2002-2003 (PDF)

ᓄᓇᕗᒻᒥ ᐃᓗᐃᑦᑑᑦᑎᐊᕐᓂᕐᒧᑦ ᑲᒥᓴᓇ

 

 ᐊᕐᕌᒍᑕᒫᖅᓯᐅᑏᑦ ᐅᓂᒃᑳᑦ

 

ᐊᐃᕐᕆᓕ 1, 2002-ᒥᑦ ᒫᔾᔨ 31, 2003-ᒧᑦ ᑎᑭᑦᑐᑦ

 

ᕌᐳᑦ ᔅᑖᓐᐱᐅᕆ, P.C., Q.C.

  

ᐃᓗᐃᑦᑑᑦᑎᐊᕐᓂᕐᒧᑦ ᑲᒥᓴᓇ

 

ᒪᐃ 31, 2003 

ᑭᐊᕙᓐ ᐅᑉᕋᐃᔭᓐᒧᑦ, ᒪᓕᒐᓕᐅᖅᑎ

ᓄᓇᕗᒻᒥ ᒪᓕᒐᓕᐅᕐᕕᖕᒧᑦ ᐅᖃᖅᑎ

ᐃᖃᓗᖕᓂ, ᓄᓇᕗᒻᒥ

ᐅᖃᖅᑎᒧᑦ: 

ᐃᓗᐃᑦᑑᑦᑎᐊᕐᓂᕐᒧᑦ ᐱᖁᔭᕐᔪᐊᑦ ᐃᓚᖓ ᓈᓴᐅᑎᓕᒃ 57 ᒪᓕᒡᓗᒍ, ᐊᒃᓱᐊᓗᒃ ᐅᐱᑦᑐᖓ ᐊᕐᕌᒍᑕᒫᖅᓯᐅᑎᓂᒃ ᐅᓂᒃᑳᓂᒃ ᓄᓇᕗᑦ ᒪᓕᒐᓕᐅᕐᕕᖓᓐᓄᑦ ᑐᓐᓂᖅᑯᑎᖃᕈᓐᓇᕋᒪ ᑮᓇᐅᔭᓕᕆᓐᓇᐅ ᐊᕐᕌᒍᐊᓄᑦ ᐊᐃᕐᕆᓕ 1, 2002-ᒥᑦ ᒫᔾᔨ 31, 2003-ᒧᑦ ᐊᑐᖅᑐᓂᒃ. 

ᑎᑎᕋᖅᑐᖅ,

ᕌᐳᑦ ᔅᑖᓐᐱᐅᕆ

 

E-mail: rstanbury@assembly.nu.ca

607 Edgewater Cr., Burlington, ON  L7T 3L8

Tollfree telephone from Nunavut:  1-888-398-2785

Fax/phone: 1-905-637-6576

www.integritycom.nu.ca

 

ᐊᕐᕌᒍᑕᒫᖅᓯᐅᑏᑦ ᐅᓂᒃᑳᑦ ᐊᑐᖅᑐᑦ 2002-2003

ᐃᓗᐃᑦᑑᑦᑎᐊᕐᓂᕐᒧᑦ ᑲᒥᓴᓇ

 
ᐊᓪᓚᕕᖓ 

ᐃᓗᐃᑦᑑᑦᑎᐊᕐᓂᕐᒧᑦ ᑲᒥᓴᓇ ᐃᒻᒥᒃᑰᖅᖢᓂ, ᒐᕙᒪᒃᑯᓐᓄᑦ ᐊᒃᑐᐊᓂᖃᓐᖏᖢᓂ ᒪᓕᒐᓕᐅᕐᕕᖕᒧᑦ ᓄᓇᕗᒻᒥ ᑲᒪᔨᒋᔭᐅᕗᖅ.  ᐊᓪᓚᕕᒃ ᓴᖅᑭᑕᐅᓚᐅᖅᓯᒪᔪᖅ ᐊᑐᖅᑕᐅᓪᓗᓂ ᐃᓗᐃᑦᑑᑦᑎᐊᕐᓂᕐᒧᑦ ᐱᖁᔭᕐᔪᐊᖅ, ᑖᓐᓇ ᐊᑐᓕᖅᑎᑕᐅᓚᐅᖅᓯᒪᖕᒪᑦ ᔪᓚᐃ 1, 2001-ᖑᑎᓪᓗᒍ, ᐲᖅᑕᐅᖔᖅᖢᓂ ᐃᒻᒥᒧᑦ ᐊᒡᕕᐊᕈᑎᖃᕐᓂᕐᒧᑦ ᐱᖁᔭᕐᔪᐊᖅ ᐊᑎᓚᐅᖅᓯᒪᔭᕗᑦ ᓄᓇᑦᓯᐊᕐᒥᐅᓂᑦ, ᑖᓐᓇ ᐊᑐᓕᖅᑎᑕᐅᑦᓴᐅᑎᒋᓚᐅᖅᓯᒪᖕᒪᑦ ᓄᓇᕗᓐᖑᖅᑎᑕᐅᒐᑦᑕ ᐊᐃᕐᕆᓕ 1, 1999-ᒥ. 

ᐃᒻᒥᒧᑦ ᐊᒡᕕᐊᕈᑎᖃᕐᓂᕐᒧᑦ ᑲᒥᓴᓇᓐᖑᖅᑎᑕᐅᓚᐅᖅᓯᒪᔪᖓ ᐱᖁᔭᕐᔪᐊᑐᖃᐃᑦ ᐊᑐᖅᖢᒋᑦ, ᑕᐃᒪᓐᖓᓂᑦ ᓄᑖᑦ ᐱᖁᔭᕐᔪᐊᑦ ᐊᑐᓕᖅᑎᑕᐅᖕᒪᑕ ᐃᓗᐃᑦᑑᑦᑎᐊᕐᓂᕐᒧᑦ ᑲᒥᓴᓇᓐᖑᖅᖢᖓ.  ᐅᑯᐊ ᐊᕐᕌᒍᑕᒫᖅᓯᐅᑏᑦ ᐅᓂᒃᑳᑦ ᐅᓂᒃᑲᐅᓯᓖᑦ ᐃᓗᐃᒃᑲᒥᒃ ᐊᕐᕌᒍᒥᒃ ᐃᓕᓯᒪᓕᖅᖢᖓ ᑕᐃᒎᓯᕋ ᐊᓯᔾᔨᖅᑕᐅᓚᐅᖅᑎᓪᓗᒍ, ᐊᒻᒪᓗ ᑕᒪᒃᑮᒃ ᐃᓕᓯᒪᕝᕕᒃᑲᒃ ᑲᑎᓪᓗᒋᑦ ᓯᑕᒪᓄᑦ ᐊᕐᕌᒍᓄᑦ ᑕᐃᒪᐃᑦᑐᓕᕆᓯᒪᓕᖅᑐᖓ. 

ᐃᓗᐃᑦᑑᑦᑎᐊᕐᓂᕐᒧᑦ ᐱᖁᔭᕐᔪᐊᖅ ᒪᓕᒐᓕᐅᕐᕕᖕᒧᑦ ᒪᓕᒐᓕᐅᖅᑎᓂᒃ ᐊᖏᖅᑎᑦᑎᓯᒪᕗᖅ ᑕᖅᑲᒃᑯᓂᖓ ᓯᕗᓪᓕᐅᔾᔨᓯᒪᓂᐊᖅᓯᒪᓪᓗᑎᒃ ᐃᒻᒥᒧᑦ ᑐᕌᖓᔪᑦ ᑐᒡᓕᐅᑎᓪᓗᓂᒋᑦ.  ᑖᓐᓇ ᐊᑐᖅᑕᐅᓪᓗᓂ ᒪᓕᒐᐃᑦ ᐊᒻᒪᓗ ᐅᓂᒃᑲᐅᓯᐅᔭᕆᐊᓖᑦ ᒪᓕᒐᓕᐅᖅᑎᓕᕆᔪᑦ ᐃᖅᑲᓇᐃᔭᑦᑎᐊᕆᐊᖃᕐᓂᖏᓐᓄᑦ ᐋᖅᑭᒃᓯᒪᕗᑦ.  ᐃᓗᐃᑦᑑᑦᑎᐊᕐᓂᕐᒧᑦ ᑲᒥᓴᓇ ᖃᐅᔨᒪᔨᑕᕆᔭᐅᖃᑦᑕᖅᐳᖅ ᒪᓕᒐᓕᐅᖅᑎᓄᑦ, ᐊᒻᒪᓗ ᐱᔪᒪᒍᓂ, ᕿᒥᕐᕈᓇᒃᑎᐅᓪᓗᓂ ᐃᓗᐃᑦᑑᑦᑎᐊᕐᓂᕐᒧᑦ ᐱᖁᔭᕐᔪᐊᖅ ᒪᓕᒃᑕᐅᒐᓗᐊᕐᒪᖔᑦ ᒪᓕᒐᓕᐅᖅᑎᓄᑦ ᐊᒻᒪᓗ ᖃᓄᐃᓕᒋᐊᕈᑎᒃᓴᒃᑲᓐᓂᕐᓂᒃ ᐊᑐᓕᖁᔭᓕᐅᖅᑎᐅᓪᓗᓂ ᒪᓕᒐᓕᐅᕐᕕᖕᒧᑦ.  

ᐱᔪᓐᓇᕐᓂᒃᑲᓐᓂᖓᑕ ᐃᓗᓕᖏᑦ  

ᓄᓇᕗᒻᒥ ᓂᕈᐊᖅᓯᓕᕆᓂᕐᒧᑦ ᐱᖁᔭᕐᔪᐊᖅ, ᐊᑐᓕᖅᑎᑕᐅᓚᐅᖅᓯᒪᕗᖅ ᑕᒪᑐᒪᓂ ᐊᕐᕌᒍᑦᑎᓐᓂ, ᐊᒻᒪᓗ ᐃᓗᐃᑦᑑᑦᑎᐊᕐᓂᕐᒧᑦ ᑲᒥᓴᓇᒥᒃ ᐱᔪᓐᓇᕐᓂᖅᑖᖅᑎᑦᑎᓯᒪᕗᖅ ᐊᖏᖃᑎᒌᖕᓂᒃᑰᖃᑎᖃᕈᓐᓇᕐᓂᕐᒥᒃ, ᐊᓯᐊᒎᖔᕈᑕᐅᔪᓐᓇᖅᖢᓂ ᑖᓐᓇ ᐸᓯᑦᑎᓐᖏᖔᕐᓗᓂ, ᑭᓇᑐᐃᓐᓇᕐᒥᒃ ᐃᓄᖕᒥᒃ ᓯᖁᒥᑦᑎᓇᓱᒋᔭᐅᔪᒥᒃ ᐱᖁᔭᕐᔪᐊᑦ ᐃᓗᓕᖏᓐᓃᑦᑐᓂᒃ. 

ᓴᖅᑭᑦᑎᓂᕐᒧᑦ ᐅᖃᐅᓯᕆᔭᐅᔪᑦ 

ᐃᓗᐃᑦᑑᑦᑎᐊᕐᓂᕐᒧᑦ ᐱᖁᔭᕐᔪᐊᖅ ᒪᓕᒐᓕᐅᖅᑎᓂᒃ ᐊᑐᓂ ᐊᖏᖅᑎᑦᑎᕗᖅ ᓴᖅᑭᑦᑎᖃᑦᑕᕐᓂᐊᖅᑎᑕᐅᓪᓗᑎᒃ, ᐅᓪᓗᖓᓂ ᐋᖅᑭᒃᑕᐅᓯᒪᔪᒥ ᐃᓗᐃᑦᑑᑦᑎᐊᕐᓂᕐᒧᑦ ᑲᒥᓴᓇᒧᑦ, ᐊᕐᕌᒍᑕᒫᖅᓯᐅᑎᓂᒃ ᐅᓂᒃᑳᓂᒃ ᑕᖅᑲᐅᖓ ᑕᑯᔭᐅᔪᓐᓇᖅᑐᓂᒃ ᖃᑕᓐᖑᑎᖏᓐᓄᑦ ᑮᓇᐅᔭᓕᕆᓂᖏᑦᑕ ᐊᐅᓚᓂᖏᓐᓂᒃ.  ᒪᓕᒐᓕᐅᕐᕕᖕᒧᑦ ᑎᑎᕋᖅᑎ ᐅᕙᓐᓂᒃ ᑐᓴᖅᑎᑦᑎᓯᒪᓕᖅᑐᖅ ᐃᓘᓐᓇᖏᑦ ᒪᓕᒐᓕᐅᖅᑏᑦ ᐅᓂᒃᑳᓕᐅᖅᓯᒪᓂᕋᖅᑕᐃᓐᓇᕆᓪᓗᓂᒋᑦ ᑭᐱᕝᕕᒃᓴᖓᑕ ᒪᐃ 31, 2002 ᑐᖔᓂ, ᐊᒻᒪᓗ ᓇᓗᓇᐃᖅᓯᓯᒪᓕᖅᖢᖓ ᐃᓘᓐᓇᖏᑦ ᒪᓕᒐᓕᐅᖅᑎᓕᒫᑦ ᑖᒃᑯᓂᖓ ᒪᓕᒐᕐᓂᒃ ᒪᓕᒃᓯᒪᔪᐃᓐᓇᐅᓂᖏᓐᓂᒃ. 

ᑖᓐᓇ ᐊᕐᕌᒍᑕᒫᖅᓯᐅᑦ ᐅᓂᒃᑳᓕᐊᕆᔭᕋ ᑭᖑᓪᓕᖅᐸᐅᓂᐊᓯᔪᖅ ᓄᓇᕗᒻᒥ ᓂᕈᐊᕐᓂᕐᔪᐊᖅᑕᖃᓚᐅᓐᖏᓐᓂᖓᓂ, ᐊᒻᒪᓗ ᒪᓕᒐᓕᐅᖅᑎᓕᒫᑦ ᑐᓴᕈᒪᔪᐃᓐᓇᐅᔪᒃᓴᐅᔪᑦ ᐊᕐᕋᒍᑕᒫᖅᓯᐅᑎᒥᑦᑕ ᐅᓂᒃᑳᖏᓐᓂᒃ ᑐᓐᓂᖅᑯᑎᖃᖅᑐᐃᓐᓇᐅᓚᐅᕐᒪᖔᖏᑦᑕ ᒪᐃ 31, 2003 ᑐᖔᓂ. 

ᓂᕈᐊᖅᑕᐅᓵᖅᑐᑦ ᒪᓕᒐᓕᐅᖅᑎᑦ ᑕᖅᑲᐅᖓ ᒪᑐᐃᖓᔪᒃᓴᐅᔪᓂᒃ ᐅᓂᒃᑳᓕᐅᖅᑐᐃᓐᓇᐅᔭᕆᐊᓖᑦ ᐅᓪᓗᑦ 60 ᑐᖔᓂ ᓂᕈᐊᖅᑕᐅᓚᐅᕐᓂᖓ ᐅᓪᓗᖓᓂ ᓈᓴᓯᒋᐊᕐᓗᒍ. 

ᐃᓘᓐᓇᖏᑦ ᒪᓕᒐᓕᐅᖅᑏᑦ ᑎᑎᕋᖅᑕᖏᑦ ᑕᖅᑲᐅᖓ ᐃᓄᖕᓄᑦ ᒪᑐᐃᖓᑦᑎᐊᖅᑐᑦ, ᑐᒃᓯᕌᕆᔭᐅᔪᓐᓇᖅᖢᑎᒃ ᑕᑯᔭᐅᔪᓐᓇᖅᖢᑎᒡᓗ ᐊᖅᑯᑎᒋᓗᒍ ᒪᓕᒐᓕᐅᕐᕕᖕᒧᑦ ᑎᑎᕋᖅᑎ. 

ᐊᓪᓚᕕᖕᒥ ᐱᓕᕆᐊᖑᕙᓪᓕᐊᔪᑦ 

ᐃᓗᐃᑦᑑᑦᑎᐊᕐᓂᕐᒧᑦ ᐱᖁᔭᕐᔪᐊᖅ ᐊᕐᕌᒍᑕᒫᖅ ᐅᓂᒃᑳᓕᐅᕆᐊᖃᖅᑎᑦᑎᓂᖓ ᐱᔾᔪᑎᒋᓪᓗᒍ, ᒪᓕᒐᓕᐅᖅᑎᓕᒫᑦ ᐊᑐᓂ ᐅᕙᓐᓂᒃ ᑲᑎᒪᖃᑎᖃᖃᑦᑕᕆᐊᓖᑦ ᕿᒥᕐᕈᓇᖃᑎᒋᓂᐊᕋᒃᑭᑦ ᖃᑕᓐᖑᑎᒌᖏᑦᑕ ᑮᓇᐅᔭᓕᐊᕕᓂᖏᓐᓂᒃ ᐊᒻᒪᓗ ᖃᓄᖅ ᑐᑭᓯᐅᒪᓂᖃᕐᒪᖔᖏᑦ ᐱᖁᔭᕐᔪᐊᕐᓂᒃ ᑐᑭᓯᖃᑎᒋᓂᐊᕋᒃᑭᑦ.  ᑕᒪᑐᒪᓂ ᐊᕐᕌᒍᒥ ᐊᐱᖅᓱᓚᐅᖅᑕᒃᑲ ᐃᓘᓐᓇᖏᑦ ᒪᓕᒐᓕᐅᖅᑏᑦ ᒪᕐᕈᐃᖅᖢᒋᑦ ᐃᖃᓗᖕᓂ, ᐊᑕᐅᓯᐊᖅᖢᖓ ᒪᐃ 2002-ᒥ ᐊᒻᒪᓗ ᐱᖃᑖᓂ ᒫᔾᔨ 2003-ᖑᑎᓪᓗᒍ. 

ᐊᐱᖅᓱᖅᖢᒋᑦ ᐅᖃᖃᑎᒋᖅᑳᓚᐅᖅᑕᕋ ᒪᓕᒐᓕᐅᕐᕕᖕᒥ ᑎᑎᕋᖅᑎ ᐊᒻᒪᓗ ᐃᖅᑲᓇᐃᔭᖅᑎᒋᔭᐅᔪᑦ ᒪᓕᒐᓕᐅᕐᕕᖕᒥ ᐃᖅᑲᓇᐃᔭᖅᑏᑦ ᒪᓕᒐᖏᓐᓂᒃ ᐱᔾᔪᑎᖃᖅᖢᖓ, ᐋᖅᑭᒃᓱᑦᑎᐊᒃᑲᓐᓂᖅᖢᒋᓪᓗ ᑕᑕᑎᕆᐊᓖᑦ, ᖃᕆᓴᐅᔭᒃᑰᖅᑎᑕᐅᔪᓐᓇᖅᓯᓂᐊᕐᒪᑕ, ᐊᒻᒪᓗ ᐅᖃᓕᒫᒐᓂᒃ ᐃᓗᐃᑦᑑᑦᑎᐊᕐᓂᕐᒧᑦ ᐱᖁᔭᕐᔪᐊᓕᕆᔪᓂᒃ ᓴᖅᑭᑦᑎᓚᐅᖅᖢᖓ ᐊᒻᒪᓗ ᐅᓂᒃᑲᐅᓯᓕᖕᓂᒃ ᖃᓄᐃᓕᐅᖃᑦᑕᕐᒪᖔᕐᒪ ᐊᓪᓚᕕᑦᑎᓐᓂ.  ᖃᕆᓴᐅᔭᒃᑯᑦ ᑐᕌᕈᑎᒐ, www.integritycom.nu.ca, ᖃᕆᓴᐅᔭᒃᑰᖅᑎᑕᐅᓕᓚᐅᖅᑐᖅ, ᐱᖁᔭᕐᔪᐊᑉ ᒥᒃᓵᓄᑦ ᑐᑭᓯᕆᐊᕈᒪᔪᓄᑦ ᑕᑯᔭᐅᔪᒃᓴᐅᑕᐅᓪᓗᓂ, ᖃᓄᕐᓗ ᐱᒋᐊᓚᐅᕐᒪᖔᖏᑦ ᐊᒻᒪᓗ ᐅᓂᒃᑲᐅᓯᖃᖅᖢᓂ ᐃᓗᐃᑦᑑᑦᑎᐊᕐᓂᕐᒧᑦ ᑲᒥᓴᓇᕆᔭᐅᔪᒥᒃ, ᐃᓚᓕᐅᖢᒋᑦ ᐅᓂᒃᑳᓕᐊᕕᓂᖏᑦ ᐊᒻᒪᓗ ᒪᓕᒐᓕᐅᖅᑎᓄᑦ ᑕᑕᑎᖅᑕᐅᓯᒪᔪᕕᓖᑦ.  ᐅᖃᓕᒫᒐᐃᑦ ᐋᖅᑭᒃᓱᖅᑕᐅᓯᒪᓂᖏᑦ ᐱᔭᕇᖅᑕᐅᓯᒪᓕᖅᑐᑦ ᐊᒻᒪᓗ ᐊᒥᓱᕈᖅᑎᑕᐅᔪᒃᓴᐅᑕᐅᓕᖅᖢᑎᒃ ᓯᐊᒻᒪᒃᑎᖅᑕᐅᓗᑎᒡᓗ 2003 ᐊᐅᔭᖓᓂ. 

ᖃᕆᓴᐅᔭᒃᑯᑦ ᑎᑎᖅᑲᖅᑖᕐᕕᖏᑦᑎᒍᑦ, ᓱᑲᑦᑐᒃᑯᑦ ᐊᒻᒪᓗ ᐅᖄᓚᐅᑎᒃᑯᑦ, ᐊᒻᒪᓗ ᓵᓐᖓᖃᑦᑕᐅᑎᑦᑎᐊᕐᓂᒃᑯᑦ, ᐊᒥᓱᐃᖅᑕᖅᖢᖓ ᐅᖃᓪᓚᖃᑎᒋᖃᑦᑕᖅᑕᒃᑲ ᒪᓕᒐᓕᐅᖅᑏᑦ ᐊᒻᒪᓗ ᐃᖅᑲᓇᐃᔭᖅᑎᖏᑦ, ᐃᓄᑐᐃᓐᓇᐃᓪᓗ, ᑐᓴᒐᒃᓴᓕᕆᔨᓪᓗ, ᒐᕙᒪᒃᑯᓐᓂᑦ ᐊᖓᔪᖅᑲᐅᑎᒋᔭᐅᔪᑦ ᐊᒻᒪᓗ ᑲᒥᓴᓇᐅᖃᑎᒃᑲ ᐊᔾᔨᒌᓐᖏᑦᑐᓂ ᒐᕙᒪᖃᕐᕕᐅᔪᓂ. 

ᑕᒪᑐᒪᓂ ᐊᕐᕌᒍᑦᑎᓐᓂ, ᐅᖃᖃᑎᖃᖃᑦᑕᖅᓯᒪᔪᖓ ᒪᓕᒐᓕᐅᖅᑎᓂᒃ ᒪᓕᒐᓂᒃ ᓯᖁᒥᑦᑎᓕᓐᖏᒃᑲᓗᐊᕐᒪᖔᖏᓐᓂᒃ ᐱᔾᔪᑎᖃᖅᖢᖓ.  ᑐᓴᐅᒪᔾᔪᑎᓂᒃ ᑐᓂᓯᓯᒪᓕᕐᒥᔪᖓ ᒪᓕᒐᓕᐅᖅᑎᓄᑦ ᐊᐱᖅᑯᑕᐅᖃᑦᑕᓚᐅᖅᑐᑦ ᐱᔾᔪᑎᒋᓪᓗᒋᑦ ᐊᒻᒪᓗ ᐊᑭᖃᓐᖏᑦᑐᓂᒃ ᖃᖓᑦᑕᐅᑎᓂᒃ ᐱᔪᓐᓇᕐᒪᖔᖏᓐᓂᒃ. ᐅᖃᐅᔾᔨᒡᒍᔪᖓ ᒪᓕᒐᓕᐅᖅᑎ ᐅᕝᕙᓘᓐᓃᑦ ᖃᑕᓐᖑᑎᖏᑦ ᐊᑭᖃᓐᖏᑦᑐᓂᒃ ᖃᖓᑦᑕᐅᑎᓂᒃ, ᐱᓗᐊᕐᓗᒍ ᑲᑉᐸᓂᐅᔪᖅ ᒐᕙᒪᒃᑯᓐᓄᑦ ᓂᐅᕐᕈᑎᖃᖅᐸᒃᑐᖅ ᐊᒻᒪᓗ ᐊᐅᓚᓂᖏᑦ ᐃᓱᒪᓕᐅᕈᑕᐅᖃᑦᑕᖅᑐᑦ ᒪᓕᒐᓕᐅᕐᕕᖕᒧᑦ, ᓯᖁᒥᑦᑎᔾᔪᑕᐅᔪᓐᓇᖅᑐᑦ ᐃᓗᐃᑦᑑᑦᑎᐊᕐᓂᕐᒧᑦ ᐱᖁᔭᕐᔪᐊᕐᓂᒃ.  ᒪᓕᒐᓕᐅᖅᑏᑦ ᐃᖅᑲᐃᑎᑕᐅᒃᑲᓐᓂᕆᐊᓖᑦ ᐱᖁᔭᕐᔪᐊᖅ ᐅᖃᖅᓯᒪᖕᒪᑦ ᐱᖃᑦᑕᕆᐊᖃᓐᖏᓐᓂᕐᒥᒃ ᑕᑯᕚᓂᒃ ᖁᔭᓐᓇᒦᕈᓯᐊᕐᓂᒡᓗ, ᒪᓕᒐᐃᑦ ᒪᓕᒡᓗᒋᑦ, ᐊᒻᒪᓗ ᓇᓗᒑᖓᒥᒃ ᑕᐃᒫᑦᑎᐊᖑᓕᕋᓗᐊᕐᒪᖔᕐᒥ ᐅᕙᓐᓄᑦ ᐊᐱᕆᖃᑦᑕᖁᓪᓗᒋᑦ. 

ᐃᓗᐃᑦᑑᑦᑎᐊᕐᓂᕐᒧᑦ ᐱᖁᔭᕐᔪᐊᖅᑎᒍᑦ, ᒪᓕᒐᓕᐅᖅᑎᒥᒃ ᐱᔪᓐᓇᖅᑎᑦᑎᓚᐅᖅᑐᖓ ᑳᓐᑐᕌᖃᕈᓐᓇᖅᑎᖢᒍ ᒐᕙᒪᒃᑯᓐᓄᑦ, ᑕᐃᒪᐃᒐᔪᒃᑐᖃᓐᖏᒃᑲᓗᐊᖅᑎᓪᓗᒍ, ᑭᓯᐊᓂ ᖃᓄᐃᓕᖓᓂᖓᓄᑦ ᐊᒻᒪᓗ ᒪᓕᒐᓕᐅᖅᑎᐅ ᐱᓕᕆᐊᖓᓄᑦ ᐊᒃᑐᐃᓂᖃᕐᓂᐊᓐᖏᓐᓂᖓ ᐱᔾᔪᑎᒋᓪᓗᒍ ᐱᔪᓐᓇᖅᑎᓚᐅᖅᑕᕋ ᐊᒻᒪᓗ ᑕᖅᑲᒃᑯᓄᖓ ᐱᐅᓂᖅᐹᒥᒃ ᓴᖅᑭᑦᑎᕕᐅᓂᐊᕐᓂᖓ ᐃᓱᒪᒋᓪᓗᒍ ᐱᔪᓐᓇᖅᑎᓚᐅᖅᑕᕋ. 

ᑐᑭᓯᐊᕈᒪᔪᓄᑦ ᑭᐅᖃᑦᑕᓚᐅᕐᒥᔪᖓ ᒥᓂᔅᑕᐃᑦ ᐃᖅᑲᓇᐃᔭᖅᑎᖏᑦᑕ ᖃᓄᐃᓕᐅᕐᓂᖏᓐᓄᐊᖓᔪᓂᒃ, ᒥᓂᔅᑕᓂᓐᖔᖅᑐᓂᒃ ᐊᒻᒪᓗ ᐃᓱᒫᓗᒃᑐᓂᒃ ᒥᓂᔅᑕᐃᑦ ᐃᖅᑲᓇᐃᔭᖅᑎᖏᓐᓂ, ᐃᓗᐃᑦᑑᑦᑎᐊᕐᓂᕐᒧᑦ ᐱᖁᔭᕐᔪᐊᖅᑎᒍᑦ ᐱᔪᓐᓇᕐᓂᖅᑖᖅᑎᑕᐅᓯᒪᒐᓗᐊᖅᑎᓪᓗᖓ ᒪᓕᒐᓕᐅᖅᑎᑐᐃᓐᓇᕐᓄᑦ.  ᑕᖅᑳᓐᖓᑦ ᐊᐱᕆᔭᐅᖃᑦᑕᓚᐅᕐᒥᔪᖓ ᒐᕙᒪᒃᑯᑦ ᐊᖓᔪᖅᑲᐅᑎᖏᓐᓄᑦ ᑐᕌᖓᔪᓂᒃ ᑖᒃᑯᑎᒎᓇᖅ ᐱᖁᔭᕐᔪᐊᖅᑎᒍᑦ ᐃᓚᓕᐅᔾᔭᐅᓯᒪᓐᖏᑦᑐᓄᑦ.  ᐊᕐᕌᒍᑕᒫᖅᓯᐅᑎᓐᓂ ᐅᓂᒃᑳᓕᐊᓐᓂ ᐅᖃᓚᐅᕋᒪ, ᓄᓇᑦᓯᐊᕐᒥ ᐃᒻᒥᒧᑦ ᐊᒡᕕᐊᕈᑎᖃᕐᓂᕐᒧᑦ ᕿᒥᕐᕈᔩᑦ 1999-ᒥ ᐊᑐᓕᖁᔭᓕᐅᓚᐅᖅᓯᒪᔪᑦ "ᒥᓂᔅᑕᐃᑦ ᑐᖏᓕᖏᑦ ᐊᒻᒪᓗ ᑕᐃᒃᑯᐊ ᓇᓕᖅᑯᐊᓪᓗᐊᖏᓐᓂᒃ ᐃᖅᑲᓇᐃᔭᖅᑏᑦ" ᐃᓚᓕᐅᔾᔭᐅᖁᔭᐅᓪᓗᑎᒃ ᐱᖁᔭᕐᔪᐊᕐᓄᑦ, ᓲᕐᓗ ᒥᓂᔅᑕᑎᑐᑦ ᐱᔭᐅᓕᕐᓗᑎᒃ.  ᑐᑭᓯᔪᖓ ᓄᓇᕗᑦ ᒐᕙᒪᒃᑯᖏᑦᑕ ᐃᖅᑲᓇᐃᔭᖅᑎᖏᑦᑕ ᒪᓕᒐᖏᑦ ᐱᓕᕆᕝᕕᖕᓄᑦ ᐱᓕᕆᐊᕆᔭᐅᓕᖅᑐᑦ ᕿᒥᕐᕈᔭᐅᓪᓗᑎᒡᓗ. 

ᓄᓇᕗᒻᒥ ᓂᕈᐊᕐᓂᓕᕆᓂᕐᒧᑦ ᐱᖁᔭᕐᔪᐊᑎᒍᑦ ᐱᔭᒃᓴᖅᑖᖅᓯᒪᓂᕋ ᓄᑖᖅ ᒪᓕᒃᖢᒍ, ᐅᖃᖃᑎᖃᓚᐅᖅᑐᖓ ᓄᓇᕗᒻᒥ ᓂᕈᐊᖅᑐᓕᕆᔨᕐᔪᐊᕐᒥᒃ, ᐃᖅᑲᖅᑐᐃᕕᓕᕆᔨᒃᑯᓐᓄᑦ ᐃᖅᑲᓇᐃᔭᖅᑎᓂᒃ ᐊᒻᒪᓗ ᐸᓖᓯᒃᑯᓐᓂᒃ ᐊᒻᒪᓗ ᐱᔭᒃᓴᑦᑕ ᖃᓄᐃᓕᖓᓂᖏᓐᓂᒃ ᐱᖁᔭᕐᔪᐊᕐᒥᒃ ᐊᑐᓕᖅᑎᑦᑎᔨᐅᓪᓗᑕ ᒪᓕᒃᑎᑦᑎᔨᐅᓪᓗᑕᓗ.  ᐅᖃᖃᑎᒌᖕᓂᖅᐳᑦ ᐱᒋᐊᓚᐅᖅᑐᖅ ᑐᓐᖓᕕᒃᐳᑦ ᐊᔾᔨᒌᖕᒪᑕ ᐊᒻᒪᓗ ᐋᖅᑭᒃᓱᖅᑕᐅᓯᒪᔭᕆᐊᖃᖅᖢᑎᒃ ᐅᕙᑦᑎᓐᓄᑦ ᑲᑐᔾᔭᐅᓗᑎᒃ. 

ᑕᒪᑐᒪᓂ ᐊᕐᕌᒍᒥ, ᑕᐃᒪᓐᖓᓂᑦ ᐅᖃᖃᑎᒌᓐᓇᖃᑦᑕᖅᑕᒃᑲ ᑲᒥᓴᓇᐅᖃᑎᒃᑲ ᑲᓇᑕᒥ ᐃᒻᒥᒧᑦ ᐊᒡᕕᐊᕈᑎᖃᕐᓂᕐᒧᑦ ᐱᑐᒃᓯᒪᐅᑎᑎᒍᑦ ᐊᒻᒪᓗ ᒐᕙᒪᐃᑦ ᑲᑎᒪᔨᖏᑦ.  ᑲᓇᑕᒥ ᐃᒻᒥᒧᑦ ᐊᒡᕕᐊᕈᑎᖃᕐᓂᕐᒧᑦ ᐱᑐᒃᓯᐅᖃᑕᐅᔪᑦ ᐊᕐᕌᒍᑕᒫᖅᓯᐅᒻᒥᓂᒃ ᑲᑎᒪᕕᒡᔪᐊᕐᓂᖃᕐᓂᐊᖅᑐᑦ ᕋᔾᔭᐃᓇᒥ ᐊᒻᒪᓗ ᓄᓇᕐᔪᐊᕐᒥ ᐃᒻᒥᒧᑦ ᐊᒡᕕᐊᕈᑎᓕᕆᔩᑦ ᑲᓇᑕᒥᐅᑕᐃᑦ ᐋᑐᕚᒥ, ᑕᕝᕙᓂᓗ ᑐᓐᖓᓱᒃᑎᑕᐅᓲᖑᓪᓗᑕ ᖃᐅᔨᒪᔭᑦᑎᓐᓂᒃ ᐅᓂᒃᑲᐅᓯᖃᕈᓐᓇᖅᖢᑕ ᐊᒻᒪᓗ ᐊᑐᖅᓯᒪᔭᑦᑎᓐᓂᒃ ᐊᑑᑎᖃᓪᓚᕆᒍᓐᓇᖅᑐᓂᒃ ᐊᓪᓚᕕᑦᑎᓐᓂ. 

ᒐᕙᒪᑦᑎᐊᕙᖃᕆᐊᖃᕐᓂᖅ ᐱᓯᓂᓯᖃᑦᑎᐊᕆᐊᖃᕐᓂᕐᓗ ᑕᖅᑲᐅᖓ ᑕᑯᓐᓇᖅᑕᐅᓗᐊᓕᖅᑎᓪᓗᒍ, ᖁᔭᓐᓇᒦᖅᑕᒃᑲ ᒪᓕᒐᓕᐅᖅᑏᑦ ᐱᓇᔪᖕᓂᖃᑦᑎᐊᕐᒪᑕ ᐊᒻᒪᓗ ᖁᔭᒋᓪᓗᒋᑦ ᐃᑲᔪᑦᑎᐊᖃᑦᑕᕐᒪᑕ ᒪᓕᒐᓕᐅᕐᕕᖕᒧᑦ ᑎᑎᕋᖅᑎ ᐊᒻᒪᓗ ᐃᖅᑲᓇᐃᔭᖅᑎᖏᑦ.  ᐊᒃᓱᐊᓗᒃ ᖁᕕᐊᓱᒃᑐᖓ ᖃᐅᔨᒪᒐᒪ ᒪᓕᒐᓕᐅᖅᑎᓕᒫᑦᑎᐊᑦ ᓄᓇᕗᒻᒥ ᒪᓕᒐᓕᐅᕐᕕᖕᒧᑦ ᖃᐅᔨᒪᑦᑎᐊᓕᕋᒃᑭᑦ, ᐊᒻᒪᓗ ᖁᕕᐊᓇᖅᑐᖅ ᐃᑲᔪᕈᓐᓇᓚᐅᕋᒃᑭᑦ ᐃᓗᐃᑦᑑᑦᑎᐊᕋᓱᒃᑎᓪᓗᒋᑦ, ᐊᖏᖅᓯᒪᑦᑎᐊᕐᒪᑕ ᐃᒻᒥᓄᑦ ᐊᒻᒪᓗ ᑭᖑᕝᕕᖅᑎᒋᓂᐊᖅᑕᒥᖕᓄᑦ.   

ᒪᐃ 31, 2003                                               ᕌᐳᑦ ᔅᑖᓐᐱᐅᕆ

AttachmentSize
2002-2003 (PDF) 132.37 KB