2004-2005 (PDF)

ᓄᓇᕗᑦ ᒪᓕᒐᓕᐅᕐᕕᐊ

ᐊᕐᕌᒍᑕᒫᖅᓯᐅᑦ ᐅᓂᒃᑳᖅ

ᐊᐃᕐᕆᓕ 1, 2004-ᒥᑦ ᒫᔾᔨ 31, 2005-ᒧᑦ

ᕌᐳᑦ ᔅᑖᓐᐱᐅᕆ
ᐃᓗᐃᑦᑑᑦᑎᐊᕐᓂᕐᒧᑦ ᑲᒥᓴᓇ

ᐊᐃᕐᕆᓕ 18, 2005

ᔫᐱ ᓄᑕᕋᕐᒧᑦ, ᒪᓕᒐᓕᐅᖅᑎ

ᐅᖃᖅᑎ,

ᓄᓇᕗᑦ ᒪᓕᒐᓕᐅᕐᕕᐊᓄᑦ,

ᐃᖃᓗᐃᑦ, ᓄᓇᕗᑦ

ᐅᖃᖅᑎᒧᑦ:

ᐃᓗᐃᑦᑑᑦᑎᐊᕐᓂᕐᒧᑦ ᐱᖁᔭᕐᔪᐊᑉ ᐃᓗᐊᓃᑦᑐᖅ ᓈᓴᐅᑎᓕᒃ 57 ᒪᓕᒃᖢᒍ, ᖁᕕᐊᓱᒃᑐᖓ ᓄᓇᕗᑦ ᒪᓕᒐᓕᐅᕐᕕᐊᓄᑦ ᓴᖅᑭᑦᑎᔪᓐᓇᕋᒪ ᐊᕐᕌᒍᑕᒫᖅᓯᐅᑏᑦ ᐅᓂᒃᑳᖏᓐᓂᒃ ᑮᓇᐅᔭᓕᕆᓐᓇᐅᑉ ᐊᕐᕌᒍᖓᓐᓂ ᐊᐃᕐᕆᓕ 1, 2004-ᒥᑦ ᐱᒋᐊᖅᓯᒪᔪᓂᒃ ᒫᔾᔨ 31, 2005-ᒧᑦ ᑎᑭᓯᒪᔪᓂᒃ.

ᐃᓚᓐᓈᑦ,

ᕌᐳᑦ ᔅᑖᓐᐱᐅᕆ

ᖃᕆᓴᐅᔭᒃᑯᑦ ᑐᕌᕈᑖE: rstanbury@assembly.nu.ca

607 Edgewater Cr., Burlington, ON L7T 3L8

ᓄᓇᕗᒻᒥ ᐊᑭᖃᓐᖏᑦᑐᖅ ᐅᖄᓚᐅᑦ: 1-888-398-2785

ᓱᒃᑲᔪᒃᑯᑦ/ᐅᖄᓚᐅᑖ: 1-905-637-6576

www.integritycom.nu.ca

ᐊᕐᕌᒍᑕᒫᖅᓯᐅᑏᑦ ᐅᓂᒃᑳᑦ 2004-2005
ᐃᓗᐃᑦᑑᑦᑎᐊᕐᓂᕐᒧᑦ ᑲᒥᓴᓇ

6-ᒋᔭᖓᓂ ᐊᕐᕌᒍᑕᒫᖅᓯᐅᑏᑦ ᐅᓂᒃᑳᓕᐊᒃᑲ ᑮᓇᐅᔭᓕᕆᓐᓇᐅᑉ ᐊᕐᕌᒍᖓᓐᓂ ᐱᒋᐊᖅᓯᒪᔪᑦ ᐊᐃᕐᕆᓕ 1, 2004-ᒥᑦ ᒫᔾᔨ 31, 2005-ᒧᑦ, ᑕᒪᑐᒪᓂᓗ ᐊᕐᕌᒍᒥ ᐱᕙᓪᓕᐊᔪᑦ ᑕᑯᓐᓇᖅᖢᒋᑦ ᐃᖅᑲᐃᒃᑲᓐᓂᕆᐊᖃᖅᑰᖅᑐᒍᑦ ᒪᕐᕉᖕᓂᒃ ᐃᓗᐃᑦᑑᑦᑎᐊᕐᓂᐅᑉ ᑐᓐᖓᕕᓪᓗᐊᑖᖕᓂᒃ: ᒪᑐᐃᖓᑦᑎᐊᕐᓂᖅ ᐊᒻᒪᓗ ᓵᑕᒃᓴᐅᔪᓐᓇᕐᓂᖅ.

ᐃᓗᐃᑦᑑᑦᑎᐊᕐᓂᕐᒧᑦ ᑲᒥᓴᓇᐅᑉ ᓴᖅᑭᔮᕈᑎᓪᓗᐊᑕᖓ, ᐊᑐᖅᖢᒍ ᐃᓗᐃᑦᑑᑦᑎᐊᕐᓂᕐᒧᑦ ᐱᖁᔭᕐᔪᐊᖅ, ᒪᓕᒐᓕᐅᖅᑏᑦ ᐊᖏᖅᓯᒪᓂᖏᑦ ᑕᖅᑲᐅᖓ ᐊᑐᕈᓐᓇᕐᓂᖅᐹᖏᓐᓄᑦ ᓵᓐᖓᓂᖅᓴᐅᑎᑦᑎᓂᖅ ᐃᒻᒥᒧᑦ ᑐᕌᖓᔪᑦ ᑭᖑᓪᓕᐅᑎᓯᒪᓗᒋᑦ. ᐃᓗᐃᑦᑑᑦᑎᐊᕐᓂᕐᒧᑦ ᑲᒥᓴᓇ ᓴᓐᖏᓂᖅᑖᖅᑎᑕᐅᓯᒪᕗᖅ ᐅᖃᐅᔾᔨᔨᐅᔪᓐᓇᕐᓂᕐᒥᒃ ᒪᓕᒐᓕᐅᖅᑎᓂᒃ, ᕿᒥᕐᕈᓇᒃᑎᐅᓂᖅ ᒪᓕᒐᓂᒃ ᖃᓄᐃᑦᑐᑐᐃᓐᓇᕐᓂᒃ ᒪᓕᒃᑲᓗᐊᕐᒪᖔᖏᓐᓂᒃ ᐊᒻᒪᓗ ᖃᐅᔨᓴᓚᐅᕐᓗᓂ ᖃᐅᔨᓐᓂᕈᓂ ᖃᓄᐃᑦᑐᑐᐃᓐᓇᕐᓂᒃ ᒪᓕᒐᓂᒃ ᓯᖁᒥᑦᑎᔪᖅᑕᖃᕐᓂᖓᓂᒃ ᐊᑐᓕᖁᔭᓕᐅᖅᑎᐅᓗᓂ ᖃᓄᐃᑦᑐᑐᐃᓐᓇᕐᓂᒃ ᒪᓕᒐᓕᐅᕐᕕᐅᑉ ᐊᑐᓕᖅᑎᓐᓇᔭᖅᑕᖏᓐᓂᒃ. ᐊᓯᖏᓐᓂᒃ ᐃᖅᑲᓇᐃᔭᒃᓴᖅᑖᖅᑎᑕᐅᔪᓐᓇᖅᑐᖅ ᑎᓕᔭᐅᒍᓂ ᒪᓕᒐᓕᐅᕐᕕᖕᒧᑦ ᐅᕝᕙᓘᓐᓃᑦ ᑲᑎᒪᔨᓕᕆᔨᒃᑯᑦ ᑲᑎᒪᔨᖏᓐᓄᑦ.

ᓄᓇᕗᒻᒥ ᓂᕈᐊᕐᓂᓕᕆᓂᕐᒧᑦ ᐱᖁᔭᕐᔪᐊᖅ ᐊᑐᖅᖢᒍ, ᐃᓗᐃᑦᑑᑦᑎᐊᕐᓂᕐᒧᑦ ᑲᒥᓴᓇ ᐱᔪᓐᓇᕐᓂᖅᑖᖅᑎᑕᐅᓯᒪᕗᖅ ᒪᓕᖕᓂᐊᕐᓂᕐᒧᑦ ᐊᖏᕈᒻᒥᒃ ᐊᑎᓕᐅᖅᑎᑦᑎᔪᓐᓇᕐᓂᕐᒥᒃ, ᑕᒪᓐᓇᓗ ᐊᑐᖅᑕᐅᑎᖔᕈᓐᓇᖅᖢᓂᐅᒃ ᐃᖅᑲᖅᑐᐃᕕᒃᑎᒎᖅᑎᑦᑎᓐᖏᖔᕐᓗᓂ ᐃᓄᖕᒥᒃ ᐱᖁᔭᕐᔪᐊᖅ ᐊᑐᕐᓗᒍ ᓯᖁᒥᑦᑎᓂᕋᖅᑕᐅᔪᒥᒃ.

ᑖᒃᑯᐊᒃ ᐱᔭᒃᓴᖅᑖᕆᓯᒪᔭᖏᒃ ᐊᑐᖅᖢᒋᒃ, ᐊᑐᓕᖅᑎᑦᑎᓂᕐᒥᒃ ᐊᑐᖅᑎᑦᑎᓚᐅᖅᑐᖅ ᓯᕗᓪᓕᖅᐹᑦᑎᐊᕐᒥ ᑕᒪᑐᒪᓂ ᐊᕐᕌᒍᒋᓚᐅᖅᑕᑦᑎᓐᓂ.

ᐃᓗᐃᑦᑑᑦᑎᐊᕐᓂᕐᒧᑦ ᐱᖁᔭᕐᔪᐊᖅ

ᑭᖑᓪᓕᕐᒥᒃ ᐅᓂᒃᑳᓕᐅᖅᑎᓪᓗᖓ ᓇᐃᓈᖅᖢᒋᑦ ᖃᓄᐃᑉᐸᓪᓕᐊᓃᑦ ᐅᓂᒃᑳᓕᐊᕆᓚᐅᖅᓯᒪᔭᒃᑲ, ᐊᒻᒪᓗ ᖁᕕᐊᓲᑎᖃᓚᐅᖅᓯᒪᓪᓗᖓ ᒪᓕᒐᓕᐅᕐᕕᐅᑉ ᓯᕗᓪᓕᑦ ᑕᓪᓕᒪᑦ ᐊᕐᕌᒍᓂ ᐊᖏᖅᓯᒪᑦᑎᐊᓚᐅᕐᓂᖏᓐᓂᒃ ᐊᒻᒪᓗ ᒪᓕᑦᑎᐊᓚᐅᕐᓂᖏᓐᓂᒃ ᐃᓗᐃᑦᑑᑦᑎᐊᕐᓂᕐᒧᑦ ᑐᓐᖓᕕᒋᔭᐅᔭᕆᐊᓕᖕᓂᒃ. ᑕᖅᑭᖅ ᓈᓚᐅᓐᖏᑎᓪᓗᒍᓘᓐᓃᑦ, ᓯᕗᓪᓕᖅᐹᖅ ᒪᓕᒐᓕᐅᖅᑎ ᓯᖁᒥᑦᑎᓕᓚᐅᖅᓯᒪᔪᖅ ᐃᓗᐃᑦᑑᑦᑎᐊᕐᓂᕐᒧᑦ ᐱᖁᔭᕐᔪᐊᕐᒥᒃ. ᑕᒪᓐᓇ ᓯᖁᒥᑦᑎᓂᐅᔪᖅ ᑐᓱᓐᓇᖅᑐᒥᒃ ᓯᖁᒥᑦᑎᓚᐅᓐᖐᓐᓇᕐᓂᕐᒥᒃ ᑭᐱᓯᕐᖓᐅᑎᒋᔭᐅᓕᓚᐅᖅᓯᒪᔪᖅ. ᑕᐃᒪᐃᑦᑑᒐᓗᐊᖅᑎᓪᓗᒍ ᐊᒃᓱᕉᑎᖃᒃᑲᓐᓂᓕᓚᐅᖅᓯᒪᔪᒍᑦ ᒪᑐᐃᖓᑦᑎᐊᕆᐊᖃᕐᓂᑦᑎᓐᓂᒃ ᐊᒻᒪᓗ ᓯᕗᓪᓕᖅᐹᒥᒃ ᑕᒪᓐᓇ ᐆᒃᑑᑕᐅᓚᐅᖅᓯᒪᓪᓗᓂ ᒪᓕᒐᓕᐅᕐᕕᐅᑉ ᓇᖕᒥᓂᖅ ᒪᓕᒐᖃᖅᑎᑦᑎᓂᖏᓐᓂᒃ ᒪᑐᐃᖓᑦᑎᐊᕆᐊᖃᕐᓂᖏᓐᓂᒡᓗ. ᑕᒪᓐᓇ ᐊᑐᖅᑕᐅᑎᓪᓗᒍ ᕿᒥᕐᕈᓇᖕᓂᖅ ᒪᓕᒐᓕᐅᖅᑎᓂᒃ ᐊᒻᒪᓗ ᒪᓕᒐᓕᐅᕐᕕᖕᒥᒃ ᐊᖏᖅᓯᒃᑲᓐᓂᐅᑕᐅᓚᐅᖅᓯᒪᔪᖅ ᐃᓗᐃᑦᑑᑦᑎᐊᕐᓂᕐᒧᑦ ᐊᖏᖅᓯᒪᓂᖏᓐᓂᒃ.

ᑕᒪᒃᑯᐊ ᑕᑯᓐᓇᕐᓗᒋᑦ, ᐊᑑᑎᖃᕐᓂᐊᖅᑐᒃᓴᐅᔪᖅ ᕿᒥᕐᕈᓇᒃᑲᓐᓂᑲᐃᓐᓇᕈᑦᑎᒍᑦ ᐃᓚᖏᑦ ᑭᖑᓪᓕᕐᒥᒃ ᐅᓂᒃᑳᓕᐅᖅᑎᓪᓗᖓ ᐅᖃᐅᓯᕆᓚᐅᖅᓯᒪᔭᒃᑲ. ᐃᓗᐃᑦᑑᑦᑎᐊᕐᓂᕐᒧᑦ ᐱᖁᔭᕐᔪᐊᑉ ᑐᓐᖓᕕᖓ ᒪᑐᐃᖓᑦᑎᐊᕆᐊᖃᕐᓂᐅᕗᖅ, ᓂᕈᐊᖅᑏᑦ ᓂᕈᐊᕈᓐᓇᕐᓗᑎᒃ ᒪᓕᒐᓕᐅᖅᑎᓂᒃ ᐊᔪᓐᖏᓐᓂᖃᑎᒌᓐᖏᑦᑐᓂᒃ ᐊᒻᒪᓗ ᑕᖅᑲᒃᑯᐊ ᖃᐅᔨᒪᑎᑕᐅᑦᑎᐊᕐᓗᑎᒃ ᖃᓄᐃᑦᑐᓂᒃ ᐃᒻᒥᒧᑦ ᑐᕌᖓᔪᓂᒃ ᑲᒪᒋᔭᖃᕐᒪᖔᖏᓐᓂᒃ. ᒪᓕᒐᖠᐅᖅᑏᑦ ᐊᕐᕌᒍᑕᒫᖅ ᓴᖅᑭᑦᑎᖃᑦᑕᕆᐊᖃᖅᐳᑦ ᓇᑭᑦ ᐊᒻᒪᓗ ᑭᓱᓂᑦ ᖃᑕᓐᖑᑎᒌᑦ.

ᐱᖁᑎᑖᖅᑐᕈᑎᒃᓴᖅᑖᓚᐅᕐᒪᖔᖏᓐᓂᒃ ᐊᒻᒪᓗ ᖃᔅᓯᓂᒃ ᑮᓇᐅᔾᔭᒃᓴᓚᐅᕐᓂᖏᓐᓂᒃ. ᐃᖅᑲᓇᐃᔮᖅᑖᕆᓯᒪᔭᓂ ᐊᑐᕐᓗᒍ, ᓇᓗᓇᐃᖅᓯᖃᑦᑕᕆᐊᓖᑦ ᐃᒻᒥᒧᑦ ᖃᓄᐃᑦᑐᑐᐃᓐᓇᕐᓂᒃ ᐊᒡᕕᐊᕈᑎᖃᕐᒪᖔᖏᓐᓂᒃ, ᐊᒻᒪᓗ ᐃᒻᒥᒧᑦ ᑐᕌᖓᔪᓂᒃ ᐱᑕᖃᕌᖓᑦ ᑲᑎᒪᖃᑕᐅᔪᓐᓇᓐᖏᓚᑦ ᐃᓱᒪᓕᐅᕈᑎᖃᕈᓐᓇᓐᖏᓚᓪᓘᓐᓃᑦ ᐃᒻᒥᒧᑦ ᑐᕌᖓᔪᒥᒃ ᐱᑕᖃᑐᐃᓐᓇᕆᐊᖃᖅᑐᖃᖅᐸᑦ. ᒪᓕᒐᓕᐅᖅᑏᑦ ᐊᒻᒪᓗ ᖃᑕᓐᖑᑎᖏᑦ ᑐᓐᓂᖅᑯᓯᐊᓂᒃ ᐱᔭᕆᐊᖃᓐᖏᓚᑦ ᐃᑲᔫᓯᐊᖅᑖᕈᓐᓇᓐᖏᓚᓪᓗ ᐃᖅᑲᓇᐃᔭᕐᓂᓂ ᐱᔾᔪᑎᒋᓗᒍ, ᑕᐃᒪᐃᓐᖏᑦᑐᓐᓇᖅᖢᓂ ᑭᓯᐊᓂ ᒪᓕᒐᑦ ᓴᓐᖏᔪᑦ ᒪᓕᒃᑕᐅᒃᐸᑕ ᐊᒻᒪᓗ ᐅᖃᐅᓯᕆᔭᐅᖏᓐᓇᖃᑦᑕᕆᐊᖃᖅᖢᑎᒃ.

ᒪᓕᑦᑎᐊᕆᐊᖃᕐᓂᖏᓐᓄᑦ ᐃᑲᔪᖅᑕᐅᖃᑦᑕᖅᐳᑦ ᒪᓕᒐᓕᐅᖅᑏᑦ ᐊᒻᒪᓗ ᐊᕐᕌᒍ ᐊᑕᐅᓯᐊᕐᓗᒍ ᑲᑎᒪᖃᑎᖃᖃᑦᑕᕆᐊᖃᖅᖢᑎᒃ ᐃᓗᐃᑦᑑᑦᑎᐊᕐᓂᕐᒧᑦ ᑲᒥᓴᓇᒥᒃ, ᑖᓐᓇᓗ ᑲᒥᓴᓇ ᖃᖓᑐᐃᓐᓇᖅ ᐅᖃᖃᑎᒋᔭᐅᔪᓐᓇᖅᖢᓂ, ᐊᒻᒪᓗ ᐃᓐᓇᕐᓄᑦ ᐊᐱᕆᔪᓐᓇᖅᖢᓂ ᐃᓄᐃᑦ ᐱᖅᑯᓯᑐᖃᖏᑦᑎᒍᑦ ᑐᓐᖓᕕᒋᔭᐅᔪᑦ ᒥᒃᓵᓅᖓᔪᓂᒃ. ᒪᓕᑦᑎᐊᕆᐊᖃᕐᓂᖅ ᑐᓐᖓᕕᒋᔭᐅᓪᓚᕆᒃᐳᖅ. ᑕᐃᒪᐃᑦᑑᒐᓗᐊᖅᑎᓪᓗᒍ, ᑭᓇᑐᐃᓐᓇᖅ ᐃᓗᐃᑦᑑᑦᑎᐊᕐᓂᕐᒧᑦ ᑲᒥᓴᓇᒥᒃ ᕿᒥᕐᕈᓇᖁᔨᔪᓐᓇᖅᐳᖅ ᒪᓕᒐᓕᐅᖅᑎ ᒪᓕᒐᓂᒃ ᒪᓕᓕᕋᓗᐊᕐᒪᖔᖓᓂᒃ, ᐊᒻᒪᓗ ᖃᐅᔨᔭᐅᒍᓂ ᒪᓕᒐᓂᒃ ᓯᖁᒥᑦᑎᓂᖓᓂᒃ, ᐊᑐᓕᖁᔭᒃᑯᑦ ᖃᓄᐃᓕᒋᐊᖅᑕᐅᔪᓐᓇᖅᐳᖅ, ᐃᓂᖅᑎᖅᑕᐅᔪᓐᓇᖅᖢᓂ ᐊᒻᒪᓗ ᑕᖅᑲᒃᑯᓄᖓ ᒪᒥᐊᒋᐊᖃᖅᑎᑕᐅᔪᓐᓇᕐᓗᓂ, ᐊᒻᒪᓗ ᑮᓇᐅᔭᐃᖅᑎᑕᐅᔪᓐᓇᕐᓗᓂ ᓯᖁᒥᑦᑎᓂᖓᓄᑦ ᐊᒻᒪᓗ ᒪᓕᒐᓕᐅᕐᕕᖕᒥ ᐊᓂᑕᐅᔪᓐᓇᖅᖢᓂ.

ᔫᓂ 9, 2004-ᖑᑎᓪᓗᒍ, ᑐᓴᒐᒃᓴᒃᑯᑦ ᑐᓴᖅᓴᐅᔪᖅᑕᖃᖃᑦᑕᓕᕐᒪᑦ ᐃᓗᐃᑦᑑᑦᑎᐊᕐᓂᕐᒧᑦ ᐱᖁᔭᕐᔪᐊᖅ ᓯᖁᒥᑕᐅᓂᕋᖅᑕᐅᓪᓗᓂ, ᒪᓕᒐᓕᐅᖅᑎᒧᑦ ᐊᐱᕆᔭᐅᓕᓚᐅᖅᓯᒪᔪᖓ ᖃᓄᐃᓕᐅᕐᓂᖓ ᕿᒥᕐᕈᓇᒃᑕᐅᖁᓪᓗᓂᐅᒃ, ᐊᒻᒪᓗ ᕿᒥᕐᕈᓇᓯᑲᐅᑎᒋᓚᐅᖅᓯᒪᓪᓗᒍ. ᑖᓐᓇ ᒪᓕᒐᓕᐅᖅᑎ ᐅᕙᓐᓂᒃ ᐃᑲᔪᑦᑎᐊᓚᐅᖅᓯᒪᔪᖅ ᐊᒻᒪᓗ ᖃᐅᔨᔭᓐᓄᑦ ᐅᓂᒃᑳᓕᐊᒃᑲ ᐅᖃᖅᑎᒧᑦ ᑐᓐᓂᖅᑯᑎᒋᓚᐅᖅᓯᒪᓪᓗᒋᑦ ᔫᓂ 24, 2004-ᒥ. ᖃᐅᔨᓚᐅᖅᓯᒪᔪᖓ ᑖᓐᓇ ᒪᓕᒐᓕᐅᖅᑎ ᓴᖅᑭᑦᑎᓐᖏᑦᑐᕕᓂᐅᓂᖓᓂᒃ ᐊᑭᓕᒃᓴᖃᕐᓂᕐᒥᓂᒃ, ᓴᖅᑭᑦᑎᔭᕆᐊᖃᖅᑎᑕᐅᓯᒪᒐᓗᐊᖅᖢᓂ ᐱᖁᔭᕐᔪᐊᒃᑯᑦ, ᐊᒻᒪᓗ ᐊᑐᓕᖁᔭᓕᐅᓕᓚᐅᖅᓯᒪᓪᓗᖓ ᖃᓄᐃᓕᒋᐊᕈᑕᐅᔪᓐᓇᖅᑐᓂᒃ, ᖃᓄᐃᓕᒋᐊᕈᑏᓪᓗ ᐊᖏᖅᑕᐅᓚᐅᖅᓯᒪᓪᓗᑎᒃ ᒪᓕᒐᓕᐅᕐᕕᖕᒧᑦ ᐊᒻᒪᓗ ᒪᓕᒃᑕᐅᓚᐅᖅᓯᒪᓪᓗᑎᒃ ᒪᓕᒐᓕᐅᖅᑎᒧᑦ. ᑕᒪᑐᒪ ᕿᒥᕐᕈᓇᖕᓂᕆᓚᐅᖅᑕᕐᒪ ᐅᓂᒃᑳᑦ ᖃᕆᓴᐅᔭᒃᑯᑦ ᕿᒥᕐᕈᓇᒃᑕᐅᔪᓐᓇᖅᑐᓄᑦ ᐃᓕᖃᓯᐅᑎᓯᒪᔭᒃᑲ.

ᒪᓕᒐᓕᐅᖅᑏᑦ ᐊᑐᓂ ᒪᓕᒐᓂᒃ ᒪᓕᑦᑎᐊᕋᓗᐊᕐᒪᖔᖏᓐᓂᒃ ᐃᖅᑲᓇᐃᔮᖃᖃᑦᑕᖅᑎᓪᓗᖓ, ᒪᓕᒐᓕᐅᖅᑎᓕᒫᑦ ᐅᖃᐅᑎᒃᑲᓐᓂᓚᐅᖅᓯᒪᔭᒃᑲ ᐃᓂᖅᑎᖅᖢᒋᓪᓗ ᐊᑭᖃᓐᖏᑦᑐᓂᒃ ᖃᖓᑦᑕᐅᑎᓂᒃ ᐱᖃᑦᑕᖁᓐᖏᖢᒋᑦ.

ᐃᓗᐃᑦᑑᑦᑎᐊᕐᓂᕐᒧᑦ ᐱᖁᔭᕐᔪᐊᖅᑎᒍᑦ ᒪᓕᒋᐊᖃᕐᓂᖅ ᒪᓕᒃᖢᒍ, ᒪᓕᒐᓕᐅᖅᑎᓕᒫᑦ ᐊᑐᓂ ᐊᑕᐅᓯᐊᖅᖢᒋᑦ ᑲᑎᒪᖃᑎᒋᓚᐅᖅᓯᒪᔭᒃᑲ ᕿᒥᕐᕈᓇᖃᑎᒋᓪᓗᒋᓪᓗ ᖃᑕᓐᖑᑎᒌᑦ ᑮᓇᐅᔾᔭᒃᓵᖏᑦ ᖃᓄᐃᓕᖓᖕᒪᖔᖏᓐᓂᒃ, ᐊᒻᒪᓗ ᑲᒪᒋᓪᓗᑎᒃᑯᑦ ᐱᖁᔭᕐᔪᐊᖅᑎᒍᑦ ᐊᖏᖅᓯᒪᐅᑎᖏᑦ. ᒪᓕᒐᓕᐅᖅᑏᑦ ᐊᑐᓂ ᑲᑎᒪᖃᑎᒋᓚᐅᖅᑕᒃᑲ, ᐊᐃᑉᐸᕆᔭᐅᔪᓪᓗ ᐃᓚᖏᑦ, ᒫᔾᔨ 9, 2005 ᐱᓇᓱᐊᕈᓯᖓᓂ ᐃᖃᓗᖕᓂ.

ᒪᓕᒐᓕᐅᕐᕕᖕᒧᑦ ᑎᑎᕋᖅᑎ ᐅᕙᓐᓂᒃ ᑐᓴᖅᑎᑦᑎᓚᐅᕐᒥᔪᖅ ᒪᓕᒐᓕᐅᖅᑎᓕᒫᑦ ᓇᓗᓇᐃᕆᐊᖃᖅᑕᒥᖕᓂᒃ ᑐᓂᓯᓯᒪᓕᕐᓂᕋᖅᖢᒋᑦ, ᑕᐃᒪᐃᑦᑕᕆᐊᖃᕐᓂᓂ ᐱᖁᔭᕐᔪᐊᒃᑯᑦ ᒪᓕᒃᖢᒋᑦ, ᐊᕐᕌᒍᑕᒫᖅᓯᐅᑏᑦ ᑮᓇᐅᔾᔭᒃᓵᖏᑦᑕ ᐅᓂᒃᑳᖏᓐᓂ ᒫᔾᔨ 11-ᖑᓚᐅᖅᑐᒥ, ᑖᓐᓇ ᐅᓪᓗᖅ ᐋᖅᑭᓚᐅᖅᓯᒪᒐᒃᑯᑦ ᑭᖑᓪᓕᖅᐸᐅᑕᐅᔪᓐᓇᕐᓂᕆᓂᐊᕐᓗᓂᐅᒃ ᐊᕐᕌᒍᒧᑦ 2004-5-ᒧᑦ. ᒪᓕᒐᓕᐅᖅᑏᑦ ᓇᓗᓇᐃᖅᓯᒪᐅᑎᖏᑦ ᑭᓇᑐᐃᓐᓇᕐᒧᑦ ᑕᑯᔭᐅᔪᓐᓇᖅᑐᖅ ᑎᑎᕋᖅᑎ ᐊᖅᑯᑎᒋᔭᐅᓗᓂ.

ᐱᖁᔭᕐᔪᐊᑉ ᒥᒃᓵᓅᖓᔪᑦ ᐊᒻᒪᓗ ᑎᑎᕋᕐᕕᒐ ᑕᖅᑲᒃᑯᓄᖓ ᒪᑐᐃᖓᑦᑎᐊᖅᑐᖅ ᖃᕆᓴᐅᔭᒃᑯᑦ, ᑐᕌᕈᑖ www.integritycom.ca ᐅᖃᐅᓰᑦ ᐊᔾᔨᒌᓐᖏᑦᑐᑦ ᐊᑐᖅᖢᒋᑦ, ᐊᒻᒪᓗ ᐅᖃᓕᒫᒐᕋᓛᓂᒃ ᐊᑐᐃᓐᓇᖅᑕᖃᕆᓪᓗᓂ ᐃᒪᓐᓇ ᑕᐃᒎᓯᓕᖕᓂᒃ ᐃᓗᐃᑦᑑᑦᑎᐊᕐᓂᖅ - ᓄᓇᕗᑦ ᒪᓕᒐᓕᐅᕐᕕᖓᓐᓄᑦ ᒪᓕᒐᓕᐅᖅᑏᑦ ᐊᖏᖅᓯᒪᑦᑎᐊᕐᓂᖏᑦ, ᑖᒃᑯᐊᓗ ᒪᓕᒐᓕᐅᖅᑏᑦ ᑐᒃᓯᕋᕐᕕᒋᔪᓐᓇᖅᖢᒋᑦ ᐊᔾᔨᖏᓐᓂᒃ ᐱᔪᒪᓐᓂᕈᕕᑦ.

ᒪᓕᒐᓕᐅᖅᑏᑦ ᖃᐅᔨᒋᐊᕈᒪᒍᑎᒃ ᐊᑐᐃᓐᓇᖃᕐᓂᐊᕐᒪᑕ, ᒪᓕᒐᓕᐅᖅᑏᑦ ᐊᑐᓂ ᐅᖃᓕᒫᒐᖁᑎᖃᖅᑐᑦ ᐃᓗᐃᑦᑑᑦᑎᐊᕐᓂᕐᒧᑦ ᐱᖁᔭᕐᔪᐊᓕᕆᔪᓂᒃ, ᑖᒃᑯᐊᓗ ᓄᑖᓂᒃ ᓴᖅᑭᑦᑐᖃᑐᐊᕌᖓᑦ ᐃᓕᓯᕝᕕᐅᒃᑲᓐᓂᖃᑦᑕᑐᐃᓐᓇᕆᐊᖃᖅᖢᑎᒃ.

ᐃᖃᓗᖕᓄᐊᕆᐊᖃᕌᖓᒪ ᐃᖃᓗᖕᓄᐊᖃᑦᑕᖅᑐᖓ, ᐊᒻᒪᓗ ᐊᕐᕌᒍᓕᒫᖅ ᑕᐃᒪᓐᖓᓕᒫᖅ ᐊᑐᐃᓐᓇᐅᖃᑦᑕᖅᖢᖓ ᖃᕆᓴᐅᔭᒃᑯᑦ, ᓱᒃᑲᔪᒃᑯᑦ, ᐅᖄᓚᐅᑎᒃᑯᑦ ᐊᒻᒪᓗ ᑎᑎᖅᑲᑎᒍᑦ, ᐊᐱᕆᔭᐅᔪᓐᓇᖅᖢᓂ ᓯᕗᓕᖅᑎᒧᑦ, ᒪᓕᒐᓕᐅᖅᑎᑐᐃᓐᓇᕐᓄᑦ, ᒥᓂᔅᑕᓄᑦ, ᐃᖅᑲᓇᐃᔭᖅᑎᖏᓐᓄᑦ ᐊᒻᒪᓗ ᐊᖓᔪᖅᑲᐅᑎᕈᔪᖕᓄᑦ, ᐊᐱᕆᔭᐅᖃᑦᑕᕈᓐᓇᖅᖢᖓᓗ ᓄᓇᕗᒻᒥᐅᓄᑦ ᐊᒻᒪᓗ ᐱᕙᓪᓕᐊᔪᓕᕆᔨᓄᑦ.

ᑎᑎᕋᖅᑎᒧᑦ ᑎᓕᔭᐅᓂᕋ ᒪᓕᒃᖢᒍ, ᐋᖅᑭᒃᓱᐃᓕᓚᐅᖅᓯᒪᔪᖓ ᐃᖅᑲᓇᐃᔭᖅᑎᑦᑎᐊᕙᐅᔭᕆᐊᖃᕐᓂᕐᒧᑦ ᒪᓕᒐᓂᒃ ᐊᖏᖅᑕᐅᓚᐅᖅᓯᒪᔪᓂᒃ ᒪᓕᒐᓕᐅᕐᕕᖕᒧᑦ ᐃᖅᑲᓇᐃᔭᖅᑎᒋᔭᐅᔪᓄᑦ. ᖁᕕᐊᓲᑎᕙᒃᑲ ᑕᐃᒪᐃᑦᑐᓂᒃ ᐃᒻᒥᒃᑰᖅᖢᑎᒃ ᐋᖅᑭᒃᓯᓚᐅᕐᓂᖏᓐᓂᒃ.

ᐋᖅᑭᐊᓂᒃᓯᓯᒪᓐᖏᑦᑐᒍᑦ ᓱᓕ ᐊᑯᓂᐊᓗᒃ ᐊᑐᓕᖁᔭᓕᐅᖅᑕᐅᓯᒪᓕᖅᑐᒥᒃ ᐱᔾᔪᑎᓕᖕᒥᒃ ᒥᓂᔅᑕᐃᑦ ᑐᖏᓕᖏᑦ ᐊᒻᒪᓗ ᓇᓕᖅᑯᐊᖏᓐᓂᒃ ᐃᖅᑲᓇᐃᔮᓖᑦ ᒥᓂᔅᑕᐃᑦ ᒪᓕᒋᐊᖃᖅᑕᖏᓐᓂᒃ ᒪᓕᒐᓂᒃ ᐊᑐᖅᑎᑕᐅᓕᕐᓂᐊᕐᓂᖏᓐᓂᒃ.

ᒪᓕᒐᓕᐅᖅᑏᑦ ᐃᖅᑲᐃᑎᑕᐅᒃᑲᓐᓂᓚᐅᖅᑐᑦ ᒪᓕᒋᐊᓕᖏᓐᓂᒃ ᐃᓗᐃᑦᑑᑦᑎᐊᕐᓂᕐᒧᑦ ᐱᖁᔭᕐᔪᐊᑦ ᐃᓗᐊᓃᑦᑐᒥᒃ ᓈᓴᐅᒻᒥᒃ 58-ᒥᒃ, ᐅᖃᖅᓯᒪᖕᒪᑦ ᑕᓪᓕᒪᑦ ᐊᕐᕌᒍᑦ ᐱᖁᔭᕐᔪᐊᖅ ᐊᑐᓕᖅᑎᑕᐅᓚᐅᖅᑎᓪᓗᒍ (ᔪᓚᐃ 1, 2001) "ᒪᓕᒐᓕᐅᕐᕕᒃ ᕿᒥᕐᕈᓇᓯᒋᐊᕐᓂᐊᖅᐳᖅ ᑕᒪᑐᒥᖓ ᐱᖁᔭᕐᔪᐊᕐᒥᒃ" ᐊᒻᒪᓗ ᕿᒥᕐᕈᓇᓯᒋᐊᕐᕕᖓᑕ ᐊᕐᕌᒍᓪᓗᐊᖅ ᓈᓚᐅᖅᑎᓐᓇᒍ "ᐃᓱᒪᒃᓴᖅᓯᐅᕈᑎᖃᕐᓂᐊᖅᐳᑦ ᖃᓄᐃᑦᑐᑐᐃᓐᓇᕐᓂᒃ ᐋᖅᑭᒋᐊᕈᑎᒃᓴᓂᒃ ᓴᖅᑭᑦᑐᕕᓂᕐᓂᒃ ᕿᒥᕐᕈᓇᖕᓂᕆᓚᐅᖅᑕᖏᓐᓂ".

ᓄᓇᕗᒻᒥ ᓂᕈᐊᕐᓂᓕᕆᓂᕐᒧᑦ ᐱᖁᔭᕐᔪᐊᖅ

ᓯᕗᓪᓕᖅᐹᒥᒃ ᓂᕈᐊᕐᓂᖅᑕᖃᓚᐅᖅᑎᓪᓗᒍ ᐊᑐᖅᖢᒍ ᓄᑖᑦ ᓄᓇᕗᒻᒥ ᓂᕈᐊᕐᓂᓕᕆᓂᕐᒧᑦ ᐱᖁᔭᕐᔪᐊᑦ, ᐸᓖᓯᒃᑯᑦ, ᓄᓇᕗᒻᒥ ᓂᕈᐊᖅᑐᓕᕆᔨ ᐅᖃᐱᓘᑎᖃᕐᒪᑦ, ᐸᓯᔭᒃᓴᓐᖑᖅᑎᑦᑎᔭᕆᐊᖃᓕᓚᐅᖅᑐᑦ 21-ᓂᒃ ᓂᕈᐊᒐᒃᓴᓐᖑᖅᑎᑕᐅᓚᐅᖅᓯᒪᔪᓂᒃ ᐊᒻᒪᓗ ᑭᒡᒐᖅᑐᐃᔨᖏᓐᓂᒃ ᒪᓕᓐᖏᓐᓂᖏᓐᓂᒃ ᑮᓇᐅᔭᑦ ᐅᓂᒃᑳᖏᓐᓂᒃ ᓴᖅᑭᑕᐅᔭᕆᐊᖃᕐᓂᖏᓐᓂᒃ. ᐱᖁᔭᕐᔪᐊᖅᑎᒍᑦ ᐱᔪᓐᓇᕐᓂᖅᑖᖅᑎᑕᐅᓯᒪᓂᕋ ᒪᓕᒃᖢᒍ, ᐊᖏᖅᓯᒪᓂᕐᒧᑦ ᐊᖏᕈᑎᓂᒃ ᐊᑎᓕᐅᖅᑎᓚᐅᖅᓯᒪᔭᒃᑲ ᐃᓘᓐᓇᖏᑦ ᐸᓯᔭᒃᓴᓐᖑᖅᑎᑕᐅᔪᑦ. ᐊᖏᖃᑎᒌᒍᑎᓂᒃ ᐊᑎᓕᐅᕆᓚᐅᖅᑐᑦ 12 ᐸᓯᔭᒃᓴᓐᖑᖅᑎᑕᐅᓚᐅᖅᑐᑦ, ᑕᓪᓕᒪᓪᓗ ᒪᓕᓚᐅᖅᖢᑎᒃ ᐱᒋᐊᖅᑎᑕᐅᓯᒪᔪᓂᒃ, ᐊᒻᒪᓗ ᒪᓕᓚᐅᕐᓂᖏᓐᓄᑦ ᐸᓯᔭᒃᓴᓐᖑᖅᑎᑕᐅᔾᔪᑎᖏᑦ ᐊᒧᔭᐅᓚᐅᖅᓯᒪᓪᓗᑎᒃ.

ᓂᕈᐊᖅᑐᓕᕆᔨ, ᒪᓕᒐᕐᓂᐊᖅᑎᖓ, ᐸᓖᓯᒃᑯᑦ, ᐊᒻᒪᓗ ᐅᑭᐅᖅᑕᖅᑐᒥ ᑲᓇᑕᐅᑉ ᒐᕙᒪᒃᑯᖏᓐᓄᓪᓗ ᒪᓕᒐᕐᓂᐊᖅᑎᖏᑦ ᐃᖃᓗᖕᓂ ᑲᑎᖃᑎᒋᓚᐅᖅᓯᒪᔭᒃᑲ ᐅᓪᓘᖕᓄᑦ ᒪᕐᕉᖕᓄᑦ, ᕿᒥᕐᕈᓇᖃᑎᒋᓪᓗᒋᓪᓗ ᖃᓄᐃᑉᐹᓪᓕᐅᑕᐅᓚᐅᕐᒪᖔᑦ ᑕᒪᓐᓇ ᓄᑖᖅ ᐱᖁᔭᕐᔪᐊᖅ, ᐊᒻᒪᓗ ᐃᓱᒪᒃᓴᖅᓯᐅᖃᑎᒋᓚᐅᖅᖢᒋᑦ ᖃᓄᖅ ᑕᒪᓐᓇ ᐱᖁᔭᕐᔪᐊᕐᒥᒃ ᒪᓕᒃᑎᑦᑎᔭᕆᐊᖃᕐᓂᖅ ᐱᕈᓐᓇᒃᐹᓪᓕᖅᑎᑕᐅᔪᓐᓇᕐᒪᖔᖓ. ᑐᑭᓯᐅᒪᓂᕋ ᒪᓕᒃᖢᒍ.

ᓂᕈᐊᖅᑐᓕᕆᔨᐅᑉ ᐊᕐᕌᒍᑕᒫᖅᓯᐅᑎᖏᑦᑕ ᐅᓂᒃᑳᖏᑦ ᐃᓗᓕᖃᖅᑐᑦ ᑭᓱᓂᒃ ᐅᔾᔨᕆᓚᐅᕐᒪᖔᖓᓂᒃ ᐊᒻᒪᓗ ᐊᑐᓕᖁᔭᓕᐊᖏᓐᓂᒃ, ᒪᓕᒐᓕᐅᕐᕕᒡᓗ ᖁᕕᐊᓲᑎᓪᓗᒍ ᑕᐃᒪᓐᓇ ᐋᖅᑭᒃᓯᓚᐅᕐᓂᖏᓐᓂᒃ.

ᖁᔭᓐᓇᒦᖅᑕᒃᑲ

ᒐᕙᒪᖃᕐᕖᑦ ᐊᓯᕗᑦ ᑲᑎᒪᖃᑎᒋᖃᑦᑕᕈᓐᓇᕐᓂᒃᑲ ᐊᒃᓱᐊᓗᒃ ᐃᑲᔫᑎᖃᖃᑦᑕᖅᑐᑦ ᐱᓗᐊᕐᓗᒋᑦ ᑲᓇᑕᒥ ᐃᒻᒥᒧᑦ ᐊᒡᕕᐊᕈᑎᖃᕐᓂᕐᒧᑦ ᑲᑐᔾᔨᖃᑎᒌᑦ, ᒐᕙᒪᒃᑯᑦ ᐃᖅᑲᓇᐃᔭᑦᑎᐊᕆᐊᖃᕐᓂᖏᓐᓄᑦ ᑲᑎᒪᓖᑦ ᐊᒻᒪᓗ ᑲᓇᑕᒥ ᐊᓪᓚᕕᓕᕆᓂᕐᒧᑦ ᑲᑎᒪᔨᑦ, ᐱᓗᐊᕐᓗᒍ ᑲᓇᑕᒥ ᐃᒻᒥᒧᑦ ᐊᒡᕕᐊᕈᑎᖃᕐᓂᕐᒧᑦ ᑲᑐᔾᔨᖃᑎᒌᑦ ᐊᕐᕌᒍᑕᒫᖅ ᑲᑎᒪᕕᒡᔪᐊᕐᓂᕆᖃᑦᑕᖅᑕᖏᑦ ᕼᐋᓕᕚᒃᓯᒥ, ᓴᖅᑭᑕᐅᓪᓗᓂ ᓅᕙ ᓯᑰᓯᐊᑉ ᒪᓕᒐᓕᐅᕐᕕᖓᓐᓄᑦ, ᐊᒻᒪᓗ ᑲᓇᑕᒥ ᐊᓪᓚᕕᓕᕆᓂᕐᒧᑦ ᑲᑎᒪᔨᑦ ᐊᕐᕌᒍᑕᒫᖅ ᑲᑎᒪᕕᒡᔪᐊᕐᓂᕆᖃᑦᑕᖅᑕᖓᑦ ᑐᕌᓐᑐᒥ.

ᖁᔭᓐᓇᒦᕌᓂᒍᓐᓇᓐᖏᒻᒥᔭᒃᑲ ᒪᓕᒐᓕᐅᕐᕕᖕᒧᑦ ᑎᑎᕋᖅᑎ ᐊᒻᒪᓗ ᐃᖅᑲᓇᐃᔭᖅᑎᖏᑦ, ᒪᓕᒐᕐᓂᐊᖅᑎᖓᑦ, ᓄᓇᕗᒻᒥ ᓂᕈᐊᖅᑐᓕᕆᔨ ᐊᒻᒪᓗ ᐸᓖᓯᒃᑯᑦ ᐊᒃᓱᐊᓗᒃ ᐃᑲᔪᖃᑦᑕᕐᒪᑕ.

ᒪᓕᒐᓕᐅᕐᕕᖕᒧᑦ ᒪᓕᒐᓕᐅᖅᑏᑦ ᖁᔭᓐᓇᒦᖅᐸᒃᑲ ᓇᓗᖅᑯᑎᒋᔭᐅᓐᖏᓐᓂᒃᑯᑦ ᓂᕈᐊᖅᑕᐅᒃᑲᓐᓂᕈᓐᓇᕋᒪ ᑕᓪᓕᒪᒃᑲᓐᓂᕐᓄᑦ ᐊᕐᕌᒍᓄᑦ, ᐊᒻᒪᓗ ᐅᕙᓐᓂᒃ ᐃᑲᔪᑦᑎᐊᖃᑦᑕᕈᓐᓇᓚᐅᕐᒪᑕ ᐊᖏᖅᓯᒪᑦᑎᐊᖏᓐᓇᕐᒪᑕᓗ ᐃᓗᐃᑦᑑᑦᑎᐊᕆᐊᖃᕐᓂᕐᒧᑦ ᑐᓐᖓᕕᓕᐊᕆᔭᐅᓯᒪᔪᒥᒃ.

ᐊᐃᕐᕆᓕ 18, 2005 ᕌᐳᑦ ᔅᑖᓐᐱᐅᕆ

AttachmentSize
2004-2005 (PDF)182.67 KB