ᓱᓕᑦᑎᐊᕐᓂᕐᒧᑦ ᑲᒥᓴᓇᐅᑉ ᐃᖅᑲᓇᐃᔮᖏᑦ ᐊᓯᖏᑦ

ᓱᓕᑦᑎᐊᕐᓂᕐᒧᑦ ᑲᒥᓴᓇᐅᑉ ᐱᖁᔭᕐᔪᐊᖅᑎᒍᑦ ᐱᔭᒃᓴᖅᑖᕆᓯᒪᔭᖏᑦ ᓇᓗᓇᐃᔭᖅᑕᐅᓯᒪᕗᑦ “ᓱᓕᑦᑎᐊᕐᓂᕐᒧᑦ ᑲᒥᓴᓇ”, ᑕᐃᒪᓐᓇ ᑕᐃᒎᓯᓕᒃᑯᑦ, ᐱᓗᐊᕐᓗᒍ, ᒪᓕᒐᓕᐅᖅᑎᓂᒃ ᐃᑲᔪᖃᑦᑕᕐᓂᐊᖅᐳᖅ ᐱᖁᔭᕐᔪᐊᕐᒥᒃ ᓯᖁᒥᑦᑎᓂᐊᓐᖏᒻᒪᑕ, ᐊᒻᒪ ᐱᖁᔭᕐᔪᐊᕐᒥᒃ ᓯᖁᒥᑦᑎᓂᕋᖅᑕᐅᔪᓂᒃ ᖃᐅᔨᓴᐃᖃᑦᑕᕐᓗᓂ.

 

ᓱᓕᑦᑎᐊᕐᓂᕐᒧᑦ ᑲᒥᓴᓇ ᐊᓯᖏᓐᓂᒃ ᐃᖅᑲᓇᐃᔮᖃᖃᑦᑕᕆᐊᖃᕆᕗᖅ ᒪᓕᒐᓕᐅᕐᕕᖕᒧᑦ ᑎᓕᔭᐅᔭᕌᖓᒥ ᐊᓯᖏᑦ ᐱᖁᔭᕐᔪᐊᑦ ᐊᑐᖅᑕᐅᓗᑎᒃ -- ᐊᒻᒪ ᒪᓕᒐᓕᐅᕐᕕᒃ ᑕᐃᒫᒃ ᑎᓕᓯᖃᑦᑕᖅᓯᒪᔪᖅ ᓄᓇᕗᒻᒥ ᓂᕈᐊᕐᓂᓕᕆᓂᕐᒧᑦ ᐱᖁᔭᕐᔪᐊᑉ ᐃᓗᐊᒎᖅᑐᖅ ᓈᓴᐅᑎᓕᒃ IX, ᐅᑯᑎᒎᓇᖅ ᐊᑖᒍᑦ ᑎᑎᕋᖅᓯᒪᔪᑦ ᒪᓕᒃᖢᒋᑦ.

 

ᐊᒻᒪ, ᒪᓕᒐᓕᐅᕐᕕᐅᑉ ᑲᑎᒪᔨᓕᕆᔨᒃᑯᑦ ᑲᑎᒪᔨᖁᑎᖏᑦ ᑐᒃᓯᕌᖃᖅᓯᒪᔪᑦ ᑖᓐᓇ ᓱᓕᑦᑎᐊᕐᓂᕐᒧᑦ ᑲᒥᓴᓇ ᐱᖓᓱᒃᑲᓐᓂᕐᓂᒃ ᐃᖅᑲᓇᐃᔮᖃᖁᔭᐅᓪᓗᓂ, ᐱᓗᐊᕐᓗᒍ ᐅᑯᐊ ᐱᖓᓱᐃᓕᖓᔪᑦ ᒐᕙᒪᒃᑯᓐᓄᑦ ᐃᖅᑲᓇᐃᔭᖅᑏᑦ - ᒥᓂᔅᑕᐃᑦ ᑐᖏᓕᖏᑦ, ᒥᓂᔅᑕᓄᑦ ᐃᖅᑲᓇᐃᔭᖅᑏᑦ ᐊᒻᒪ ᒪᓕᒐᓕᐅᕐᕕᖕᒧᑦ ᑲᒥᓴᓇᕆᔭᐅᔪᑦ ᐃᒻᒥᒃᑰᖅᑐᑦ.

 

ᒥᓂᔅᑕᐃᑦ ᑐᖏᓕᖏᑦ: ᓄᓇᕗᑦ ᒐᕙᒪᒃᑯᑦ ᐱᓕᕆᕝᕕᐊᓄᑦ ᐅᕝᕙᓘᓐᓃᑦ ᑎᒥᓐᖑᖅᑎᑕᐅᓯᒪᔪᒧᑦ ᒥᓂᔅᑕᐅᑉ ᑐᖏᓕᐊᑕ ᐃᖅᑲᓇᐃᔭᕐᓂᕐᒧᑦ ᑳᓐᑐᕌᖓ ᐅᖃᖅᓯᒪᕗᖅ ᑖᓐᓇ ᒥᓂᔅᑕᐅᑉ ᑐᖏᓕᐊ ᓴᖅᑭᑦᑎᖃᑦᑕᕐᓂᐊᕐᓗᓂ, ᑕᑕᕈᑏᑦ ᐊᑐᕐᓗᓂᒋᑦ, ᑭᓱᓂᒃ ᐱᖁᑎᖃᕐᒪᖔᖅ, ᐊᑭᓕᒃᓴᖏᑦ, ᐱᓯᓂᓯᖃᕐᓂᕐᒧᑦ ᐃᓚᐅᕝᕕᖏᑦ, ᑮᓇᐅᔭᓕᐊᖏᑦ ᓇᑭᓐᖔᕐᒪᖔᑦ ᑕᒪᒃᑯᓂᖓ ᓇᓗᓇᐃᖅᓯᖃᑦᑕᕆᐊᓕᒃ ᒥᓂᔅᑕᐅᑉ ᑐᖏᓕᐊ, ᐃᓚᔮᖏᑦ ᐊᒻᒪ ᑲᒻᐸᓂᖁᑎᖃᕐᒪᖔᕐᒥ.  ᑖᒃᑯᐊ ᑕᑕᑎᖅᓯᒪᔭᖏᑦ ᑲᓐᖑᓇᖅᑑᑎᑕᐅᓂᐊᖅᑐᑦ ᐊᒻᒪ ᒐᕙᒪᒃᑯᑦ ᐊᖓᔪᖅᑲᐅᑎᖏᑦᑕ ᑎᑎᕋᕐᕕᐊᑕ ᑎᑎᕋᖅᑎᖓᓐᓄᑦ ᑐᓐᓂᖅᑯᑎᒋᓗᓂᒋᑦ ᐃᖅᑲᓇᐃᔭᕐᓂᕐᒧᑦ ᑳᓐᑐᕌᑦ ᐊᑎᓕᐅᓚᐅᖅᑎᓪᓗᓂᐅᒃ ᐅᓪᓗᑦ 30 ᖄᖏᓚᐅᓐᖏᓐᓂᖏᓐᓂ.

 

ᑲᑎᒪᔨᓕᕆᔨᒃᑯᑦ ᑲᑎᒪᔨᖏᑦ, ᓯᕗᓕᖅᑎ ᑐᒃᓯᕌᖃᓚᐅᖅᑎᓪᓗᒍ, ᓱᓕᑦᑎᐊᕐᓂᕐᒧᑦ ᑲᒥᓴᓇᒥᒃ ᐱᔭᒃᓴᖅᑖᖅᑎᑦᑎᓯᒪᕗᖅ ᑕᑕᑎᖅᓯᒪᔪᓂᒃ ᕿᒥᕐᕈᓇᖕᓂᕐᒥᒃ ᖃᐅᔨᓴᐃᓂᕐᒥᒡᓗ ᐊᒻᒪ ᖃᐅᔨᔭᓂ ᑐᓴᖅᑕᐅᑎᓪᓗᓂᒋᑦ ᓯᕗᓕᖅᑎᒧᑦ, ᐅᖃᐅᓯᕆᔭᖏᓪᓗ ᑕᖅᑲᐅᓐᖓᖅᑕᐅᔭᕆᐊᖃᓐᖏᖢᑎᒃ.

 

ᒥᓂᔅᑕᐅᑉ ᑐᖏᓕᐊ ᑲᓐᖑᓇᖅᑐᑦ ᓴᖅᑭᑦᑎᓂᕐᒧᑦ ᐅᓂᒃᑳᓂᒃ ᑕᑕᑎᕆᔭᕆᐊᖃᖅᐳᖅ ᐊᕐᕌᒍᑕᒫᖅ, ᑐᓂᓯᔭᕆᐊᖃᕐᕕᐊᑕᓗ ᐅᓪᓗᖓ ᓇᓗᓇᐃᖅᑕᐅᖃᑦᑕᕐᓂᐊᖅᖢᓂ ᓱᓕᑦᑎᐊᕐᓂᕐᒧᑦ ᑲᒥᓴᓇᒧᑦ.  ᑐᖏᓕᐅᑉ ᖃᓄᐃᑉᐱᓪᓕᐊᓂᐊᑕ ᓴᖅᑭᑦᑎᓚᐅᖅᑎᓪᓗᒍ ᐊᓯᔾᔨᖅᑐᖃᑲᓪᓚᒃᐸᑦ, ᑕᑕᑎᕆᒃᑲᓐᓂᕆᐊᓕᒃ ᑲᓐᖑᓇᖅᑑᑎᑕᐅᔪᓂᒃ ᐅᓂᒃᑳᓂᒃ, ᐊᓯᔾᔨᕐᓂᐅᓚᐅᖅᑑᑉ ᐅᓪᓗᖓᓂ 30 ᐅᓪᓗᑦ ᐊᓂᒍᓚᐅᖅᑎᓐᓇᒋᑦ.                                                                                    

ᒥᓂᔅᑕᐅᑉ ᐃᖅᑲᓇᐃᔭᖅᑎᖏᑦ: ᐃᒻᒥᒧᑦ ᐊᒡᕕᐊᕈᑎᖃᕐᓂᕐᒥᒃ ᐱᑕᖃᕐᓂᐊᓐᖏᒻᒪᑦ, ᓱᓕᔪᓂᒃ ᐅᕝᕙᓘᓐᓃᑦ ᑕᐃᒫᒃ ᐃᓱᒪᒋᔭᖃᖅᑐᖃᑐᐊᖅᐸᑦ, ᐊᑐᓂ ᒥᓂᔅᑕᐅᑉ ᐃᑲᔪᖅᑎᖏᑦ ᐊᒻᒪ ᑎᑎᕋᖅᑎᖏᑦ ᑳᓐᑐᕌᖕᒥᑎᒍᑦ ᓇᓗᓇᐃᔭᖅᓯᒪᔪᑦ ᒪᓕᒡᓗᓂᒋᑦ ᑕᑕᑎᕆᔭᕆᐊᓕᒃ ᓇᓗᓇᐃᔭᐃᓯᒪᔪᓂᒃ ᑭᓱᓂᒃ ᐱᖁᑎᖃᐅᕐᒪᖔᖅ, ᐱᓯᓂᓯᖃᕐᓂᒃᑯᑦ ᖃᓄᐃᓕᐅᖅᐸᓪᓕᐊᓂ, ᓄᓇᓕᖕᓂ ᐊᑭᓕᖅᓱᖅᑕᐅᓐᖏᓪᓗᓂ ᐃᖅᑲᓇᐃᔭᖃᑦᑕᕐᒪᖔᑦ ᖃᓄᐃᓕᐅᖅᑎᐅᖕᒪᖔᓪᓘᓐᓃᑦ, ᑲᓐᖑᓇᖅᑑᑎᑕᐅᓗᑎᒃ ᑕᒪᒃᑯᑎᒎᓇᖅ ᐃᑲᔪᖅᑕᐅᔪᒪᔪᓐᓇᖅᑐᖅ ᓱᓕᑦᑎᐊᕐᓂᕐᒧᑦ ᑲᒥᓴᓇᒧᑦ, ᑖᓐᓇ ᖃᐅᔨᒪᔨᑕᕆᓂᐊᕐᒪᒍ ᐊᒻᒪ ᒪᓕᖕᓂᐊᕐᓗᓂ ᖃᓄᐃᑦᑐᑐᐃᓐᓇᕐᒥᒃ ᒪᓕᒃᑕᐅᖁᔭᐅᔪᓂᒃ ᓱᓕᑦᑎᐊᕐᓂᕐᒧᑦ ᑲᒥᓴᓇᒧᑦ, ᑕᐃᓐᓇ ᓱᓕᔪᖅ ᐃᒻᒥᒧᓪᓘᓐᓃᑦ ᐊᒡᕕᐊᕈᑕᐅᓇᓱᒋᔭᐅᔪᖅ ᐋᖅᑭ`ᖕᓂᐊᕐᒪᑦ.

 

ᒪᓕᒐᓕᐅᕐᕕᖕᒧᑦ ᐃᒻᒥᒃᑰᖅᑐᑦ ᑲᒥᓴᓇᐃᑦ:

ᑲᑎᒪᔨᓕᕆᔨᒃᑯᑦ ᑲᑎᒪᔨᖏᑦ ᐅᖃᖅᓯᒪᕗᖅ ᒪᓕᒐᓕᐅᕐᕕᖕᒧᑦ ᑎᑎᕋᖅᑎ ᐊᒻᒪ ᐃᓚᖏᑦ ᒪᓕᒐᓕᐅᕐᕕᖕᒧᑦ ᐃᒻᒥᒃᑰᖅᑐᑦ ᑲᒥᓴᓇᐃᑦ, ᐱᓗᐊᕐᓗᒍ ᐅᖃᐅᓯᓕᕆᓂᕐᒧᑦ ᑲᒥᓴᓇ, ᑐᓴᐅᒪᔾᔪᑎᓕᕆᓂᕐᒧᑦ ᑲᓐᖑᓇᖅᑐᓕᕆᓂᕐᒧᓪᓗ ᑲᒥᓴᓇ, ᓱᕈᓯᕐᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᐃᔨ, ᐊᒻᒪ ᓄᓇᕗᒻᒥ ᓂᕈᐊᖅᑐᓕᕆᔨ, ᑲᓐᖑᓇᖅᑑᑎᑕᐅᓂᐊᖅᑐᓂᒃ ᑕᑕᑎᕈᑎᓂᒃ ᑐᓂᓯᔭᕆᐊᓕᒃ (ᐱᔾᔪᑎᒋᓗᒋᑦ ᐱᖁᑎᖏᑦ, ᐊᑭᓕᒃᓴᓐᖑᑐᐃᓐᓇᕆᐊᖃᖅᑐᖁᑎᖏᑦ, ᓇᑭᑦ ᑮᓇᐅᔭᓕᐅᕐᒪᖔᖅ, ᓄᓇᕗᑦ ᒐᕙᒪᒃᑯᓐᓂᑦ ᑳᓐᑐᕌᖃᕐᓂᖓ ᐊᒻᒪ ᖃᓄᐃᓕᐅᖃᑦᑕᕐᓂᖏᑦ ᐃᖅᑲᓇᐃᔮᖓᑕ ᓯᓚᑖᒍᑦ) ᓱᓕᑦᑎᐊᕐᓂᕐᒧᑦ ᑲᒥᓴᓇᐅᑉ ᕿᒥᕐᕈᓇᒐᒃᓴᖏᓐᓂᒃ.  ᑕᒪᓐᓇ ᑕᐃᒪᓐᓇ ᐃᓱᒪᓕᐅᕈᑕᐅᓚᐅᖅᑐᖅ ᑲᑎᒪᔨᓕᕆᔨᒃᑯᑦ ᑲᑎᒪᔨᖏᓐᓄᑦ, ᑖᒃᑯᐊᓗ ᓱᓕᑦᑎᐊᕐᓂᕐᒧᑦ ᑲᒥᓴᓇᒥᒃ ᑎᓕᓯᓚᐅᖅᑐᑦ ᐊᑐᓂ ᑕᑕᑎᖅᓯᒪᔪᑦ ᕿᒥᕐᕈᓇᒃᑕᐅᖁᓪᓗᓂᒋᑦ ᐊᒻᒪ ᖃᐅᔨᔭᓂ ᐅᓂᒃᑲᐅᓯᕆᓕᓂᒋᑦ ᑲᑎᒪᔨᓕᕆᔨᒃᑯᑦ ᑲᑎᒪᔨᖏᓐᓄᑦ, ᑐᓴᖅᑕᓪᓗ ᑕᖅᑲᐅᓐᖓᖅᑕᐅᔭᕆᐊᖃᓐᖏᖢᑎᒃ.

 

ᑕᑕᑎᖅᓯᒪᔪᑦ ᐊᕐᕌᒍᑕᒫᖅ ᓱᓕᑦᑎᐊᕐᓂᕐᒧᑦ ᑲᒥᓴᓇᒧᑦ ᑐᓐᓂᖅᑯᑕᐅᖃᑦᑕᕆᐊᓖᑦ ᓱᓕᑦᑎᐊᕐᓂᕐᒧᑦ ᑲᒥᓴᓇᐅᑉ ᐅᓪᓗᓕᖅᓯᒪᔭᖓᑕ ᐅᓪᓗᐊᓂ.

 

ᓄᓇᕗᒻᒥ ᓂᕈᐊᕐᓂᓕᕆᓂᕐᒧᑦ ᐱᖁᔭᕐᔪᐊᖅ

ᓂᕈᐊᕐᓂᓕᕆᓂᕐᒧᑦ ᐱᖁᔭᕐᔪᐊᖅ ᐊᑐᖅᖢᒍ ᐋᖅᑭᒃᓯᒪᐅᑕᐅᖃᑦᑕᖅᐳᖅ ᓄᓇᕗᒻᒥ ᒪᓕᒐᓕᐅᕐᕕᖕᒧᑦ ᒪᓕᒐᓕᐅᖅᑏᑦ ᖃᓄᖅ ᓂᕈᐊᖅᑕᐅᖃᑦᑕᕐᓂᐊᕐᒪᖔᖏᑦ.  ᐱᖁᔭᕐᔪᐊᖅ ᐋᖅᑭᒃᒃᓯᒪᖕᒥᕗᖅ ᖃᓄᖅ ᓂᕈᐊᕐᓃᑦ ᐊᐅᓚᑕᐅᖃᑦᑕᕐᓂᐊᕐᒪᖔᖏᑦ ᐊᒻᒪ ᓂᕈᐊᕐᓂᓕᕆᓂᕐᒧᑦ ᒪᓕᒐᓂᒃ ᓯᖁᒥᑦᑎᔪᑦ ᖃᓄᐃᑕᐅᖃᑦᑕᕐᓂᐊᕐᒪᖔᖏᑦ ᐊᒻᒪ ᒪᓕᒐᓂᒃ ᓯᖁᒥᑦᑎᓗᑎᒃ ᖃᓄᐃᓕᐅᕐᓂᕐᓗᒃᑐᑦ ᖃᓄᖅ ᓵᒋᐊᖅᑕᐅᖃᑦᑕᕋᔭᕐᒪᖔᖏᑦ. ᓂᕈᐊᕐᓂᓕᕆᓂᕐᒧᑦ ᐱᖁᔭᕐᔪᐊᖅᑎᒍᑦ ᐱᕋᔭᖕᓂᐅᓐᖏᑦᑐᓄᑦ ᒪᓕᒐᓂᒃ ᓯᖁᒥᑦᑎᔪᑦ ᑲᒪᒋᔭᐅᓲᖑᕗᑦ ᐃᖅᑲᖅᑐᐃᕕᒃᑎᒍᑦ, ᐊᑭᓖᑎᑕᐅᔪᓐᓇᖅᖢᑎᒃ ᐅᕝᕙᓘᓐᓃᑦ ᑎᒍᔭᐅᔪᓐᓇᖅᖢᑎᒃ, ᐅᕝᕙᓘᓐᓃᑦ ᑕᒪᒃᑮᖕᓂᒃ ᐊᑐᖅᑎᑕᐅᔪᓐᓇᖅᖢᑎᒃ.  ᓂᕈᐊᕐᓂᓕᕆᓂᕐᒧᑦ ᐱᖁᔭᕐᔪᐊᑉ ᐃᓗᐊᓃᑦᑐᖅ “ᐊᑐᓕᖅᑎᑕᐅᓂᖏᑦ” ᓇᓗᓇᐃᔭᐃᓯᒪᕗᑦ ᖃᓄᖅ ᐱᕙᓪᓕᐊᔾᔪᓯᖃᕆᐊᖃᕐᒪᖔᖏᑦ ᐱᖁᔭᕐᓂᒃ ᓯᖁᒥᑦᑎᔪᖅ ᐃᖅᑲᖅᑐᐃᕕᒃᑎᒎᕆᐊᖃᕐᓂᐊᓐᖏᒻᒪᑦ.  ᐃᖅᑲᖅᑐᐃᕕᒃᑎᒎᓐᖏᑦᑑᔪᓐᓇᖅᐳᖅ ᒪᓕᖕᓂᐊᕐᓂᕐᒧᑦ ᐊᖏᕈᑎᓂᒃ ᐊᑎᓕᐅᕆᒍᓂ ᓱᓕᑦᑎᐊᕐᓂᕐᒧᑦ ᑲᒥᓴᓇᐅᑉ ᓵᖓᓐᓂ.  ᒪᓕᖕᓂᐊᕐᓂᕐᒧᑦ ᐊᖏᕈᑏᑦ ᐊᑎᓕᐅᖅᑕᐅᓲᖑᕗᑦ ᓯᖁᒥᑦᑎᔪᖅ ᐃᓗᓕᖏᓐᓂᒃ ᐊᖏᖃᑎᖃᕐᓂᕋᖅᖢᓂ, ᓲᕐᓗ ᑕᐅᖅᓰᔾᔪᑎᒋᓪᓗᓂᒋᑦ ᓯᖁᒥᑦᑎᓂᕆᓚᐅᖅᑕᒥᓄᑦ, ᒪᓕᒋᐊᖃᖅᑎᑕᐅᓕᖅᖢᓂᓗ ᐊᑕᐅᓯᕐᒥᒃ ᐅᓄᒃᑲᓐᓂᖅᑐᓂᒡᓘᓐᓃᑦ ᑎᓕᐅᕈᑎᓂᒃ, ᐆᒃᑑᑎᒋᓗᒋᑦ ᐅᑯᐊ:

  • ᒪᓕᒐᓂᒃ ᓯᖁᒥᑦᑎᓂᕆᓚᐅᖅᑕᓂ ᓇᖕᒥᓂᖅᑖᕆᓗᓂᐅᒃ ᑲᒪᔪᑑᓚᐅᕐᓂᓂᓗ ᓇᓗᓇᐃᕐᓗᓂᐅᒃ
  • ᑕᖅᑲᒃᑯᓄᖓ ᐃᓄᖕᓄᑦ ᒪᒥᐊᓪᓗᓂ
  • ᓯᖁᓚᐅᖅᑕᒥᓅᖓᔪᓂᒃ ᖃᓄᐃᓕᐅᕈᑎᓂᒃ ᐊᑐᕐᓂᐊᕐᓗᓂᐅᒃ ᐊᑐᓐᖏᓪᓗᓂᐅᒡᓘᓐᓃᑦ
  • ᓄᓇᕗᑦ ᒐᕙᒪᒃᑯᓐᓄᑦ ᐊᑭᓖᓗᑎᒃ ᑮᓇᐅᔭᓂᒃ, ᐅᕝᕙᓘᓐᓃᑦ
  • ᓄᓇᓖᑦ ᐃᓗᐊᓂ ᐱᔨᑦᑎᕐᓗᓂ ᐊᑭᓕᖅᓱᖅᑕᐅᓐᖏᓪᓗᓂ

ᒪᓕᖕᓂᐊᕐᓂᕐᒧᑦ ᐊᖏᕈᑏᑦ ᐊᑎᓕᐅᖅᑕᐅᒋᐊᑐᓐᖏᑦᑐᑦ ᐊᑎᓕᐅᖅᑕᐅᔪᒪᓐᖏᒃᑯᑎᒃ ᐊᒻᒪ ᓵᑕᐅᒋᐊᕈᑕᐅᔪᓐᓇᕋᑎᒃ ᒪᓕᒐᓂᒃ ᓯᖁᒥᑦᑎᓂᕋᖅᑕᐅᔪᒥᒃ.

ᓱᓕᑦᑎᐊᕐᓂᕐᒧᑦ ᑲᒥᓴᓇᐅᑉ ᐃᓚᐅᓂᖓ ᐋᔩᕈᑕᐅᑎᓪᓗᒋᑦ ᒪᓕᖕᓂᐊᕐᓂᕐᒧᑦ ᐊᖏᕈᑏᑦ ᐱᒋᐊᓲᖑᕗᖅ ᐸᓖᓯᒃᑯᑦ ᓱᓕᑦᑎᐊᕐᓂᕐᒧᑦ ᑲᒥᓴᓇᒥᒃ ᐅᖃᐅᔾᔨᒃᐸᑦ ᖃᓄᐃᑦᑐᕐᓂᐅᓚᐅᖅᑐᒥᒃ, ᖃᐅᔨᓴᐃᓕᖅᐸᑕᓗ ᐊᒻᒪ ᐸᓖᓯᒃᑯᑦ ᐱᔾᔪᑎᖃᑦᑎᐊᕐᓗᑎᒃ ᐃᓱᒪᖃᖅᐸᑕ ᐃᓄᒃ ᓂᕈᐊᕐᓂᓕᕆᓂᕐᒧᑦ ᐱᖁᔭᕐᔪᐊᕐᒥᒃ ᓯᖁᒥᑦᑎᓚᐅᕐᓂᖓᓂᒃ.

ᖃᓄᐃᓐᓂᐅᓂᕋᖅᑕᐅᓚᐅᖅᑐᑦ ᐃᓱᒪᒃᓴᖅᓯᐅᕈᑎᒋᑦᑎᐊᓚᐅᕐᓗᓂᒋᑦ, ᓱᓕᑦᑎᐊᕐᓂᕐᒧᑦ ᑲᒥᓴᓇ ᐱᔪᒪᒍᓂ ᓯᖁᒥᑦᑎᓂᕋᓚᐅᖅᑐᖅ ᐊᐱᕆᔪᓐᓇᖅᑕᖓ ᒪᓕᖕᓂᐊᕐᓂᕐᒧᑦ ᐊᖏᕈᑎᓂᒃ ᐊᑐᕈᒪᖕᒪᖔᖓ.  ᒪᓕᖕᓂᐊᕐᓂᕐᒧᑦ ᐊᖏᕈᑏᑦ ᐊᑎᓕᐅᖅᑕᐅᓯᒪᓕᖅᑎᓪᓗᒋᑦ, ᐊᒻᒪ ᖃᓄᐃᑦᑐᓂᒃ ᒪᓕᒋᐊᖃᕐᓂᐊᕐᓂᖓ ᒪᓕᔾᔮᓐᖏᓐᓂᖓᓘᓐᓃᑦ ᒪᓕᒡᓗᒋᑦ ᐊᖏᕈᑏᑦ ᐃᓗᓕᖏᓐᓃᑦᑐᑦ, ᑕᖅᑲᐅᖓ ᑐᓴᒐᒃᓴᑎᒍᑦ ᓴᖅᑭᓐᓇᔭᖅᑕᖏᑦ ᓱᓕᑦᑎᐊᕐᓂᕐᒧᑦ ᑲᒥᓴᓇᐅᑉ.  ᑭᖑᓂᑦᑎᓐᓂ, ᑕᐃᒪᐃᑦᐃᑐᑦ ᑐᓴᒐᒃᓴᓕᐊᕆᔭᐅᔪᑦ ᓄᓇᓕᖕᓂ ᐱᕙᓪᓕᐊᔪᓕᕆᔨᒃᑰᖅᑎᑕᐅᕙᓚᐅᖅᑐᑦ, ᓄᓇᕗᒻᒥ ᐱᕙᓪᓕᐊᔪᒃᑯᑦ ᐊᒻᒪ/ᐅᕝᕙᓘᓐᓃᑦ ᓱᓕᑦᑎᐊᕐᓂᕐᒧᑦ ᑲᒥᓴᓇᐅᑉ ᖃᕆᓴᐅᔭᒃᑯᑦ ᐃᑭᐊᖅᑭᕕᖏᑎᒍᑦ.