ᓱᓕᑦᑎᐊᕐᓂᕐᒧᑦ ᑲᒥᓴᓇ ᑎᒃᑯᐊᖅᑕᐅᕙᒃᐳᖅ ᓄᓇᕗᑦ ᑲᒥᓴᓇᖓᓐᓄᑦ, ᒪᓕᒃᖢᓂᒋᑦ ᒪᓕᒐᓕᐅᕐᕕᐅᑉ ᐊᑐᓕᖁᔭᓕᐊᕕᓂᖏᑦ.  ᑎᒃᑯᐊᖅᑕᐅᔪᖅ ᑕᕝᕙᓃᓲᖑᕗᖅ ᑕᓪᓕᒪᓄᑦ ᐊᕐᕌᒍᓄᑦ.  ᒪᓕᒐᓕᐅᕐᕕᖕᒧᑦ ᑲᒪᔨᓐᖑᖅᑎᑕᐅᓯᒪᕗᖅ ᐊᒃᑐᐃᓂᖃᓐᖏᖢᓂ ᐊᒻᒪ ᐃᓂᖓᓐᓂᑦ ᐲᖅᑕᐅᔪᓐᓇᓐᖏᖢᓂ, ᑭᓯᐊᓂ ᐱᔾᔪᑎᒃᓴᖃᑦᑎᐊᖅᐸᑦ ᐅᕝᕙᓘᓐᓃᑦ ᐃᖅᑲᓇᐃᔮᒥᓃᑦᑐᓐᓇᐃᓪᓕᓐᓂᖅᐸᑦ ᐊᔪᓕᕐᓂᖅ ᐱᔾᔪᑎᒋᓪᓗᒍ.  ᐃᔾᔪᔪᖁᑎᓂᒃ ᐸᑎᒻᒥᓪᓗᓂ ᓱᓕᓂᐊᕐᓂᕋᖅᓯᒪᕗᖅ ᐃᖅᑲᓇᐃᔮᒥᓂᒃ ᐱᓕᕆᓂᐊᕐᓂᕋᖅᓯᒪᓪᓗᓂ ᐃᓚᐃᓐᓈᓐᖏᓪᓗᓂ, ᐊᒻᒪ ᑲᓐᖑᓇᖅᑑᑎᒋᔭᐅᔪᑦ ᐅᕝᕙᓘᓐᓃᑦ ᖃᐅᔨᒪᔨᑕᕆᔭᐅᓪᓗᓂ ᖃᓄᐃᓕᐅᖁᔨᓂᕕᓂᕐᓂᒃ ᑕᖅᑲᐅᓐᖓᖅᓯᓂᐊᓐᖏᓐᓂᕋᖅᖢᓂ, ᑭᓯᐊᓂ ᓱᓕᑦᑎᐊᕐᓂᕐᒧᑦ ᐱᖁᔭᕐᔪᐊᑉ ᐃᓗᓕᖏᑦᑎᒍᑦ ᐱᔪᓐᓇᖅᑎᑕᐅᒍᓂ.  ᓱᓕᑦᑎᐊᕐᓂᕐᒧᑦ ᑲᒥᓴᓇᐅᑉ ᐃᓱᒪᓕᐊᖏᑦ ᐊᔪᐃᓐᓈᕆᔾᔪᑕᐅᔪᓐᓇᓐᖏᑦᑐᑦ.

ᕌᐳᑦ ᔅᑖᓐᐱᐅᕆ ᓄᓇᕗᒻᒥ ᓯᕗᓪᓕᖅᐹᑦᑎᐊᖑᓪᓗᓂ ᓱᓕᑦᑎᐊᕐᓂᕐᒧᑦ ᑲᒥᓴᓇᒋᔭᐅᓚᐅᖅᓯᒪᔪᖅ 1999−ᒥᑦ 2008−ᒧᑦ.  ᓄᐊᒪᓐ ᐱᑭᐅᓪ ᓱᓕᑦᑎᐊᕐᓂᕐᒧᑦ ᑲᒥᓴᓇᒋᔭᐅᓚᐅᖅᑐᖅ ᑕᓪᓕᒪᓄᑦ ᐊᕐᕌᒍᓄᑦ, ᐱᒋᐊᖅᖢᓂ 2008−ᒥᑦ 2013−ᒧᑦ ᑎᑭᖢᒍ.

ᒫᓐᓇ ᓱᓕᑦᑎᐊᕐᓂᕐᒧᑦ ᑲᒥᓴᓇᕆᔭᐅᕗᖅ ᑕᑦ ᕆᓴᐅ.  ᐃᖅᑲᖅᑐᐃᔨᕕᓂᐅᓪᓗᓂ ᓄᖅᑲᕕᒃᓯᒪᓕᖅᑐᖅ, ᐊᒻᒪ ᓄᓇᕗᒻᒥ ᓱᓕᑦᑎᐊᕐᓂᕐᒧᑦ ᑲᒥᓴᓇᐅᑉ ᐃᓂᖓᓄᑦ ᑎᒃᑯᐊᖅᑕᐅᓚᐅᖅᓯᒪᓪᓗᓂ ᓯᑎᐱᕆ 10, 2013−ᒥ, ᐃᓕᓯᒪᔪᒃᓴᐅᑕᐅᓪᓗᓂ ᑕᓪᓕᒪᓄᑦ ᐊᕐᕌᒍᓄᑦ, ᐃᓕᔭᐅᓚᐅᖅᖢᓂᓗ ᒪᓕᒐᓕᐅᕐᕕᐅᑉ ᐊᑐᓕᖁᔭᓕᐊᕕᓂᖏᑦ ᒪᓕᒃᑕᐅᓪᓗᑎᒃ.

ᑭᓇᐅᖕᒪᖔᖓᓂᒃ ᐅᓂᒃᑳᑦ ᓇᐃᒡᓕᑎᖅᓯᒪᔪᑦ:  ᑕᑦ ᕆᓴᐅ ᓄᓇᑦᓯᐊᕐᒥ ᐃᖅᑲᖅᑐᐃᔨᕐᔪᐊᒃᑯᓐᓄᑦ ᐃᖅᑲᖅᑐᐃᔨᐅᓚᐅᖅᓯᒪᔪᖅ, ᐊᒻᒪ ᓄᓇᑦᓯᐊᕐᒥ ᐊᔪᐃᓐᓈᕆᕕᐅᑉ ᐃᖅᑲᖅᑐᐃᕕᖓᓂ ᐊᒻᒪ ᔫᑳᓐᒥ ᐊᔪᕿᓐᓈᕆᕕᐅᑉ ᐃᖅᑲᖅᑐᐃᕕᖓᓂ 1988−ᒥᑦ 2012−ᒧᑦ ᑎᑭᖢᒍ.  ᓄᓇᓄᒻᒥ ᐃᖅᑲᖅᑐᐃᔨᐅᓚᐅᖅᓯᒪᖕᒥᔪᖅ ᐊᒻᒪ ᓄᓇᕗᒻᒥ ᐊᔪᐃᓐᓈᕆᕕᐅᑉ ᐃᖅᑲᖅᑐᐃᕕᖓᓂ 1999-ᒥᑦ 2012−ᒧᑦ ᑎᑭᖢᒍ.

ᑕᑦ ᕆᓴᐅ 1997−ᒥ ᐊᒻᒪ 2011−ᒥ ᐃᒃᓯᕙᐅᑕᕆᔭᐅᓚᐅᖅᑐᖅ ᓄᓇᕗᒻᒥ ᓂᕈᐊᕐᕖᑦ ᑭᒡᓕᓕᐅᕆᔩᑦ ᑲᑎᒪᔨᖏᓐᓄᑦ.

ᐃᖅᑲᖅᑐᐃᔨᐅᓂᕐᒧᑦ ᑎᒃᑯᐊᖅᑕᐅᓚᐅᓐᖏᓐᓂᕐᒥᓂ, ᑕᑦ ᕆᓴᐅ ᓄᓇᑦᓯᐊᕐᒥ ᒪᓕᒐᓕᐅᕐᕕᐊᓄᑦ ᒪᓕᒐᓕᐅᖅᑎᐅᖃᑕᐅᓚᐅᖅᓯᒪᔪᖅ 1984−ᒥᑦ 1988−ᒧᑦ ᑎᑭᖢᒍ.

ᓱᓕᑦᑎᐊᕐᓂᕐᒧᑦ ᑲᒥᓴᓇᐅᑉ ᐱᔭᒃᓴᖅᑖᕆᓯᒪᔭᖏᑦ

ᓱᓕᑦᑎᐊᕐᓂᕐᒧᑦ ᑲᒥᓴᓇᐅᑉ ᐱᔭᒃᓴᖅᑖᕆᓪᓗᐊᑕᖅᓯᒪᔭᖓᑦ ᒪᓕᒐᓕᐅᖅᑎᓂᒃ ᐃᑲᔪᖃᑦᑕᕐᓗᓂ ᐊᖏᖅᓯᒪᑦᑎᐊᕋᓱᒃᑎᓪᓗᒋᑦ ᓱᓕᑦᑎᐊᕐᓂᕐᒥᒃ ᑐᓐᖓᕕᖃᕐᓂᐊᕐᓂᕐᒥᒃ ᐊᒻᒪ ᒪᓕᒋᐊᖃᕐᓂᖏᓐᓂᒃ ᓱᓕᑦᑎᐊᕐᓂᕐᒧᑦ ᐱᖁᔭᕐᔪᐊᕐᒥᒃ.  ᓱᓕᑦᑎᐊᕐᓂᕐᒧᑦ ᑲᒥᓴᓇ ᑕᐃᑲᓃᔾᔪᑎᖃᖅᐳᖅ ᐃᑲᔪᖅᑎᒋᔭᐅᓂᐊᕋᒥ ᒪᓕᒐᓕᐅᖅᑎᓄᑦ.  ᓇᓕᐊᑐᐃᓐᓇᖅ ᒪᓕᒐᓕᐅᖅᑎ ᖃᖓᑐᐃᓐᓇᑦᑎᐊᖅ ᐊᐱᕆᔪᓐᓇᖅᐳᑦ ᓱᓕᑦᑎᐊᕐᓂᕐᒧᑦ ᑲᒥᓴᓇᒥᒃ, ᓱᓕᑦᑎᐊᕐᓂᕐᒧᑦ ᐱᖁᔭᕐᔪᐊᖅᑎᒍᑦ ᐊᖏᕈᑎᒋᓯᒪᔭᒥᑕ ᒥᒃᓵᓄᑦ ᖃᐅᔨᒪᔨᑕᖃᕐᓂᐊᕐᒪᑦ.  ᒪᓕᒐᓕᐅᖅᑎᓂᒃ ᐅᖃᖃᑎᖃᖅᑎᓪᓗᒍ, ᐅᖃᐅᔾᔫᑎᖏᑦ, ᐅᖃᐅᓯᒃᑰᕋᓗᐊᖅᐸᑕ ᐅᕝᕙᓘᓐᓃᑦ ᑎᑎᕋᖅᓯᒪᒐᓗᐊᖅᐸᑕ, ᑲᓐᖑᓇᖅᑑᑎᑕᐅᖏᓐᓇᐅᔭᖅᑐᑦ, ᐱᓐᖏᑕᑐᐊᕆᓪᓗᒋᑦ ᖃᔅᓰᓐᓇᐃᑦ ᓇᓗᓇᐃᔭᖅᑕᐅᓯᒪᑦᑎᐊᖅᑐᑦ.

 “ᖃᐅᔨᒪᔨᑕᕆᔭᐅᓂᕐᒥᒃ” ᓱᓕᑦᑎᐊᕐᓂᕐᒧᑦ ᑲᒥᓴᓇ ᒪᓕᒐᓕᐅᖅᑎᓄᑦ, ᓱᓕᑦᑎᐊᕐᓂᕐᒧᑦ ᑲᒥᓴᓇ ᓱᓕᑦᑎᐊᕐᓂᕐᒧᑦ ᐱᖁᔭᕐᔪᐊᑉ ᐃᓗᓕᖏᑦᑎᒍᑦ ᖃᐅᔨᓴᐃᖃᑦᑕᕆᐊᖃᕐᒥᔪᖅ ᓯᖁᒥᑦᑎᔪᖃᕐᓂᕋᖅᑕᐅᔪᖃᖅᑎᓪᓗᒍ, ᓲᕐᓗ ᓇᓗᓇᐃᖅᓯᓪᓚᕆᒐᓱᒃᖢᓂ ᒪᓕᒐᓕᐅᖅᑎ ᐱᖁᔭᕐᔪᐊᕐᓂᒃ ᓯᖁᒥᑦᑎᓪᓚᕆᓚᐅᕐᒪᖔᖓ.

ᒪᓕᒐᓕᐅᖅᑎ ᓯᖁᒥᑦᑎᓂᕋᐃᔾᔪᑎᖏᑦ (ᐆᒃᑑᑎᒋᓗᒍ, ᓯᖁᒥᑦᑎᓂᕋᐃᔪᖃᖅᐸᑦ ᓱᓕᑦᑎᐊᕐᓂᕐᒧᑦ ᐱᖁᔭᕐᔪᐊᑉ ᐃᓗᓕᖏᓐᓃᑦᑐᓂᒃ) ᓱᓕᑦᑎᐊᕐᓂᕐᒧᑦ ᑲᒥᓴᓇᒧᑦ ᐱᔭᐅᒃᐸᑕ, ᑖᓐᓇ ᓱᓕᑦᑎᐊᕐᓂᕐᒧᑦ ᑲᒥᓴᓇ ᖃᐅᔨᓴᐃᓕᕋᔭᖅᑐᖅ ᐊᒻᒪ ᐅᓂᒃᑲᐅᓯᕆᓗᓂᒋᑦ ᖃᐅᔨᒪᔨ, ᒪᓕᒡᓗᒋᑦ ᐱᖁᔭᕐᔪᐊᑉ ᐃᓗᐊᓃᑦᑐᑦ ᓈᓴᐅᑎᓖᑦ 36-ᒥᑦ 45−ᒧᑦ ᑎᑭᓪᓗᒍ.

ᑭᓇᑐᐃᓐᓇᖅ ᐃᓄᒃ, ᐃᓚᓕᐅᓪᓗᒍ ᒪᓕᒐᓕᐅᖅᑎᐅᖃᑕᐅᔪᖅ, ᓱᓕᑦᑎᐊᕐᓂᕐᒧᑦ ᑲᒥᓴᓇᒥᒃ ᕿᒥᕐᕈᖁᔨᔪᓐᓇᖅᑐᖅ ᓱᓕᑦᑎᐊᕐᓂᕐᒧᑦ ᐱᖁᔭᕐᔪᐊᖅ ᓯᖁᒥᑕᐅᓂᕋᖅᑕᐅᒃᐸᑦ ᒪᓕᒐᓕᐅᖅᑎᒧᑦ.  ᒐᕙᒪᒃᑯᓐᓄᑦ ᐃᖅᑲᓇᐃᔭᖅᑏᑦ ᐊᖓᔪᖅᑲᐅᑕᐅᔪᑦ ᐃᓚᖏᑦ ᓱᓕᑦᑎᐊᕐᓂᕐᒧᑦ ᑲᒥᓴᓇᒥᒃ ᕿᒥᕐᕈᒋᐊᖁᔨᔪᓐᓇᓐᖏᑦᑐᑦ ᐱᖁᔭᕐᔪᐊᖅᑎᒍᑦ.  ᑖᒃᑯᐊ ᑭᒃᑰᖕᒪᖔᖏᑦ ᓇᓗᓇᐃᖅᑕᐅᓯᒪᕗᑦ ᐱᖁᔭᕐᔪᐊᑉ ᐃᓗᐊᒍᑦ ᓈᓴᐅᑎᓕᒃ 36(1.1).  ᒪᓕᒐᓕᐅᕐᕕᒃ ᐃᒻᒥᒃᑯᑦ, ᐱᖁᔨᕗᖔᒃᑯᑦ, ᓱᓕᑦᑎᐊᕐᓂᕐᒥᒃ ᑲᒥᓴᓇᐅᔪᒥᒃ ᕿᒥᕐᕈᔭᐅᖁᔨᔪᓐᓇᖅᑐᑦ.  ᓯᕗᓕᖅᑎ ᕿᒥᕐᕈᔭᐅᖁᔨᔪᓐᓇᖅᑐᖅ ᒥᓂᔅᑕᒥᒃ.  ᓱᓕᑦᑎᐊᕐᓂᕐᒧᑦ ᑲᒥᓴᓇ ᐃᒻᒥᓂᒃ ᐱᒋᐊᖅᑎᑦᑎᔪᓐᓇᖅᑐᖅ ᕿᒥᕐᕈᓂᕐᒥᒃ.

ᓱᓕᑦᑎᐊᕐᓂᕐᒧᑦ ᑲᒥᓴᓇᒥᒃ ᕿᒥᕐᕈᒋᐊᖁᔨᔾᔪᑦ ᑎᑎᖅᑲᑎᒎᕆᐊᖃᖅᐳᑦ, ᑕᕝᕘᓇᓗ ᓇᓗᓇᐃᕐᓗᓂᒋᑦ ᓯᖁᒥᑦᑎᓂᕋᐅᑎᖏᑦ, ᓯᖁᒥᑦᑎᓂᐅᓚᐅᖅᑑᓪᓗ ᓱᓕᔪᕐᓇᐅᑎᖏᑦ ᓇᓗᓇᐃᕐᓗᓂᒋᑦ, ᐊᒻᒪ ᐃᑲᔪᖅᓲᑎᖃᕐᓗᑎᒃ ᕿᒥᕐᕈᖁᔨᔫᑉ ᐸᑎᒥᓐᓂᒃᑯᑦ ᓱᓕᓂᐊᕐᓂᕋᐅᑎᓂᒃ.  ᓱᓕᑦᑎᐊᕐᓂᕐᒧᑦ ᑲᒥᓴᓇ ᐱᒍᓂ ᕿᒥᕐᕈᖁᔨᔾᔪᑎᓂᒃ, ᖃᐅᔨᒃᑲᐃᕗᖅ ᒪᓕᒐᓕᐅᖅᑎᒥᒃ ᓯᖁᒥᑦᑎᓂᕋᖅᑕᐅᔪᒥᒃ, ᐊᒻᒪ ᕿᒥᕐᕈᓂᖓ ᐱᒋᐊᕈᓐᓇᖅᓯᑐᐊᖅᐸᑦ ᐱᒋᐊᕐᓗᓂᐅᒃ.  ᓱᓕᑦᑎᐊᕐᓂᕐᒧᑦ ᑲᒥᓴᓇ ᐃᓱᒪᖅᓱᖅᐳᖅ ᕿᒥᕐᕈᓂᖓ ᒪᑐᓯᒪᓂᐊᕐᒪᖔᖓ ᐅᕝᕙᓘᓐᓃᑦ ᑕᖅᑲᐅᖓ ᒪᑐᐃᖓᑎᓪᓗᓂᐅᒃ.  ᓱᓕᑦᑎᐊᕐᓂᕐᒧᑦ ᑲᒥᓴᓇ ᐅᓂᒃᑳᓕᐅᖅᐳᖅ ᕿᒥᕐᕈᒋᐊᕐᕕᒋᓚᐅᖅᑕᖓᑕ ᐅᓪᓗᑦ 90 ᑐᖔᓂ, ᑭᓯᐊᓂᓗ ᑕᐃᒪᐃᓕᖓᒐᓗᐊᖅᑎᓪᓗᒍ ᐱᕕᖃᖅᑎᑕᐅᖕᒥᔪᖅ ᐱᔭᕇᕐᕕᒃᓴᓕᐊᖓ ᐅᖓᕙᕆᐊᕈᒪᒍᓂᐅᒃ.

ᕿᒥᕐᕈᓂᖅᑕᖃᓚᐅᖅᑎᓪᓗᒍ, ᓱᓕᑦᑎᐊᕐᓂᕐᒧᑦ ᑲᒥᓴᓇ ᓇᓗᓇᐃᖅᓯᓂᐊᖅᐳᖅ ᒪᓕᒐᓕᐅᖅᑎ ᓱᓕᑦᑎᐊᕐᓂᕐᒧᑦ ᐱᖁᔭᕐᔪᐊᕐᒥᒃ ᓯᖁᒥᑦᑎᓚᐅᕐᒪᖔᖓᓂᒃ, ᐊᒻᒪ ᓯᖁᒥᑦᑎᓐᓂᖅᐸᑦ, ᓱᓕᑦᑎᐊᕐᓂᕐᒧᑦ ᑲᒥᓴᓇ ᐊᑕᐅᓯᕐᒥᒃ ᐅᓄᒃᑲᓐᓂᖅᑐᓂᒡᓘᓐᓃᑦ ᐃᓂᖅᑎᕈᑎᓕᐅᕈᓐᓇᖅᑐᖅ ᒪᓕᒐᓕᐅᕐᕕᖕᒧᑦ.

ᖁᓕᑦ ᐊᕐᕌᒍᑦ ᐊᓂᒍᕋᓱᖕᓂᖏᓐᓂ ᓱᓕᑦᑎᐊᕐᓂᕐᒧᑦ ᑲᒥᓴᓇ ᐊᑕᐅᓯᐊᕋᓂ ᕿᒥᕐᕈᓂᖃᖃᑦᑕᖅᓯᒪᔪᖅ ᐃᓚᖏᑦ ᒪᓕᒐᓕᐅᖅᑏᑦ ᐱᖁᔭᕐᔪᐊᕐᒥᒃ ᓯᖁᒥᑦᑎᓂᕋᖅᑕᐅᓚᐅᖅᑎᓪᓗᒋᑦ.  ᒪᓕᒐᓕᐅᕐᕕᖕᒧᑦ ᐅᓂᒃᑳᓕᐊᕕᓂᖏᑦ ᑕᕝᕙᐅᕗᑦ ᓴᖅᑭᑕᐅᖃᑦᑕᖅᓯᒪᔪᑦ ᒪᓕᒐᓕᐅᕐᕕᖕᒧᑦ ᐊᒻᒪ ᐅᓂᒃᑳᓕᐊᕕᓃᑦ ᑭᒃᑯᑐᐃᓐᓇᕐᓄᑦ ᑕᑯᒋᐊᖅᑕᐅᔪᓐᓇᖅᖢᑎᒃ ᐊᒻᒪ ᖃᕆᓴᐅᔭᒃᑯᑦ ᐃᑭᐊᖅᑭᕕᒃᑯᑦ ᐱᔭᐅᔪᓐᓇᕆᓪᓗᑎᒃ.