ᐅᓂᒃᑲᐅᓯᖃᑦᑎᐊᖅᑐᓄᑦ ᑐᕌᖓᔪᑦ ᑕᑎᕆᐊᓖᑦ

ᒪᓕᒐᓕᐅᖅᑏᑦ ᐊᑐᓂ ᓱᓕᑦᑎᐊᕐᓂᕐᒧᑦ ᐱᖁᔭᕐᔪᐊᖅᑎᒍᑦ ᐃᓛᓐᓂᓚᐅᓱᖓᖅ ᒪᓕᒐᓕᐅᕐᕕᐅᑉ ᑎᑎᕋᕐᕕᖓᒍᑦ ᑕᖅᑲᐅᓐᖓᖅᑐᒃᓴᓂᒃ ᓇᓗᓇᐃᔭᐃᔾᔪᑎᓂᒃ ᑕᑕᑎᕆᔭᕆᐊᖃᖃᑦᑕᖅᐳᑦ, ᑕᑕᑎᕈᑏᑦ ᑖᒃᑯᓄᖓ ᐊᑐᖅᑐᑦ ᐊᑐᕐᓗᓂᒋᑦ.  ᑕᖅᑲᐅᓐᖓᖅᑐᒃᓴᑦ ᓇᓗᓇᐃᔭᐃᔾᔪᑏᑦ, ᓴᖅᑭᑦᑎᔾᔪᑕᐅᖃᑦᑕᖅᐳᑦ ᒪᓕᒐᓕᐅᖅᑎᐅᑉ ᐱᖁᑎᖏᓐᓂᒃ, ᐊᑭᓕᒃᓴᓐᓂᒃ, ᐱᓯᓂᓯᖃᕐᕕᖏᓐᓂᒃ, ᓇᑭᑦ ᑮᓇᐅᔾᔭᒃᓴᕐᒪᖔᖏᓐᓂᒃ ᐊᒻᒪ ᐊᓯᖏᓐᓂᒃ, ᐃᓚᒋᓪᓗᒋᑦ ᐃᓚᔮᖏᑦᑕ ᐱᖁᑎᖏᑦ ᐅᕝᕙᓘᓐᓃᑦ ᓇᖕᒥᓂᖅ ᐱᓯᓂᓯᖃᕐᕕᒋᔭᖏᑦ.

ᑕᖅᑲᐅᓐᖓᖅᑐᒃᓴᑦ ᓇᓗᓇᐃᔭᐃᔾᔪᑏᑦ ᑕᑕᑎᖅᑕᐅᔭᕆᐊᖃᖅᐳᑦ ᐃᓗᓪᓕᖅᓱᖅᑕᐅᓗᑎᒡᓗ ᓱᓕᑦᑎᐊᕐᓂᕐᒧᑦ ᐱᖁᔭᕐᔪᐊᖅᑎᒍᑦ (ᓈᓴᐅᑎᓕᒃ 5) ᓇᓗᓇᐃᔭᖅᑕᐅᖁᔭᐅᔪᑦ ᐊᑕᖏᕐᓗᓂᒋᑦ.  ᓇᓗᓇᐃᖅᑕᐅᓯᒪᖕᒥᔪᑦ ᑕᑕᑎᖅᑕᐅᔪᓅᕆᐊᖃᓐᖏᑦᑐᑦ, ᓲᕐᓗ ᑐᓴᐅᒪᔾᔪᑏᑦ ᐱᔾᔪᑎᓖᑦ ᐃᓚᖏᓐᓂᒃ ᐱᖁᑎᒋᔭᐅᔪᓂᒃ, ᐊᑭᓕᒃᓴᕆᔭᐅᔪᓂᒃ ᐊᒻᒪ ᓇᑭᑦ ᑮᓇᐅᔾᔭᒃᓴᕐᒪᖔᖓ.

ᐊᑐᓂ ᒪᓕᒐᓕᐅᖅᑏᑦ ᑕᖅᑲᐅᓐᖓᖅᑐᒃᓴᓂᒃ ᓇᓗᓇᐃᔭᐃᔾᔪᑎᓂᒃ ᑕᑕᑎᕆᔭᕆᐊᖃᖅᐳᑦ ᐅᓪᓗᑦ 90 ᑐᖔᓂ ᓂᕈᐊᖅᑕᐅᓚᐅᖅᑎᓪᓗᒍ, ᑭᖑᕐᖓᓂ ᐊᕐᕌᒍᑕᒫᖅ ᐅᓪᓗᕐᒥ ᓇᓗᓇᐃᖅᑕᐅᓯᒪᔪᒥ ᓱᓕᑦᑎᐊᕐᓂᕐᒧᑦ ᑲᒥᓴᓇᐅᔪᒧᑦ.  ᑖᒃᑯᐊ ᐅᓪᓗᖏᑦᑕ ᐊᑯᓐᓂᖏᓐᓂ ᐊᓯᔾᔨᖅᑐᖃᕐᔪᐊᑲᓪᓚᖕᓂᖅᐸᑦ ᑕᐃᒪᓐᖓᓂᑦ ᑕᑕᑎᕆᓚᐅᖅᑎᓪᓗᒍ, ᒪᓕᒐᓕᐅᖅᑎ ᑕᑕᑎᕆᒃᑲᓐᓂᕆᐊᓕᒃ ᑎᑎᕋᖅᑎᒥᒃ ᐱᖃᑎᖃᕐᓗᓂ, ᑕᖅᑲᐅᓐᖓᖅᑐᒃᓴᑦ ᓇᓗᓇᐃᔭᐃᔾᔪᑎᖏᑦᑕ ᐅᐃᒍᖏᓐᓂᒃ ᐅᓪᓗᑦ 30 ᑐᖔᓂ ᐊᓯᔾᔨᖅᑕᐅᔪᖅᑕᖃᓚᐅᖅᑎᓪᓗᒍ.

ᒪᓕᒐᓕᐅᖅᑎ, ᐅᕝᕙᓘᓐᓃᑦ ᒪᓕᒐᓕᐅᖅᑎᐅᑉ ᐃᓚᔮᖓ ᓇᓕᐊᑐᐃᓐᓇᖅ, ᖃᓄᐃᑦᑐᑐᐃᓐᓇᕐᓂᒃ ᑐᓐᓂᖅᑯᓯᐊᓂᒃ, ᐃᒻᒥᒧᑦ ᐃᑲᔫᑕᐅᔪᓐᓇᖅᑐᓂᒃ ᐅᕝᕙᓘᓐᓃᑦ ᐊᑭᓕᐅᑎᓂᒃ ᐱᔭᕆᐊᖃᓐᖏᓚᖅ, ᐊᒃᑐᐃᓂᖃᓪᓚᕆᓐᖏᒃᑲᓗᐊᖅᐸᑦ ᒪᓕᒐᓕᐅᖅᑎᐅᑉ ᐃᖅᑲᓇᐃᔮᖓᓄᑦ.  ᐃᓚᖏᑦ ᐃᓚᓕᐅᔾᔭᐅᓯᒪᓐᖏᑦᑐᑦ (ᑕᑯᒋᐊᕐᓗᒍ ᓈᓴᐅᑎᓕᒃ 13 ᓱᓕᑦᑎᐊᕐᓂᕐᒧᑦ ᐱᖁᔭᕐᔪᐊᑉ ᐃᓗᐊᓃᑦᑐᖅ.  ᐃᓕᖃᓯᐅᔾᔭᐅᔭᕆᐊᖃᓐᖏᑦᑐᑦ, ᓲᕐᓗ ᑐᓐᓂᖅᑯᓯᐊᑦ ᐅᕝᕙᓘᓐᓃᑦ ᐃᒻᒥᒧᑦ ᐃᑲᔫᓯᐊᖑᔪᓐᓇᖅᑐᑦ ᒪᓕᒐᓕᐅᖅᑎᒧᑦ ᐱᔭᐅᔪᓐᓇᖅᑐᑦ ᐱᔾᔪᑎᒋᓪᓗᒋᑦ, ᒪᓕᒐᓕᐅᖅᑎ ᐱᖁᔭᕐᔪᐊᖅᑎᒍᑦ, ᑐᓐᓂᖅᑯᓯᐊᓚᐅᖅᑎᓪᓗᒍ ᐃᑲᔫᓯᐊᓚᐅᖅᑎᓪᓗᒍᓘᓐᓃᑦ ᐅᓪᓗᑦ 30 ᑐᖔᓂ, ᓇᓗᓇᐃᔭᐃᔾᔪᑎᓂᒃ ᑕᑕᑎᕆᔭᕆᐊᖃᕐᒥᔪᖅ ᓱᓕᑦᑎᐊᕐᓂᕐᒧᑦ ᑲᒥᓴᓇᐅᑉ ᑕᑕᑎᕈᑏᑦ ᐊᑐᖁᔭᖏᑦ ᐊᑐᕐᓗᓂᒋᑦ, ᓇᓗᓇᐃᔭᐃᑦᑎᐊᕐᓗᓂᓗ ᖃᓄᐃᑦᑑᓚᐅᕐᒪᖔᖓ ᑐᓂᖅᑯᓯᐊᖓ ᐃᑲᔫᓯᐊᖅᑖᖓᓘᓐᓃᑦ, ᓇᑭᓐᖔᕐᒪᖔᖓ, ᐊᒻᒪ ᑭᓱᒥᒃ ᐱᔾᔪᑎᖃᖅᖢᓂ ᒪᓕᒐᓕᐅᖅᑎ ᑐᓂᔭᐅᓚᐅᕐᒪᖔᖓ ᐊᒻᒪ ᓇᖕᒥᓂᖅ ᑎᒍᓚᐅᕐᒪᖔᒍ.

ᑕᖅᑲᐅᓐᖓᖅᑐᒃᓴᓂᒃ ᓇᓗᓇᐃᔭᐃᔾᔪᑎᓂᒃ ᑕᑕᑎᕆᕙᒃᐳᑦ ᓴᖅᑭᔮᑦᑎᐊᕆᐊᖃᕐᓂᕐᒥᒃ ᑐᕌᒐᖃᕐᓂᖓ ᐱᔾᔪᑎᒋᓪᓗᒍ, ᐊᒻᒪ ᐃᑲᔫᑕᐅᖃᑦᑕᖅᖢᑎᒃ ᒪᓕᒐᓕᐅᖅᑎ ᑕᖅᑲᒃᑯᓄᖓ ᐱᔨᑦᑎᖅᑎᐅᑎᓪᓗᒍ ᐊᒻᒪ ᕿᒥᕐᕈᓇᒃᑕᐅᕐᔪᐊᕋᓗᐊᕈᓂ ᓱᓕᔪᕐᓇᐅᑎᓂᒃ ᑐᓐᖓᕕᖃᕈᓐᓇᕐᓂᖓ ᐱᔾᔪᑕᐅᓪᓗᓂ.

ᑖᒃᑯᐊ ᑕᖅᑲᐅᓐᖓᖅᑐᒃᓴᑦ ᓇᓗᓇᐃᔭᐃᔾᔪᑏᑦ ᐱᖓᓱᐃᓕᖓᔪᑦ ᑕᑕᑎᖅᑕᐅᖃᑦᑕᖅᐳᑦ ᒪᓕᒐᓕᐅᕐᕕᐅᑉ ᑎᑎᕋᖅᑎᐊᑕ ᑎᑎᕋᕐᕕᖓᒍᑦ.  ᑕᑕᑎᖅᑕᐅᓯᒪᔪᑦ ᐊᔾᔨᖏᑦ ᕿᒥᕐᕈᓇᒃᑕᐅᔪᓐᓇᖅᑐᑦ ᐅᓇ ᐊᖅᑯᑎᒋᓗᒍ:

ᒪᓕᒐᓕᐅᕐᕕᖕᒥ ᑎᑎᕋᖅᑎᐅᑉ ᑎᑎᕋᕐᕕᐊ
ᑎᑎᖅᑲᒃᑯᕕᐊ 1200
ᐃᖃᓗᐃᑦ, ᓄᓇᕗᑦ
X0A 0H0
ᐅᖄᓚᐅᑖ: (867) 975-5000
ᓱᒃᑲᔪᒃᑰᕈᑖ: (867) 975-5190

ᑕᖅᑲᐅᓐᖓᖅᑐᒃᓴᑦ ᓇᓗᓇᐃᔭᐃᔾᔪᑎᖏᑦ ᑕᑕᑎᕆᐊᓖᑦ ᐃᓗᓪᓕᖅᓱᖅᓯᒪᓐᖏᑦᑐᑦ ᓱᕐᕋᔾᔭᐃᖅᓯᒪᔪᑦ ᑕᕝᕘᓇ ᐃᑭᐊᖅᑭᕕᒃᑯᑦ ᐱᔭᐅᔪᓐᓇᖅᑐᑦ.

AttachmentSize
ᐊᕐᕌᒍᑕᒫᑦ ᑕᖅᑲᒃᑯᓄᖓ ᓴᖅᑭᑦᑎᔾᔪᑎᓄᑦ ᑎᑎᕋᕐᓯᒪᔪᑦ197.85 KB
ᐃᓚᒋᐊᕈᑎᑦ ᑕᖅᑲᒃᑯᓄᖓ ᓴᖅᑭᑦᑎᓂᕐᒧᑦ ᑎᑎᕋᕐᓯᒪᔪᓄᑦ118.35 KB
ᑕᖅᑲᒃᑯᓄᖓ ᓴᖅᑭᑦᑎᓂᕐᒧᑦ ᑎᑎᖅᑲᓂᒃ ᑐᓐᓂᖅᑯᓯᐊᕕᓂᕐᓄᑦ ᐊᒻᒪᓗ ᐃᒻᒥᒧᑦ ᐃᑲᔪᕈᑎᐅᔪᓂᒃ127.04 KB