Ahiit Kamagiyakhait Kanngunaqtuliriyip Kamisinaata

Una maligaunikkut havaariyaa Kanngunaqtuliriyip Kamisinaup uqautauhimayuq ilangani taiyauhimaniani “Mikhaagut Kanngunaqtuliriyip Kamisina”, uvanilluaq, ikayuqturlugit Maligaliuqtit angirutait Maligaryuarmi, uvvalu qauhiyaqpaglunigit ihuinaaqtauhimayaunahugiyauyut Maligaryuarmik.

 

Kanngunaqtuliriyip Kamisina havaaqaqtukhauyurlu ahiit havaaritquyauyut Maligaliurvingmit ahiini maligakhani – uvvalu Maligaliurvik taimaatut pihimaqattaqpaktut uvani Uiguani IX haffumani Nunavut Niruaqtuliriyut Maligaryuangani, uvva uqauhiriyauvuq uvani ataani.

 

Talvaniluttauq, ukuat Aulapkaiyit Ikayuqtuiyillu Katimayiat Maligaliurviup tukhiqtuqhimayut Kanngunaqtuliriyip Kamisina pingahuuyunik havaakhaqarmiluni, ahiatigut pingahut atauttimiuyut kavamatkunni havaktiinut – Ministait Tugliinut, Ministaup havaqatiinut, ukuallu ilikkuuqtut havaktiit Maligaliurvingmi.

 

Ministait Tuglingit: Havaakhamut kaantraariyaa haffumap Tugliriyauyut Hivuliqtiublutik Kavamatkuanni Nunavutip havagviani uvvaluunniit kitulikiaq kavamatkut timigiyainni pitquiniqaqtuq Tugliriyauyut Hivuliqtia naunaiqhiyukhaq, naunaiyattiaqhimayumik, ukuat piqutait, atugait, nanminirmut ihumagiyait, nakit manikhaakpagiakhait, hunaniglulikiaq uumap Ministaup Tuglingata, qatanngutailu uvvalu inmikkut nanminiriyainnik. Una naunaiyainirup unipkaanga takuyauyukhaunngittuq kitumullikiaq uvvalu titiraqtauyukhaq Titiraqtianut Atanilluap Titirarvingani nalliqtinnagu taalit (30) ublut atiliuqtautaarnagu havaakhap kaantraakhaani.

 

Ukuat Aulapkaiyut Ikayuqtuiyut Katimayiat, tukhiqtuqpagu Hivuliqtiup, pipkaihimayut Kanngunaqtuliriyip Kamisinaanut qimilruuqhivaglunigit takuurivaglunigillu hapkuat naunaiqhiyuni unipkaanginnik uvvalu ilitturihimaliqtamingnik tuhaqtittivagluni Hivuliqtimut, ukpiruhugluni.

 

Una Ministaup Tuglinga titiraqtukhaq haffuminnga Takuyaunngittukhamik Naunaiqhidjutit Unipkaanginnik ukiuq nalliraikpat uvani ublungani naunaiqtiqhimayaani Kanngunaqtuliriyip Kamisinaata. Immaqaak qanuriliurninga aallannguqqat ihuilutaunialiqqat akhuraaluk tamna tuhaqtauyukhaq nipiliuqtautaaqhimayumi uvani Takuyaunngittukhamik Naunaiqhidjutit Unipkaanginni, una Ministaup Tuglinga titiraqtukhaq ihuaqhaqhimayumik unipkaamik nalliqtinnagu taalit (30) ublut tahaffumani aallannguqhiviani.                                                                                       

 

Ministaup havaqatait: Ihuiludjutaunianngittumik, piqpiaqhimayumik piqpiaqhimayauhimanirmigluunniit, atuni Atannguqtuiviat Ikayuqtiat ukuallu Atannguqtuivianni Titiraqtiat pitquyauhimaniaqtut kaantraaliridjutaitigut uqaqtukhat naunaiqhilutik nanminiriyamingnik piqutigiyamingnik, nanminiriyamingnik hulilukaarutimingnik, akiittumik ikayuqpangniq uvvaluunniit nunamingni hulilukaarutigivagainnik, hunaniglulikiaq, ukpiruhugluni unipkaaqtukhaq Kanngunaqtuliriyip Kamisinaanut, uqaudjinikkut tuharvigiyumagumiuk Kanngunaqtuliriyip Kamisinaanit uvvalu maliruaqpaglunigit uqaudjihimaniit Kanngunaqtuliriyip Kamisinaup ihuaqhinahuarlugu taamna piqpiaqtuq uvvaluunniit piqpiaqtaunahugiyauningit ihuinaaqtaunahugiyauninginnik.

 

Ilikkuuqtut Havaktiit Maligaliurvingmi: Ukuat Aulapkaiyut Ikayuqtuiyut Katimayiat pitquihimayut Titiraqtianut Maligaliurviup ukununngalu kitullikiaq ilikkuuqtut havaktiit Maligaliurviup, ukualluit Uqauhilirinirmut Kamisina, Tuhaqtittiyuni uvanilu Takuyauyukhaunngittuni Kamisina, Nutaqqanut Inulrammirnullu Kivgaqtia, una Atanirluaq Niruaqtuliriyi, tunihilutik takuyauyukhaunngittunik naunaiyainikkut uqauhiannik (ihumagilluaqhugit piqutinut, akiligakhatigut, nakillu manikhaqtaaqpauhiannik, Kavamatkut Nunavunmi kaantraaliriyauvaktunik uvvalu hilataaniittumik hulilukaarutavaktunik) tuniyauyukhat Kanngunaqtuliriyip Kamisinaanut qimilruuqtakhariyainnik. Hamna ihumaliurutigiyauyuq ukunanngat Aulapkaiyit Ikayuqtuiyullu Katimayiannit ihumagiblutigik iiraqtunngillutik uvvalu aallannguqattanngillutik atanilluat kavamatkunni.

 

Ukuat Aulapkaiyit Ikayuqtuiyullu Katimayiat pitquihimayut uuminnga Kanngunaqtuliriyip Kamisinaanut qimilruuqhiluni qauyiharluniuglu atuni takuyaunngittukhanik uqauhiriyauyut uvvalu unipkaarluniuk ihumaaluutauvaktunik tuhaqtittiluni Aulapkaiyit Ikayuqtuiyunullu Katimayiinut, ukpiriyauluni.

 

Hapkuat uqauhiriyauyut tuniyauyukhat ukiuq tamaat ublua taiyariiqhimayaani Kanngunaqtuliriyip Kamisinaanit.

 

Nunavunmi Niruaqtuliriyit Maligaryuanga

Niruaqtuliriyit Maligaryuangani makipkaihimayut niruaqtuutikhakkut niruarnialiraangata maligaliuqtikhanik Nunavut Maligaliurvingani. Atuqtittiliqpaktut maliruaqtauyukhanik niruarniarnikkut, uvvalu ihuinaaqtuni pivaktunut mikhaanut ihuittuliqivaktunut ahiruivaktunullu niruaqtuliriniup maligainnut. Naittumik ihuinaaqtuutinik haffumani ataani Niruaqtuliriyit Maligaryuangani taniqtuqtauyungnaqtut apiqhuinikkut akiliqhilutik uvvaluunniit itiqtaulirlutik, ukunangiluunniit tamatkiumalutik piyauyungnaqtut. Uvani “Pitquiniqarnia” haffumani Niruaqtuliriyit Maligaryuangani, una Maligaryuaq atuqtittihimaliqtuq ahiatiguurlutik una ihuinaaqhimayuq uuktuqtauyaanngittuni Apiqhuivingmi. Hamna imaatut piyauvaktuq Angiqatigilugu Kanngunaqtuliriyip Kamisina.

 

 

 

Una Angiqatigiigut unauyuq angiqatigiikhutik una ihuinaaqtuq angiqhimaniaqtuq, himmautigilugu apiqhuqtauyaanngilluni ihuinaaqtaminik, uvunga atauhirmut amigaitqiyamulluunniit pivikhaqaqqat, ukunatitut:

  • ihuinaaqturiluni uqarumi
  • mamiaktumi uqarumi
  • piluni uvvaluunniit pinngilluni qanurlikiaq mikhaagut ihuinaaqhimayaminik
  • akiliqhilutik qanurlikiaq akikhaanik tunilugu Nunavunmi Kavamatkuanut, uvvaluunniit
  • akiittumik nunamingni havaktitauvaglutik

Angiqatigiingniq inmigut piyariaqaqtut pipqaqtitauhimanngillutik piyaarinngillutik uvunga ihuinaaqturiyauhimanahugiyauyumut.

Hamna piqatigivagaa uumap Kanngunaqtuliriyip Kamisina aivadjutigiiliraangamik Angirunmik una paliihima uqaudjiyiubluni Kanngunaqtuliriyip Kamisinaanut kitumilikiaq, naunaiyailiraangata, ukuat paliihimatkut paqittigumik uvvalu ukpiruhukkumik taamna kinalikiaq ihuinaaqhikpat haffumani ataaniittumik Niruaqtuliriyit Maligaryuangani.

Ihumaliuqqaaqhugit tamaita tahapkuat qanuriliurningat, una Kanngunaqtuliriyip Kamisina aittuqtuiyumaniarungnaqhiyuq Angirutimik uvunga ihuinaaqtauhimayuriyauhimayumut. Una atiliuqtauhimadjutaa Angirutip atiliuqtautaaqtuq, unalu kingulliq angirut angirutaunngitturluunniit pivikhaqaqtuni Angirutimi, titiraqhimavagaa Kanngunaqtuliriyip Kamisinaata. Kinguvani, hapkuat titiraqhimayauvaktut nunallaani tuhagakhaini, uvani Nunavut Gazette Titirainni uvvalu/uvvaluunniit qaritauyakkuurutainni Kanngunaqtuliriyi Kamisinaata.