᖕᓂᒃ ᐃᓱᓕᕝᕕᖓᑕ ᑐᖔᓂᑦ, ᐊᒻᒪᓗ ᑐᒡᓕᐊᓂ ᒪᓕᒐᓕᐅᖅᑏᑦ ᐃᓘᓐᓇᖏᑦ ᑕᑕᑎᖅᓯᓚᐅᕆᓪᓗᑎᒃ ᐃᓱᓕᑦᑕᕐᕕᖓ ᑎᑭᓐᓂᐅᓴᖅᑎᓐᓇᒍ. ᑕᐃᒪᐃᓐᓂᖓᓄᑦ, ᐃᓱᒪᓕᐅᖅᓯᒪᓕᖅᑐᖓ ᒪᓕᒐᓕᐅᖅᑎᓕᒫᑦ ᐱᖁᔭᖅᑎᒍᑦ ᒪᓕᒋᐊᖃᖅᑐᓕᒫᓂᒃ ᒪᓕᓚᐅᖅᑐᑦ ᑕᒪᑐᒪᓂ ᐊᕐᕌᒍᒥ ᖃᐅᔨᓴᕐᓂᕆᓚᐅᖅᑕᓐᓂᒃ.

ᒪᓕᒐᓕᐅᖅᑎᓕᒫᑦ ᓇᓗᓇᐃᖅᓯᒪᔭᖏᑦ ᑕᑕᑎᕆᐊᓕᒃᑎᒍᑦ ᑕᖅᑲᒃᑯᓄᖓ ᑕᑯᔭᐅᔪᓐᓇᑦᑎᐊᖅᑐᑦ, ᐊᖅᑯᑕᐅᓗᓂ ᒪᓕᒐᓕᐅᕐᕕᖕᒧᑦ ᑎᑎᕋᖅᑎ.
ᐱᓕᕆᐊᑦ ᐃᖕᒥᒧᑦ ᐊᒡᕕᐊᕈᑎᖃᖅᑕᐃᓕᒪᓂᕐᒧᑦ ᒪᓕᒐᑦ ᒪᓕᒃᖢᒋᑦ

ᐃᖃᓗᖕᓂ ᐱᒋᐊᖅᖢᒍ ᓯᑉᑕᐱᕆ 30-ᒥᑦ ᐊᒃᑐᐱᕆ 3-ᒧᑦ, 2003, ᐊᒻᒪᓗ ᕕᕗᐊᕆ 29-ᒥᑦ ᒫᑦᓯ 9-ᒧᑦ, 2004, ᑲᑎᒪᖃᑎᖃᓚᐅᖅᐳᖓ ᐃᖕᒥᒃᑰᓕᖓᓪᓗᑎᒃ ᑲᑎᒪᖃᑎᒋᕙᒃᖢᒋᑦ ᑲᑎᒪᔨᑦ ᐊᒻᒪᓗ ᐊᓯᖏᑦ ᑕᒪᒃᑯᐊ ᐅᖃᐅᓯᓕᕆᓂᕐᒧᑦ ᑲᒥᓯᓇ, ᒥᓂᔅᑕᐅᑉ ᑐᖏᓕᖓᓗ ᒪᓕᒐᓕᕆᔨᒃᑯᓐᓂ, ᐊᒻᒪᓗ ᑎᑎᕋᖅᑎ ᒪᓕᒐᓕᐅᖅᑎᒃᑯᓐᓂ ᐱᓕᕆᔨᖏᓪᓗ ᒪᓕᒐᓕᐅᖅᑎᑦ ᐊᓪᓚᕕᖓᓂᒥᐅᑕᐃᑦ.

ᑕᒪᕐᒥᒃ ᑲᑎᒪᔨᐅᖃᑕᐅᔪᑦ ᒪᓕᒐᓕᐅᖅᑎᒃᑯᓐᓂ ᐊᐃᑉᐸᖏᓪᓗ ᐊᔪᕐᓇᖏᒃᑳᖓᑦ ᑲᑎᒪᖃᑎᒋᕙᒃᖢᒋᑦ ᐃᖕᒥᒧᑦ ᐊᒡᕕᐊᕈᑎᖃᖅᑕᐃᓕᒪᓂᕐᒧᑦ ᑲᒥᓯᓇᒥᒃ ᑲᑎᒪᖃᑎᖃᕆᐊᖃᖃᑦᑕᕐᒪᑕ ᐊᕐᕌᒍᑕᒫᑦ ᖃᐅᔨᓴᖅᖢᒋᑦ ᕿᒥᕐᕈᓪᓗᒋᓪᓗ ᖃᑕᖑᑎᒌᑦ ᑮᓇᐅᔭᖁᑎᖏᑦ ᖃᓄᐃᓕᐅᕆᐊᖃᕐᓂᖏᓐᓄᓪᓗ ᒪᓕᒐᑦ ᒪᓕᒃᖢᒋᑦ. ᐊᐱᖅᓱᖃᑦᑕᖅᐳᖓ ᐊᑐᓂ ᑲᑎᒪᔨᐅᔪᓂᒃ ᒪᓕᒐᓕᐅᖅᑎᒃᑯᓐᓂ, ᐃᓚᖏᑦ ᐊᐃᑉᐸᓕᔭᖃᑦᑕᖅᖢᑎᒃ, ᐊᕐᕌᒍᑕᒫᑦ ᑕᐃᒪᓐᓇ ᑲᑎᒪᖃᑎᒋᒋᐊᖃᖃᑦᑕᖅᖢᒋᑦ.

ᐅᖃᓕᒫᒐᖅ ᐊᑎᖃᖅᑐᖅ, ᐃᖕᒥᒧᑦ ᐊᒡᕕᐊᕈᑎᖃᖅᑕᐃᓕᒪᓂᖅ--ᒪᓕᒐᓕᐅᖅᑎᒃᑯᓐᓂ ᑲᑎᒪᔨᑦ ᖃᓄᐃᓕᐅᕆᐊᖃᕈᑎᖏᑦ, ᑎᑎᕋᖅᑕᐅᓚᐅᖅᐳᑦ ᐃᓄᒃᑎᑑᖅᓯᒪᓪᓗᑎᒃ, ᐃᓄᐃᓐᓇᖅᑐᓪᓗ, ᖃᓪᓗᓈᑎᑐᑦ ᐅᐃᕖᑎᑐᓪᓗ, ᑭᒃᑯᑐᐃᓐᓇᕐᓄᑦ ᐊᑐᐃᓐᓇᐅᑎᑕᐅᓚᐅᖅᖢᑎᒡᓗ ᓂᕈᐊᕐᓇᐅᓚᐅᖏᓐᓂᐊᓂ. ᖃᕆᑕᐅᔭᒃᑯᑦ ᑐᑭᓯᒋᐊᕐᕕᒃᓴᖁᑎᒐ, www.integritycom.nu.ca, ᑐᑭᓯᒋᐊᕈᑎᒃᓴᓂᒃ ᑭᒃᑯᑐᐃᓐᓇᕐᓄᑦ ᐱᑕᖃᐅᖅᐳᖅ ᒪᓕᒐᑦ ᒥᒃᓵᓄᑦ ᐱᔾᔪᑎᖃᖅᑐᓂᒃ, ᓇᑭᖔᖅᓯᒪᓂᖏᓐᓄᑦ ᐊᒻᒪᓗ ᐃᖕᒥᒧᑦ ᐊᒡᕕᐊᕈᑎᖃᖅᑕᐃᓕᒪᓂᕐᒧᑦ ᑲᒥᓯᓇᐅᑉ ᐊᓪᓚᕕᖓ ᖃᓄᐃᓕᐅᖃᑦᑕᕐᓂᖓᓄᑦ ᐱᔾᔪᑎᖃᖅᑐᓂᒃ, ᐊᒻᒪᓗ ᐅᓂᒃᑳᓕᐊᕆᓯᒪᔭᒃᑲ ᐊᒻᒪᓗ ᑕᑕᑎᕆᐊᒐᒃᓴᐃᑦ ᒪᓕᒐᓕᐅᖅᑎᓄᑦ ᐃᓕᖃᓯᐅᑎᓯᒪᓪᓗᒋᑦ.

ᐊᑐᓂ ᑲᑎᒪᔨᐅᖃᑕᐅᔪᑦ ᒪᓕᒐᓕᐅᖅᑎᒃᑯᓐᓂ ᐱᑎᑕᐅᓚᐅᖅᐳᑦ ᑎᑎᖃᓂᒃ ᑲᑎᒪᔨᑦ ᐃᖕᒥᒧᑦ ᐊᒡᕕᐊᕈᑎᖃᖅᑕᐃᓕᒪᓂᕐᒧᑦ ᒪᓕᒐᐃᑦ ᐅᖃᓕᒫᒐᖁᑎᖏᓐᓂᒃ, ᑐᑭᓯᒋᐊᕈᑎᒃᓴᐃᑦ ᑎᑎᕋᖅᓯᒪᔪᑦ ᒪᓕᒐᑦ ᐱᓪᓗᒋᑦ ᐊᒻᒪᓗ ᐊᓪᓚᕕᒐ ᐱᔾᔪᑎᒋᓪᓗᒍ, ᑕᒪᒃᑯᐊ ᓄᑖᑦ ᓴᖅᑭᑉᐸᓪᓕᐊᔪᑦ ᐃᓕᐅᖃᖅᑕᐅᔪᓐᓇᕆᓪᓗᑎᒃ ᑕᒡᕗᖓ ᐊᑐᐃᓐᓇᐅᓕᕌᖓᑕ.

ᐃᓕᓐᓂᐊᖅᑎᑕᐅᑎᓪᓗᒋᑦ ᐱᓇᓱᐊᕈᓯᒥ ᑐᒡᓕᐊᓂ ᒪᓕᒐᓕᐅᖅᑎᒃᑯᑦ ᑲᑎᒪᓂᖓᑦ ᐱᒋᐊᓚᐅᖏᓐᓂᐊᓂ, ᐅᓂᒃᑳᕆᐊᖅᑐᖅᓯᒪᓚᐅᖅᐳᖓ ᒪᓕᒐᓕᐅᖅᑎᑦ ᑲᑎᒪᔨᖏᓐᓄᑦ, ᐊᐱᖁᑎᒋᔭᐅᔪᓂᒃ ᑭᐅᖃᑦᑕᖅᖢᖓᓗ ᐃᖕᒥᒧᑦ ᐊᒡᕕᐊᕈᑎᖃᖅᑕᐃᓕᒪᒋᐊᖃᕐᓂᕐᒧᑦ ᒪᓕᒐᑦ ᒥᒃᓵᓄᑦ, ᐅᖃᐅᑎᓪᓗᒋᓪᓗ ᐅᕙᓐᓄᑦ ᐅᖃᓪᓚᒋᐊᖅᑐᖃᑦᑕᖁᓪᓗᒋᑦ ᓇᓗᓕᕌᖓᑕ ᖃᓄᐃᓕᐅᕈᓐᓇᕆᐊᒃᓴᖅ.

ᐊᕐᕌᒍᓕᒫᕐᒥ ᐊᑐᖃᑦᑕᖅᐳᖓ ᐅᖄᓚᐅᑎᒃᑯᑦ, ᓱᑲᔪᒃᑰᕈᑎᒃᑯᓪᓗ, ᖃᕆᑕᐅᔭᒃᑯᓪᓗ ᑎᑎᖃᑎᒍᓪᓗ ᐅᖃᓪᓚᖃᑎᖃᖃᑦᑕᖅᖢᖓ ᑲᑎᒪᔨᓂᒃ ᒪᓕᒐᓕᐅᖅᑎᒃᑯᓐᓂ ᒥᓂᔅᑕᓂᒡᓗ, ᑭᒃᑯᑐᐃᓐᓇᕐᓂᒃ ᐱᓕᕆᔨᒐᓚᖕᓂᒃ ᐅᖃᓪᓚᖃᑎᖃᖅᐸᒃᖢᖓᓗ, ᑭᐅᖃᑦᑕᖅᖢᖓᓗ ᐊᐱᖁᑎᒋᔭᐅᔪᓂᒃ ᑭᒃᑯᑐᐃᓐᓇᕐᓂᑦ ᐱᕙᓪᓕᐊᔪᓕᕆᔨᓂᓪᓗ. ᐅᖃᓪᓚᖃᑎᒋᖏᓐᓇᖃᑦᑕᖅᐸᕋ ᒪᓕᒐᓕᐅᖅᑎᒃᑯᑦ ᑎᑎᕋᖅᑎᖓᑦ ᐊᑐᖅᑕᐅᓂᐊᖅᑐᓂᒃ ᖃᓄᐃᓕᐅᕆᐊᖃᕐᓂᖏᓐᓄᑦ ᒪᓕᒐᓕᐅᖅᑎᒃᑯᑦ ᐃᖅᑲᓇᐃᔭᕐᕕᖓᓐᓂ.

ᐊᕐᕌᒎᖃᑦᑕᖅᓯᒪᓕᖅᑐᓂ, ᐊᐱᕆᔭᐅᖃᑦᑕᖅᓯᒪᕗᖓ ᒐᕙᒪᒃᑯᓐᓂ ᐊᖓᔪᖃᐅᑎᒋᔭᐅᔪᓂᑦ, ᐃᖕᒥᒧᑦ ᐊᒡᕕᐊᕈᑎᖃᖅᑕᐃᓕᒪᓂᕐᒧᑦ ᒪᓕᒐᑎᒍᑦ ᐊᐅᓚᑕᐅᖏᑦᑐᓂᑦ. ᑕᐃᒪ ᐅᖃᐅᓯᕆᓯᒪᒐᒃᑭᑦ ᐊᕐᕌᒍᑕᖅᓯᐅᑎᓂ ᐅᓂᒃᑳᓕᐊᕆᓯᒪᔭᓐᓂ, ᓄᓇᑦᓯᐊᒥ ᐃᖕᒥᒧᑦ ᐊᒡᕕᐊᕈᑎᖃᖅᑕᐃᓕᒪᓂᕐᒧᑦ ᖃᐅᔨᓴᕐᓂᕐᒧᑦ ᑲᑎᒪᑎᑕᐅᓚᐅᖅᑐᓂ 1999-ᒥ ᐊᑐᓕᖁᔨᒍᑎᖃᓚᐅᕐᒪᑕ "ᒥᓂᔅᑕᐃᑦ ᑐᖏᓕᖏᑦ ᐊᒻᒪᓗ ᑕᒪᒃᑯᐊ ᑕᐃᒪᐃᑦᑐᓂᒃ ᐱᓕᕆᐊᖃᖅᑎᑕᐅᔪᑦ ᑕᐃᒪᓐᓇ ᒥᓂᔅᑕᑎᑐᑦ ᒪᓕᒋᐊᖃᕐᓂᖏᓐᓄᑦ ᐋᖅᑭᒃᑕᐅᓯᒪᖁᔭᐅᓪᓗᑎᒃ. ᐃᓱᒪᒃᓴᖅᓯᐅᕐᓗᓂ ᓄᑖᓂᒃ ᒪᓕᒐᒃᓴᖏᓐᓂᒃ ᓄᓇᕗᑦ, ᒪᓕᒐᓕᐅᖅᑎᒃᑯᑦ ᐊᑐᕈᒪᓚᐅᕐᒪᑕ ᑕᒪᒃᑯᓂᖓ ᑭᓯᐊᓂ ᓯᕗᓪᓕᖅᐹᒥ ᐊᑐᒐᒃᓴᖏᓐᓂᒃ ᒪᓕᒐᒃᓴᖏᓐᓂᒃ ᑲᑎᒪᔨᑦ ᐊᑐᕆᐊᖅᑳᕈᒪᓚᐅᕐᒪᑕ ᓇᖕᒥᓂᖅ ᐆᑐᑎᒋᔭᐅᒍᒪᓪᓗᑎᒃ ᐊᑐᕐᓂᐊᖅᑕᒥᖕᓂᒃ. ᐊᕐᕌᓂ ᒪᓕᒃᑕᐅᒋᐊᖃᖅᑐᓂᒃ ᑕᒪᐃᓐᓄᑦ ᓄᓇᕗᒥ ᒐᕙᒪᒃᑯᓐᓄᑦ ᐃᖅᑲᓇᐃᔭᖅᑎᖏᓐᓄᑦ ᐅᓂᒃᑳᖅᑐᖃᓚᐅᖅᐳᖅ ᑕᒪᓐᓇ ᕿᒥᕐᕈᔭᐅᓪᓗᓂ ᒪᓕᒋᐊᖃᖅᑕᖏᑦ, ᑕᐃᒪᓐᓇᓗ ᕿᒥᕐᕈᐊᖏᓐᓇᖅᖢᑎᒃ ᑕᒪᒃᑯᓂᖓ ᒪᓕᒃᑕᐅᒋᐊᖃᖅᑐᓂᒃ. ᑭᓯᐊᓂ, ᐊᑐᓕᖁᔨᒍᑎᖃᓚᐅᕐᒪᑕ ᒪᓕᒐᓕᐅᖁᔨᓪᓗᑎᒃ ᐃᓕᖁᓯᖃᑦᑕᕆᐊᖃᕐᓂᖏᓐᓄᑦ ᓵᑕᐅᔪᒃᓴᐅᓂᖃᕆᐊᖃᕐᓂᖏᓐᓄᓪᓗ ᐊᖓᔪᖃᐅᑎᑦ ᒐᕙᒪᒃᑯᓐᓂ ᓱᓕ ᐱᓕᕆᐊᕆᔭᐅᓯᒪᖏᑉᐳᖅ ᑕᒪᓐᓇ. ᑕᐃᒪ ᓴᓐᖏᔪᒻᒪᕆᐅᖃᑦᑕᕐᓂᖏᓐᓄᑦ ᐃᓱᒪᓕᐅᕈᑎᒋᒋᐊᖃᖃᑦᑕᖅᑕᖏᑦ ᐊᖓᔪᖃᐅᑎᑦ ᐊᑐᐊᒐᓕᐅᕐᓂᐅᑉ ᐱᓕᕆᓂᓪᓗ ᒥᒃᓵᓄᑦ, ᒪᓕᒐᒃᓴᖃᕆᐊᖃᕐᓂᖏᓐᓄᑦ ᒪᓕᒐᓕᐅᖅᑎᒃᑯᓐᓄᑦ ᐃᓱᒪᒋᔭᐅᕗᑦ ᐱᐊᓂᒃᓯᒪᖏᓐᓂᖏᓐᓄᑦ ᑕᒪᑐᒧᖓ.
ᐱᓕᕆᐊᑦ ᓄᓇᕗᒥ ᓂᕈᐊᖅᑐᓕᕆᓂᕐᒧᑦ ᒪᓕᒐᓄᑦ

ᒪᓕᒃᑕᐅᒋᐊᖃᕐᒪᑦ ᓄᓇᕗᒥ ᓂᕈᐊᕐᓂᕐᒧᑦ ᒪᓕᒐᐃᑦ, ᐱᓕᕆᖃᑎᖃᖅᓯᒪᕗᖓ ᓄᓇᕗᒥ ᓂᕈᐊᖅᑐᓕᕆᓂᕐᒧᑦ ᐊᖓᔪᖄᒥᒃ ᐊᒻᒪᓗ ᐸᓖᓯᒃᑯᓐᓂᒃ ᖃᓄᐃᓕᐅᕆᐊᖃᕐᓂᑦᑎᓐᓄᑦ ᐱᔾᔪᑎᖃᖅᑐᓂᒃ ᒪᓕᒐᕐᓂᒃ ᒪᓕᑦᓯᐊᖁᔨᖃᑦᑕᕐᓂᕐᒧᑦ ᐱᓕᕆᐊᖃᕐᓂᑦᑎᓐᓂ. ᑕᒪᒃᑯᐊ ᑎᒥᐅᔪᑦ ᐅᖃᓪᓚᖃᑎᒋᕙᒃᖢᑎᒍ, ᐱᕙᓪᓕᐊᔪᓕᕆᔨᓪᓗ ᑐᓴᒐᒃᓴᓂᒃ ᐊᒻᒪᓗ ᑭᒃᑯᑐᐃᓐᓇᐃᑦ ᑕᖅᑳᓂᒥᐅᑕᐅᔪᑦ. ᒪᓕᒃᑕᐅᒋᐊᖃᖅᑐᓂᒃ ᒪᓕᖏᓐᓂᕐᒧᑦ ᐊᖏᕈᑎᓕᐅᖅᑐᖃᓚᐅᖏᑉᐳᖅ ᐃᖅᑲᖅᑐᖅᑕᐅᑦᑕᐃᓕᒪᒍᒪᔪᖃᖅᖢᓂ 2004-ᒥ ᓂᕈᐊᕐᓇᐅᓚᐅᖅᑎᓪᓗᒍ.
ᖁᔭᓐᓇᒦᕈᑎᑦ

ᐊᕐᕌᓂ ᑕᐃᒪᐃᖃᑦᑕᕋᒪ ᐊᕐᕌᒍᑕᒫᑦ ᐃᑲᔪᖅᑕᐅᑦᓯᐊᓚᐅᖅᐳᖓ ᖃᐅᔨᕚᓪᓕᖅᑎᑕᐅᓪᓗᖓᓗ ᑲᑎᒪᖃᑕᐅᖃᑦᑕᖅᖢᖓ ᐱᖃᑎᒋᔭᓐᓂᒃ ᐊᓯᖏᓐᓂ ᓄᓇᓕᐅᔪᓂ ᑲᓇᑕᒥ ᐃᖕᒥᒧᑦ ᐊᒡᕕᐊᕈᑎᖃᖅᑕᐃᓕᒪᓂᕐᒧᑦ ᐱᓕᕆᔨᑦ ᑲᑎᒪᑎᓪᓗᒋᑦ (CCOIN), ᑲᑎᒪᔨᖏᓪᓗ ᒐᕙᒪᒃᑯᑦ ᐃᖅᑲᓇᐃᔭᖅᑎᖏᑦ ᖃᓄᐃᓕᖓᒋᐊᖃᖃᑦᑕᕐᓂᖏᓐᓄᑦ (COGEL) ᐊᒻᒪᓗ ᑲᑎᒪᔨᖏᑦ ᑲᓇᑕᒥ ᑎᑎᖃᓕᕆᓂᕐᒧᑦ ᖃᐅᔨᓴᖅᑎᖏᑦ (CCAT). ᑲᓇᑕᒥ ᐃᖕᒥᒧᑦ ᐊᒡᕕᐊᕈᑎᖃᖅᑕᐃᓕᒪᓂᕐᒧᑦ ᐱᓕᕆᔨᑦ ᑲᑎᒪᑎᓪᓗᒋᑦ ᐊᕐᕌᒍᑕᒫᖅᓯᐅᑎᒥᒃ ᑲᑎᒪᑎᑦᓯᓚᐅᖅᖢᑎᒡᓗ ᔭᓗᓇᐃᒥ, ᓄᓇᑦᓯᐊᒥ ᒪᓕᒐᓕᐅᖅᑎᒃᑯᓐᓄᑦ ᐱᑎᑕᐅᒋᐊᖅᓯᒪᓪᓗᑎᒃ, ᐊᒻᒪᓗ ᑲᑎᒪᔨᖏᑦ ᑲᓇᑕᒥ ᑎᑎᖃᓕᕆᓂᕐᒧᑦ ᖃᐅᔨᓴᖅᑎᖏᑦ ᐊᕐᕌᒍᑕᒫᖅᓯᐅᑎᒥᒃ ᑲᑎᒪᑎᑎᓚᐅᕆᓪᓗᑎᒃ ᒐᑎᓄᒥ, ᐃᑲᔪᕐᓂᖃᒻᒪᕆᓚᐅᕆᕗᑦ ᐅᕙᓐᓄᑦ.

ᐱᓕᕆᖃᑎᖃᑦᓯᐊᕐᓂᖅ ᑲᑎᒪᔨᐅᔪᓂᒃ ᒪᓕᒐᓕᐅᖅᑎᒃᑯᓐᓄᑦ ᑲᔪᓯᖏᓐᓇᖅᐸᕋ ᖃᓄᐃᓕᐅᕆᐊᒃᓴᖏᓐᓄᑦ ᐅᖃᓪᓚᖃᑎᒋᑦᓯᐊᖅᐸᒃᖢᒋᑦ ᐃᑲᔪᕈᓐᓇᖃᑦᑕᖅᖢᒋᓪᓗ ᐊᓪᓚᒃᑎᖓᑦ ᒪᓕᒐᓕᐅᖅᑎᒃᑯᑦ ᐊᒻᒪᓗ ᐃᖅᑲᓇᐃᔭᖅᑎᖏᑦ.

ᖁᕕᐊᒋᔭᖃᖅᖢᖓᓗ ᐱᔨᑦᓯᕋᕈᓐᓇᖃᑦᑕᕆᐊᒃᓴᖅ ᑭᒃᑯᑐᐃᓐᓇᕐᓂᒃ.

ᑲᔪᓯᑦᓯᐊᖁᕙᒃᑲ ᑲᑎᒪᔨᖏᑦ ᒪᓕᒐᓕᐅᖅᑎᒃᑯᑦ ᑐᒡᓕᒋᔭᐅᓕᖅᑐᓂ ᑕᐃᒪᓐᓇ ᐱᓕᕆᕙᓪᓕᐊᑦᓯᐊᖁᓪᓗᒋᓪᓗ ᐃᖕᒥᒧᑦ ᐊᒡᕕᐊᕈᑎᖃᖅᑕᐃᓕᒪᓂᕐᒧᑦ ᐱᔾᔪᑎᖃᖅᑐᓂᒃ ᓄᓇᒥᖕᓄᑦ ᐃᓄᖕᓄᓪᓗ ᐱᔨᑦᓯᕋᕐᓂᖏᓐᓂ.

ᒪᐃ 31, 2004 ᕌᐳᑦ ᔅᑖᓐᐱᐅᕆ

Fichier attachéTaille
2003-2004 (PDF)134 KB