2001-2002 (PDF)

ᒪᓕᒐᓕᐅᖅᑎᑦ ᓄᓇᕗᒥ

ᐊᕐᕌᒍᑕᒫᖅᓯᐅᑎᑦ ᐅᓂᒃᑳᑦ

ᐄᐳᕈ 1, 2001-ᒥᑦ ᑎᑭᓪᓗᒍ ᒫᑦᓯ 31, 2002

ᕌᐳᑦ ᓵᓐᐱᐅᕆ, P.C., Q.C.

ᐃᖕᒥᓄᑦ ᐊᒡᕕᐊᕈᑎᖃᖅᑕᐃᓕᒪᓂᕐᒧᑦ ᑲᒥᓯᓇ
ᐄᐳᕈ 1, 2001-ᒥᑦ ᔫᓐᓂ 30, 2001-ᒧᑦ

ᐃᓘᐃᑦᑑᑦᓯᐊᕐᓂᕐᒧᑦ ᑲᒥᓯᓇ
ᔪᓚᐃ 1, 2001-ᒥᑦ ᒫᑦᓯ 31, 2002-ᒧᑦ

ᒪᐃ 2002

ᑭᕙᓐ ᐅᐳᕋᐃᔭᓐᒧᑦ, ᒪᓕᒐᓕᐅᖅᑎ,
ᐅᖃᖅᑎ,
ᒪᓕᒐᓕᐅᖅᑎᑦ ᓄᓇᕗᒧᑦ
ᐃᖃᓗᐃᑦ, ᓄᓇᕗᑦ

ᑎᑎᖃᑦ ᐅᖃᖅᑎᒧᑦ:

ᖁᕕᐊᓱᒃᐳᖓ ᑐᓂᓯᔪᓐᓇᕋᒪ ᐊᕐᕌᒍᑕᒫᖅᓯᐅᑎᓂᒃ ᐅᓂᒃᑳᓕᐊᕆᓯᒪᔭᓐᓂᒃ ᑖᒃᑯᓄᖓ ᒪᓕᒐᓕᐅᖅᑎᒃᑯᓐᓄᑦ ᓄᓇᕗᒥ ᐱᓕᕆᐊᕆᓚᐅᖅᑕᒃᑲ ᐄᐳᕈ 1, 2001-ᒥᑦ ᑎᑭᓪᓗᒍ ᒫᑦᓯ 31, 2002-ᒧᑦ, ᐱᓕᕆᓚᐅᕐᓂᕋᓄᓪᓗ ᐃᖕᒥᓄᑦ ᐊᒡᕕᐊᕈᑎᖃᖅᑕᐃᓕᒪᑎᑎᓂᕐᒧᑦ ᑲᒥᓯᓇᐅᓪᓗᖓ ᐄᐳᕈ 1, ᔫᓂ 30, 2001-ᒧᑦ ᐊᒻᒪᓗ ᐃᓗᐃᑦᑑᑦᓯᐊᕐᓂᕐᒧᑦ ᑲᒥᓯᓇᐅᓪᓗᖓ ᔪᓚᐃ 1, 2001 ᑎᑭᓪᓗᒍ ᒫᑦᓯ 31, 2002-ᒧᑦ.

ᑎᑎᕋᖅᑐᖅ

ᕌᐳᑦ ᓯᑖᓐᐱᐅᕆ

E-mail: rstanbury@integritycom.nu.ca
607 Edgewater Cr., Burlington, ON L7T 3L8
Tollfree telephone from Nunavut: 1-888-398-2785
Fax/phone: 1-905-637-6576
www.integritycom.nu.ca

ᐊᕐᕌᒍᑕᒫᖅᓯᐅᑎᑦ ᐅᓂᒃᑳᑦ 2001-2002
ᐃᖕᒥᓄᑦ ᐊᒡᕕᐊᕈᑎᖃᖅᑕᐃᓕᒪᓂᕐᒧᑦ ᑲᒥᓯᓇ/ᐃᓗᐃᑦᑑᑦᓯᐊᕐᓂᕐᒧᑦ ᑲᒥᓯᓇ

ᖃᓄᖅ ᐱᒋᐊᖓᓚᐅᖅᓯᒪᓂᖓ

ᓄᓇᕗᑖᖅᓯᒪᓕᖅᑎᓪᓗᒋᑦ ᐄᐳᕈ 1, 1999-ᒥ, ᐃᖕᒥᓄᑦ ᐊᒡᕕᐊᕈᑎᖃᖅᑕᐃᓕᒪᓂᕐᒧᑦ ᒪᓕᒐᐃᑦ ᒪᓕᒐᓕᐅᖅᑎᓄᑦ ᑐᕌᖅᑐᑦ ᐱᔭᐅᓚᐅᖅᓯᒪᖕᒪᑕ ᓄᓇᑦᓯᐊᑉ ᒐᕙᒪᒃᑯᖏᓐᓂᑦ. ᒐᕙᒪᒃᑯᑦ ᒪᓕᒐᖓᑦ ᐃᓚᖓᓂ Part III ᒪᓕᒐᓕᐅᖅᑎᑦ ᐊᐅᓚᑦᓯᔩᓪᓗ ᒪᓕᒐᖓᓐᓂ (ᓄᓇᕗᒥ), ᐱᓕᕆᐊᕆᔭᐅᔪᖅ ᒪᓕᒐᖅ ᐃᖕᒥᓄᑦ ᐊᒡᕕᐊᕈᑎᖃᖅᑕᐃᓕᒪᓂᕐᒧᑦ ᑲᒥᓯᓇᒧᑦ, ᐃᖕᒥᒃᑰᓕᖓᓪᓗᓂ ᐱᓕᕆᖃᑦᑕᖅᖢᓂ ᒪᓕᒐᓕᐅᖅᑎᒃᑯᓐᓄᑦ.

ᑎᒃᑯᐊᖅᑕᐅᓯᒪᓕᖅᖢᖓ ᓄᓇᕗᑦ ᒪᓕᒐᓕᐅᖅᑎᒃᑯᖏᓐᓄᑦ ᓯᕗᓪᓕᖅᐹᖑᓪᓗᓂ ᐃᖕᒥᓄᑦ ᐊᒡᕕᐊᕈᑎᖃᖅᑕᐃᓕᒪᓂᕐᒧᑦ ᑲᒥᓯᓇᖑᖅᑎᑕᐅᓪᓗᖓ 2000 ᐱᒋᐊᓕᓵᖅᑎᓪᓗᒍ, ᕿᒥᕐᕈᖁᔭᐅᓚᐅᖅᐳᖓ ᒪᓕᒐᕐᓂᒃ ᐅᓂᒃᑳᓕᐅᖅᑕᐅᓯᒪᔪᓂᒡᓗ 1999-ᒥ ᓄᓇᑦᓯᐊᑉ ᒐᕙᒪᒃᑯᖏᑦᑕ ᒪᓕᒐᖏᓐᓂᒃ ᕿᒥᕐᕈᔨᐅᓚᐅᖅᑐᑦ ᐃᖕᒥᓄᑦ ᐊᒡᕕᐊᕈᑎᖃᖅᑕᐃᓕᒪᓂᕐᒧᑦ ᐅᓂᒃᑳᓕᐊᖑᓯᒪᔪᓂᒃ ᐊᓯᔾᔨᖅᑕᐅᖁᔭᐅᓪᓗᑎᒃ ᓄᓇᑦᓯᐊᒥ ᓄᓇᕗᖑᓕᖅᑐᒧᑦ ᑐᕌᖅᑎᑕᐅᓗᑎᒃ, ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᐃᓗᓕᖃᓕᖁᔭᐅᓪᓗᑎᒃ, ᓄᓇᕗᒥᐅᓪᓗ ᓇᖕᒥᓂᖅ ᑕᐃᒪᓐᓇ ᒪᓕᒐᒃᓴᓕᐅᒐᒃᓴᖏᓐᓂᒃ ᐋᖅᑭᒃᓱᐃᖁᔭᐅᓪᓗᖓ ᐃᓄᐃᑦ ᐃᓕᖁᓯᕆᖃᑦᑕᖅᑕᖏᑦ ᐊᑐᒐᖏᓪᓗ ᑲᓇᑕᒥ ᒐᕙᒪᐃᑦ ᑲᑎᑕᐅᖁᔭᐅᓯᒪᓪᓗᑎᒃ. ᑕᐃᒪᓐᓇ ᐅᓂᒃᑳᓕᐅᓚᐅᖅᐳᖓ, ᐃᓗᐃᑦᑑᑦᓯᐊᕐᓂᕐᒧᑦ ᐃᓕᖁᓯᖃᑦᓯᐊᕐᓂᕐᒧᓪᓗ ᒪᓕᒐᒃᓴᓂᒃ, ᑕᐃᒪᓐᓇ ᓄᑖᖑᓪᓗᓂ ᒪᓕᒐᕆᔭᐅᓂᐊᓕᖅᖢᓂ ᓄᓇᕗᒥ ᒪᓕᒐᖑᓚᐅᖅᓯᒪᓪᓗᓂ ᔪᓚᐃ 1, 2001-ᒥ, ᐃᓗᐃᑦᑑᑦᓯᐊᕐᓂᕐᒧᑦ ᑲᒥᓯᓇᖑᓚᐅᖅᓯᒪᓪᓗᖓ.

ᑖᒃᑯᐊ ᐅᓂᒃᑳᓕᐊᒃᑲ ᐱᒋᐊᕐᓂᖃᖅᑐᑦ 2001-2002-ᒥᓗ, ᐅᖃᐅᓯᖃᖅᐳᑦ ᐃᖕᒥᓄᑦ ᐊᒡᕕᐊᕈᑎᖃᖅᑕᐃᓕᒪᓂᕐᒧᑦ ᑲᒥᓯᓇᐅᑎᓪᓗᖓ ᐄᐳᕈ 1-ᒥᑦ ᔫᓂ 30, 2001-ᒧᑦ, ᐊᒻᒪᓗ ᐃᓗᐃᑦᑑᑦᓯᐊᕐᓂᕐᒧᑦ ᑲᒥᓯᓇᐅᓪᓗᖓ ᔪᓚᐃ 1, 2001-ᒥᑦ ᒫᑦᓯ 31, 2002-ᒧᑦ.

ᐃᖕᒥᓄᑦ ᐱᔾᔪᑎᖃᖅᖢᑎᒃ ᐅᓂᒃᑳᓕᐅᖅᑕᐅᓯᒪᖃᑦᑕᖅᑐᑦ

ᑲᑎᒪᔩᑦ ᒪᓕᒐᑎᒍᑦ ᑕᐃᒪᓐᓇ ᐃᖕᒥᓄᑦ ᐱᔾᔪᑎᖃᖅᑐᓂᒃ ᑎᑎᕋᖅᓯᒪᔪᓂᒃ ᕿᒥᕐᕈᓚᐅᕐᓗᑎᒃ ᐊᑎᓕᐅᕈᑎᖃᕆᐊᖃᖃᑦᑕᖅᐳᑦ ᒪᐃ 31, 2001-ᖑᓚᐅᖏᓐᓂᐊᓂ ᑕᐃᒪᐃᒋᐊᖃᓚᐅᖅᖢᑎᒃ ᐊᒻᒪᓗ ᐊᓪᓚᒃᑎ ᒪᓕᒐᓕᐅᖅᑎᒃᑯᓐᓄᑦ ᐅᖃᓚᐅᖅᖢᓂ ᐅᕙᓐᓄᑦ ᑕᒪᕐᒥᒃ ᐃᖕᒥᓄᑦ ᐱᔾᔪᑎᖃᖅᑐᓂᒃ ᕿᒥᕐᕈᓪᓗᑎᒃ ᐊᑎᓕᐅᕆᓚᐅᕐᓂᖏᓐᓄᑦ.

ᐱᓕᕆᐊᕆᓯᒪᔭᒃᑲ

ᑕᒪᒃᑯᐊ ᒪᓕᒐᑐᖃᐃᑦ ᓄᑖᖑᖅᑎᑕᐅᓚᐅᖅᐳᑦ. ᓄᓇᕗᒥ ᒪᓕᒐᓕᐅᖅᑎᑦ ᓄᑖᒥᒃ ᒪᓕᒐᓕᐅᕈᒪᓯᒪᓚᐅᕐᒪᑕ ᓯᕗᓪᓕᖅᐸᐅᑎᑎᖁᔨᓪᓗᑎᒃ ᐃᖕᒥᓄᑦ ᐱᔾᔪᑎᖃᖅᑐᓂᒃ, ᑕᐃᒪᓐᓇ ᒪᓕᒐᑦᓯᐊᕙᖃᕈᒪᓪᓗᑎᒃ ᖁᑦᓯᖕᓂᖅᐹᒃᑯᑦ ᐃᓗᐃᑦᑑᑦᓯᐊᕆᐊᕈᒪᓪᓗᑎᒃ ᓵᑕᐅᔪᒃᓴᐅᓂᖃᕈᒪᓪᓗᑎᒡᓗ. ᖁᕕᐊᓱᓚᐅᖅᐳᖓ ᐱᓕᕆᖃᑎᒋᔪᓐᓇᓚᐅᕋᒃᑭᑦ ᒪᓕᒐᓕᐅᖅᑎᑦ ᐊᒻᒪᓗ ᒐᕙᒪᒃᑯᑦ ᒪᓕᒐᕐᓂᒃ ᑎᑎᕋᖅᑎᖏᑦ ᐱᓕᕆᖃᑎᒋᓪᓗᒋᑦ ᒪᓕᒐᓕᕆᔨᒃᑯᓐᓂᒥᐅᑕᐃᑦ, ᐊᐅᓚᑦᓯᔨᒋᔭᐅᓪᓗᓂ ᒫᒃ ᓯᐸᑲᐅᔅᑭ ᐊᒻᒪᓗ ᕆᐊᑉ ᐋᒻᓱᕋᖕ, ᑕᐃᒪᓐᓇ ᒪᓕᒐᓕᐅᓚᐅᖅᖢᑕ ᐊᑐᖅᑕᐅᓂᐊᖅᑐᓂᒃ ᒪᓕᒐᓕᐅᖅᑎᓄᑦ ᓄᓇᕗᒥᐅᓄᑦ ᒐᕙᒪᖏᓐᓄᓪᓗ.

ᒪᐃ 24, 2001-ᒥ, ᑲᑎᒪᕐᔪᐊᖅᑎᓪᓗᒋᑦ “ᓯᕿᓂᖃᐃᓐᓇᓕᖅᑎᓪᓗᒍ” ᐃᖃᓗᒃᑐᑦᓯᐊᒥ, ᖃᐃᖁᔭᐅᓯᒪᓚᐅᕋᒪ ᒪᓕᒐᓕᐅᖅᑎᒃᑯᓐᓄᑦ ᐱᓕᕆᐊᖃᖅᑎᓪᓗᒋᑦ ᑲᔪᓯᑎᑦᓯᑎᓪᓗᒋᓪᓗ ᒪᓕᒐᕐᓂᒃ ᐊᑎᖃᖅᑎᑕᐅᓕᖅᖢᓂ ᐃᓗᐃᑦᑑᑦᓯᐊᕐᓂᕐᒧᑦ ᒪᓕᒐᖅ, S.Nu.2001,c.7. ᑕᒡᕙᓂ ᐱᓇᓱᐊᕈᓯᒥ ᑕᐃᑲᓂ ᑲᑎᒪᖃᑎᒋᖃᑦᑕᓚᐅᖅᐸᒃᑲ ᐊᑐᓂ ᒪᓕᒐᓕᐅᖅᑎᑦ ᐊᑕᐅᓯᐅᓈᖅᑎᑦᓯᒪᖃᑦᑕᖅᖢᑎᒃ ᕿᒥᕐᕈᖃᑎᒋᓪᓗᒋᑦ ᐃᖕᒥᓄᑦ ᑎᑎᖃᐅᑎᖏᓐᓂᒃ, ᐊᒻᒪᓗ ᐅᖃᓪᓚᖃᑎᒋᓪᓗᒋᑦ ᑐᓴᖅᑎᑦᓱᒋᑦ ᐱᕙᓪᓕᐊᔪᓕᕆᔨᒃᑯᑦ ᓄᑖᑉ ᒪᓕᒐᐅᑉ ᒥᒃᓵᓄᑦ.

ᐃᓗᐃᑦᑑᑦᓯᐊᕐᓂᕐᒧᑦ ᒪᓕᒐᖅ ᐃᓗᓕᖃᖅᐳᖅ ᐃᓄᐃᑦ ᐱᖅᑯᓯᑐᖃᖏᓐᓂᒃ ᐊᒻᒪᓗ ᑖᒃᑯᓂᖓ ᖃᓪᓗᓈᑦ ᒪᓕᒐᓕᐅᖅᑎᑦ ᐃᓕᖁᓯᑐᖃᕆᔭᖏᓐᓂᒃ ᐃᓗᓕᖃᕆᓪᓗᓂ. ᑕᒪᒃᑯᐊ ᐃᓗᓕᖏᑦ ᑐᑭᓯᓇᑦᓯᐊᖅᖢᑎᒃ, ᐱᔭᕆᐊᑐᖏᓐᓂᖅᓴᐅᓪᓗᑎᒃ ᐱᓕᕆᐊᕆᔭᐅᑲᐅᑎᒋᔪᓐᓇᖅᖢᑎᒡᓗ. ᒪᑐᐃᖔᕈᑎᖃᑦᓯᐊᕐᓂᕐᒧᓪᓗ ᓵᑕᐅᔪᓐᓇᑦᓯᐊᕐᓂᕐᒧᓪᓗ ᐊᑐᒐᒃᓴᐅᓪᓗᓂ. ᑕᒪᒃᑯᐊ ᓵᑕᐅᒍᑕᐅᑐᐃᓐᓇᕆᐊᓖᑦ ᐋᖅᑭᒃᑕᐅᑲᐅᑎᒋᔪᓐᓇᕋᔭᕐᓂᖏᓐᓄᑦ ᓴᖅᑭᔮᖅᑐᖃᖅᖢᓂ ᐊᒻᒪᓗ ᖃᓄᐃᓕᐅᖅᑕᐅᔪᓐᓇᕋᔭᕐᓂᖏᑦ ᑕᒪᒃᑯᐊ ᒪᓕᒐᕐᓂᒃ ᒪᓕᖏᑦᑐᑦ. ᑕᐃᒪᓐᓇ ᑎᓕᐅᕆᓪᓗᓂ ᑲᑎᒪᔨᑦ ᐃᑲᔪᖅᑕᐅᒍᑎᒃᓴᒥᖕᓂᒃ ᐊᐱᖅᓱᕈᓐᓇᖅᖢᑎᒃ ᐃᓗᐃᑦᑑᑦᓯᐊᕐᓂᕐᒧᑦ ᑲᒥᓯᓇᒥᑦ, ᐱᓕᕆᔨᐅᑎᓪᓗᒍ ᐃᖕᒥᒃᑰᓕᖓᓪᓗᓂ ᒪᓕᒐᓕᐅᖅᑎᒃᑯᓐᓄᑦ, ᐊᒻᒪᓗ ᐅᖃᓪᓚᖃᑎᒋᔭᐅᔪᓐᓇᕆᓪᓗᑎᒃ ᐃᓐᓇᑐᖃᐃᑦ ᐊᑲᐅᖏᓕᐅᕈᑎᖃᓕᖅᐸᑦ ᑲᑎᒪᔨᐅᖃᑕᐅᔪᖅ ᖃᓄᑐᐃᓐᓇᖅ ᐃᖕᒥᓄᑦ ᐱᔾᔪᑎᖃᖅᑐᓂᒃ. ᐱᔪᓐᓇᕐᓂᖃᖅᑎᑕᐅᓪᓗᑎᒃ ᐱᓕᕆᐊᒃᓴᖃᖅᑎᑕᐅᓪᓗᑎᒡᓗ ᓂᕈᐊᖅᑕᐅᓯᒪᔪᑦ ᐱᓕᕆᖃᑎᒥᓄᑦ ᐋᖅᑭᒃᓱᖅᑕᐅᔪᓐᓇᖅᖢᑎᒃ ᓄᓇᓕᖕᓂᒥᐅᓄᓪᓗ. ᒪᓕᒋᐊᖃᕐᓂᖏᓐᓄᑦ ᐊᑐᐊᒐᕐᓂᒃ ᐅᖃᖅᓯᒪᓪᓗᓂ ᐊᒻᒪᓗ ᑲᑎᓪᓗᒍ ᐱᔾᔪᑎᖃᕆᓪᓗᓂ ᐃᓗᐃᑦᑑᑦᓯᐊᕐᓂᕐᒧᑦ ᐃᓕᖁᓯᓂᒡᓗ ᒪᓕᒡᓗᑎᒃ ᓂᕈᐊᖅᑕᐅᓯᒪᔪᑦ ᐱᓕᕆᒋᐊᖃᕐᓂᖏᓐᓄᑦ.

ᐱᓇᓱᐊᕈᓯᒥ ᐊᒃᑐᐱᕆ, 2001-ᖑᑎᓪᓗᒍ, ᐃᖃᓗᖕᓂ ᑲᑎᒪᔩᑦ ᐅᖃᓪᓚᖃᑎᒋᖃᑦᑕᓚᐅᕆᕙᒃᑲ ᐊᒻᒪᓗ ᒪᓕᒐᕐᓂᒃ ᖃᐅᔨᒪᑎᖓᑦ ᐅᖃᓪᓚᖃᑎᒋᖃᑦᑕᖅᖢᒍ, ᐊᓪᓚᒃᑎᖓᓪᓗ ᒪᓕᒐᓕᐅᖅᑎᑦ ᐱᓕᕆᔨᖏᓪᓗ ᒪᓕᒐᓕᐅᖅᑎᒃᑯᓐᓂ ᐸᕐᓇᒍᑎᖃᖅᖢᖓ ᑕᒪᒃᑯᓂᖓ ᐃᖕᒥᓄᑦ ᑲᑎᒪᔨᑦ ᐱᔾᔪᑎᖃᖅᑐᓂᒃ ᑕᑕᑎᕆᓪᓗᑕ, ᑐᑭᓯᐅᒪᒍᑎᒃᓴᖏᓐᓂᒡᓗ ᐊᒻᒪᓗ ᖃᕆᑕᐅᔭᒃᑯᑦ ᑐᑭᓯᒋᐊᕈᑎᒃᓴᖏᓐᓂᒃ. ᑲᑎᒪᖃᑎᒋᓚᐅᖅᖢᒍᓗ ᒥᔅ ᐄᕙ ᐋᕆᐊᒃ, ᐅᖃᐅᓯᑦ ᐃᓕᑕᕆᔭᐅᓯᒪᓂᖏᓐᓄᑦ ᑲᒥᓯᓇ, ᐊᑐᖅᑎᓚᐅᖅᖢᓂᖓᓗ ᐊᓪᓚᕕᒥᓂᒃ ᑲᑎᒪᖃᑎᖃᖃᑦᑕᖅᑎᓪᓗᖓ ᑲᑎᒪᔨᓂᒃ ᐊᓯᖏᓐᓂᒡᓗ ᒪᓕᒐᓕᐅᖅᑎᒃᑯᑦ ᐊᓪᓚᕕᖓᓃᒋᐊᖃᖏᓐᓂᕋᓄᑦ. 1999-ᒥ ᓄᓇᑦᓯᐊᒥ ᐃᖕᒥᓄᑦ ᐊᒡᕕᐊᕈᑎᖃᖅᑕᐃᓕᒪᓂᕐᒧᑦ ᒪᓕᒐᕐᓂᒃ ᕿᒥᕐᕈᔪᑦ ᐊᑐᓕᖁᔨᒍᑎᖃᓚᐅᖅᓯᒪᖕᒪᑕ ᑭᒃᑯᑐᐃᓐᓇᕐᓄᑦ ᐃᓯᖅᑕᐅᔪᓐᓇᖅᑐᒥᒃ ᐱᓕᕆᕕᖃᖁᔭᐅᓚᐅᕋᑦᑕ. ᑕᐃᒪᓐᓇ ᑮᓇᐅᔭᑐᖁᖏᑦᖢᒍ ᐊᓪᓚᕕᒃ ᐅᖃᐅᓯᑦ ᐃᓕᑕᕆᔭᐅᓯᒪᓂᖏᓐᓄᑦ ᑲᒥᓯᓇᐅᑉ ᐊᓪᓚᕕᖓ ᐊᑐᕈᓐᓇᑦᓯᐊᓚᐅᖅᐸᕋ.

ᐊᕐᕌᒍᓕᒫᖑᑎᓪᓗᒍ ᑲᑎᒪᔨᑦ ᐱᒍᒪᔭᖏᓐᓂᒃ ᐱᓕᕆᐊᖃᖅᑎᑕᐅᓚᐅᖅᐳᖓ ᓇᓗᓕᖅᓯᒪᓕᕌᖓᑕ, ᑲᑎᖃᑎᒋᖃᑦᑕᖅᖢᒋᑦ ᐊᑐᓂ ᐊᒻᒪᓗ ᑲᑎᒪᓐᓇᐅᑎᓪᓗᒍ ᐅᖃᓪᓚᖃᑎᒋᕙᒃᓗᒋᑦ ᖃᕆᑕᐅᔭᒃᑯᓪᓗ ᐅᖄᓚᐅᑎᒃᑯᓪᓗ ᐊᒻᒪᓗ ᐱᓕᕆᐊᖃᖃᑦᑕᓚᐅᖅᖢᖓ ᐱᕙᓪᓕᐊᔪᓕᕆᔨᒃᑯᑦ ᑐᓴᕈᒪᔭᖏᓐᓂᒃ ᑭᒃᑯᑐᐃᓐᓇᐃᓪᓗ ᑐᓴᕈᒪᔭᖏᓐᓂᒃ. ᐱᓕᕆᖃᑎᖃᓚᐅᖅᖢᖓᓗ ᒥᓂᔅᑕᐃᑦ ᐱᓕᕆᔨᖏᓐᓂᒃ ᑕᐃᒪᓐᓇ ᐃᒃᐱᒋᔭᖏᓐᓂᒃ ᒪᓕᒋᐊᖃᕐᓂᖏᓐᓄᑦ ᒥᓂᔅᑕᐃᑦ ᒥᓂᔅᑕᐅᓂᖏᓐᓂ ᖃᓄᐃᓕᐅᕆᐊᖃᕈᑎᖏᓐᓂᒃ. ᒪᓕᒐᓕᐅᖅᑎᓄᑦ ᑭᓯᐊᓂ ᐱᓕᕆᐊᖃᕈᓐᓇᖅᖢᖓ ᒪᓕᒐᑦ ᒪᓕᒃᖢᒋᑦ, ᑕᒪᒃᑯᐊᓗ ᐃᖅᑲᓇᐃᔭᖅᑎᖏᑦ ᒪᓕᒐᓕᐅᖅᑎᑦ ᖃᐅᔨᒍᒪᔭᖏᓐᓂᒃ ᐱᓕᕆᐊᖃᖃᑦᑕᖅᓯᒪᓪᓗᖓ.

ᐃᓚᖏᓐᓂ ᑲᓇᑕᒥ ᒐᕙᒪᒋᔭᐅᔪᓂ, ᑕᒪᒃᑯᐊ ᒥᓂᔅᑕᐃᑦ ᐊᖓᔪᖃᐅᑎᒐᓚᖏᑦ ᐃᖅᑲᓇᐃᔭᖅᑎᖏᑦ ᐊᒻᒪᓗ ᐊᓯᖏᑦ ᐊᖓᔪᖃᐅᑕᐅᓂᕐᒧᑦ ᐱᓕᕆᐊᖃᖅᑐᑦ ᒐᕙᒪᒃᑯᓐᓂ ᑕᐃᒪᓐᓇ ᓂᕈᐊᖅᑕᐅᓯᒪᔪᑦ ᐊᑐᕆᐊᖃᖅᑕᖏᓐᓂᒃ ᐊᑐᕆᐊᖃᖁᔭᐅᑎᑕᐅᖕᒥᖕᒪᑕ. ᓄᓇᑦᓯᐊᒥ ᐃᖕᒥᓄᑦ ᐊᒡᕕᐊᕈᑎᖃᖅᑕᐃᓕᒪᓂᕐᒧᑦ ᕿᒥᕐᕈᔨᑦ ᐊᑐᓕᖁᔨᒍᑎᖃᓚᐅᖅᓯᒪᖕᒪᑕ “ᒥᓂᔅᑕᐅᑉ ᑐᖏᓕᖓ ᐊᒻᒪᓗ “ᐊᖓᔪᖃᐅᑕᐅᔪᑦ” ᑕᐃᒪᓐᓇ ᒥᓂᔅᑕᑎᑐᑦ ᐱᓕᕆᐊᖏᑦ ᐊᒡᕕᐊᕈᑎᖃᖅᑕᐃᓕᒋᐊᖃᕐᓂᖏᓐᓄᑦ ᒪᓕᒋᐊᖃᖅᖢᑎᒡᓗ ᒪᓕᒃᑕᐅᖁᔭᐅᔪᓂᒃ. ᐊᔾᔨᐅᖏᑦᑐᒃᑯᑦ ᐅᓂᒃᑳᓐᓂ ᐊᑐᓕᖁᔨᒍᑎᖃᓚᐅᖅᐳᖓ, ᐊᖏᕈᑕᐅᓚᐅᖅᖢᓂᓗ ᑕᒪᒃᑯᐊ ᓂᕈᐊᖅᑕᐅᓯᒪᔪᑦ ᐱᓕᕆᐊᕆᒋᐊᖃᖅᐸᒃᑲ. ᑭᓯᐊᓂ, ᑲᑎᒪᔩᑦ ᐃᓱᒪᓕᐅᕈᑎᖃᕈᒪᑐᐃᓐᓇᕆᐊᖃᖅᐳᑦ ᑕᒪᒃᑯᓄᖓ ᐊᖓᔪᖃᐅᑎᓄᑦ ᒐᕙᒪᒃᑯᓐᓂᑦ ᒪᓕᒐᖅᑕᖃᕆᐊᖃᕐᓂᖓᓄᑦᑕᐅᖅ ᑎᒃᑯᐊᖅᑕᐅᓯᒪᔪᓄᑦ ᒐᕙᒪᒃᑯᑦ ᐃᓗᐃᑦᑑᑦᓯᐊᕈᓐᓇᖁᓪᓗᒋᑦ ᒪᑐᐃᖔᑦᓯᐊᕈᓐᓇᖁᓪᓗᒋᓪᓗ ᐱᓕᕆᐊᕆᔭᒥᖕᓂᒃ ᐃᖕᒥᓄᑦ ᐊᒡᕕᐊᕈᑎᖃᖅᑕᐃᓕᖁᓪᓗᒋᑦ.

ᑕᐃᒪᓐᓇ ᐱᕙᓪᓕᐊᔪᓂᒃ ᐊᖑᒻᒪᑎᔪᓐᓇᕈᒪᓪᓗᑕ, ᑖᒃᑯᐊ ᓄᓇᑦᓯᐊᒥ, ᖃᓪᓗᓈᑦ ᓄᓇᖓᓐᓂᓗ ᐊᕕᒃᑐᖅᓯᒪᐅᖅᑐᓂ ᑲᓇᑕᐅᑉ ᒐᕙᒪᒃᑯᖏᓐᓂᖔᖅᑐᓪᓗ ᐅᖃᓪᓚᖃᑎᒋᖃᑦᑕᖅᐸᒃᑲ ᑖᒃᑯᐊ ᐃᖕᒥᓄᑦ ᐊᒡᕕᐊᕈᑎᖃᖅᑕᐃᓕᒪᓂᕐᒧᑦ ᑲᒥᓯᓇᐅᔪᑦ ᐅᖃᓪᓚᖃᑎᒋᖃᖅᑕᖅᖢᒋᑦ, ᐱᓗᐊᖅᑐᒥᒃ ᑲᑎᒪᕐᔪᐊᕆᐊᖅᑐᖃᑕᐅᓯᒪᓪᓗᖓ ᑕᒪᓐᓇ ᐱᔾᔪᑎᒋᓪᓗᒍ ᓯᑉᑕᐱᕆᐅᓚᐅᖅᑐᒥ ᑐᕌᓐᑐᒥ.

ᐊᒻᒪᓗ ᐊᕐᕌᓂᐅᓚᐅᖅᑐᒥ ᐱᓕᕆᖃᑎᒋᑦᓯᐊᖅᓯᒪᓪᓗᒋᑦ ᑲᑎᒪᔨᑦ ᒪᓕᒐᓕᐅᖅᑎᒃᑯᓐᓂ, ᒪᓕᒐᕐᓂᒃ ᖃᐅᔨᒪᑎᖓᓪᓗ, ᐊᓪᓚᒃᑎᖓᓪᓗ ᒪᓕᒐᓕᐅᖅᑎᒃᑯᑦ ᐱᓕᕆᔨᖏᑦᑕᓗ, ᐃᑲᔪᖅᓯᒪᓪᓗᑎᒃ ᐋᖅᑭᐅᒪᑦᓯᐊᖅᑐᒃᑯᑦ ᐃᓗᐃᑦᑑᑦᓯᐊᕐᓂᕐᒧᑦ ᐃᓕᖁᓯᓂᒡᓗ ᐃᓄᐃᑦ ᒪᓕᒃᖢᑕ ᐱᓕᕆᑦᓯᐊᕈᓐᓇᖁᓪᓗᒋᑦ ᒐᕙᒪᒋᔭᐅᔪᑦ ᓄᓇᕗᒥ.

AttachmentSize
2001-2002 (PDF) 520.85 KB