ᓱᓕᑦᑎᐊᕐᓂᕐᒧᑦ ᐱᖁᔭᕐᔪᐊᑉ ᒥᒃᓵᓅᖓᔪᑦ

ᓱᓕᑦᑎᐊᕆᐊᖃᕐᓂᕐᖕᒧᑦ ᐱᖁᔭᖅ ᐱᒋᐊᓚᐅᕐᓯᒪᔪᖅ ᐊᑐᓕᕐᑎᑕᐅᓪᓗᓂ ᔪᓚᐃ 1, 2001ᖑᑎᓪᓗᒍ. ᐱᔾᔪᑎᖏᑦ ᐅᑉᐱᕆᔭᓪᓗ ᑐᓐᖓᕕᖏᑦ ᒪᓕᒐᕐᓂ ᓇᓗᓇᐃᕐᑐᖅᓯᒪᔪᑦ ᐃᒫᒃ:

ᐱᔾᔪᑖ
1. ᑖᔅᓱᒪ ᐱᖁᔭᐅᑉ ᐱᔾᔪᑎᒋᔭᖓ ᐃᒪᐃᓕᖓᕗᖅ
(ᐃ) ᒪᓕᒐᕐᒥᑦ ᓇᓗᓇᐃᖅᓯᒪᓂᖃᑦᑎᐊᕐᓗᓂ ᒪᓕᒐᓕᐅᕐᕕᖕᒥ
ᒪᓕᒐᓕᐅᖅᑎᐅᔪᑦ ᐱᓕᕆᐊᖃᑦᑎᐊᖏᓐᓇᕆᐊᖃᕐᓂᖏᓐᓂᒃ
ᐃᑲᔪᕈᑎᒋᕚᓪᓕᕈᑎᒋᔪᓐᓇᕐᓂᐊᖅᑕᖏᓐᓂᒃ ᐱᔾᔪᑎᖃᐃᓐᓇᖅᐸᒡᓗᑎᒡᓗ
ᓄᓇᕗᒻᒥᐅᑦ ᐱᖅᑯᓯᑐᖃᕆᔭᖏᓐᓂᒃ ᐱᒻᒪᕆᒋᔭᖏᓐᓂᒃ
ᐊᑐᖅᓯᑦᑎᐊᕋᓱᐃᓐᓇᕐᓗᑎᒡᓗ ᑭᒡᒐᖅᑐᖅᑕᓕᒫᖏᑦᑕ
ᐋᖅᑭᒍᑕᐅᕚᓪᓕᕈᑎᒋᔪᒪᔭᖏᓐᓂᒃ; ᐊᒻᒪᓗ
(ᐱ) ᓴᖅᑭᑦᑎᓗᑎᒃ ᐋᖅᑭᒃᓯᒪᔾᔪᑎᒃᓴᓂᒃ ᒪᓕᒍᑕᐅᖃᑦᑕᕐᓂᐊᖅᑐᓂᒃ
ᐊᑐᖅᓯᑦᑎᐊᕈᑎᒋᖃᑦᑕᕐᓂᐊᕐᒪᔾᔪᒃ ᑕᒪᒃᑯᓂᖓ
ᐱᓕᕆᑦᑎᐊᕈᑎᒋᒋᐊᖃᖅᑕᒥᓂᒃ.

ᒪᓕᒃᑕᒃᓴᑦ
2. ᑖᓐᓇ ᐱᖁᔭᖅ ᑐᙵᕕᖃᕈᑎᖃᖅᐳᖅ ᒪᓕᒃᑕᓴᐅᔪᓂᒃ ᐅᑯᓂᖓ:
(ᐃ) ᓱᓕᑦᑎᐊᕈᓐᓇᕐᓂᕐᒧᑦ ᐅᒃᐱᕆᔭᐅᔪᓐᓇᕐᓂᖅ ᓯᕗᓪᓕᖅᐹᒻᒪᕆᐅᕗᖅ
ᖁᑦᑎᓛᒻᒪᕆᐅᓪᓗᓂᓗ ᐱᓕᕆᐊᒃᓴᕆᔭᐅᓂᕐᒧᑦ ᓂᕈᐊᖅᑕᐅᓯᒪᔪᒧᑦ
ᒪᓕᒐᓕᐅᖅᑎᒧᑦ;
(ᐱ) ᓄᓇᕗᒻᒥᐅᑦ ᐱᔪᓐᓇᐅᑎᖃᖅᑎᑕᐅᕗᑦ ᓂᕆᐅᒋᔭᖃᕈᓐᓇᕐᓂᕐᒥᓂᒃ
ᓂᕈᐊᖅᑕᒥᓂᒃ ᐊᐅᓚᑦᑎᔨᒋᓂᐊᖅᑕᒥᓂᒃ ᐱᓕᕆᐊᒃᓴᒥᓂᒃ
ᐱᓕᕆᐊᖃᑦᑎᐊᕆᐊᖃᕐᓂᖏᓐᓂᒃ ᐊᕕᒃᓯᒪᑎᑦᑎᔪᓐᓇᑦᑎᐊᕐᓗᑎᒃ
ᒐᕙᒪᓕᕆᓂᕐᒧᑦ ᐱᓕᕆᐊᕆᒋᐊᖃᖅᑕᒥᓂᒃ ᐊᒻᒪᓗ ᐃᒻᒥᒃᑯᑦ
ᑲᒪᒋᒋᐊᖃᖅᐸᒃᑕᒥᓂᒃ ᑕᖅᑲᒃᑯᓄᖓ
ᐅᒃᐱᕆᔭᐅᕚᓪᓕᕈᓐᓇᕐᓂᖅᓴᐅᓂᐊᕐᒪᑕ ᑖᒃᑯᐊ ᐊᑐᓂ ᒪᓕᒐᓕᐅᖅᑎᐅᔪᑦ
ᓱᓕᑦᑎᐊᕈᓐᓇᕐᓂᖏᓐᓄᑦ ᐅᒃᐱᕆᔭᐅᕚᓪᓕᕈᑎᒋᔪᓐᓇᖅᑕᖏᓐᓂᒃ,
ᑕᐃᒪᐃᑉᐸᑦ ᒪᓕᒐᓕᐅᖅᑏᑦ ᐅᐱᒋᔭᐅᑦᑎᐊᖏᓐᓇᕐᓂᖅᓴᐅᔪᓐᓇᕋᔭᕐᒪᑕ
ᐊᒻᒪᓗ ᐃᓄᖁᑎᒋᔭᐅᔪᑦ ᐃᖅᑲᒍᓱᑦᑎᐊᕐᓂᖅᓴᐅᓕᕐᓗᑎᒃ
ᒪᓕᒐᓕᐅᕐᕕᖕᒥᓂᒃ ᒪᓕᒐᓕᐅᖅᑎᖁᑎᒋᔭᖏᓐᓂᒡᓗ;
(ᑎ) ᒪᓕᒐᓕᐅᕐᕕᖕᒥ ᒪᓕᒐᓕᐅᖅᑏᑦ ᐱᔭᒃᓴᒥᓂᒃ ᐱᓕᕆᐊᖃᑦᑎᐊᕐᓂᐊᖅᐳᑦ
ᐋᖅᑭᐅᒪᑎᑦᑎᑦᑎᐊᕈᓐᓇᕐᓗᑎᒃ ᐊᕕᒃᓯᒪᑎᑦᑎᔪᓐᓇᕐᓗᑎᒃ ᒐᕙᒪᓕᕆᓂᕐᒧᑦ
ᐱᓕᕆᐊᒃᓴᕆᔭᒥᓂᒃ ᐊᒻᒪᓗ ᐃᒻᒥᒃᑯᑦ ᑲᒪᒋᔭᒃᓴᕆᕙᒃᑕᖏᓐᓂᒃ,
ᐊᑐᖅᓯᑦᑎᐊᕈᓐᓇᕐᓂᐊᕐᒪᑕ ᓂᕆᐅᒋᔭᐅᔾᔪᑎᒋᔭᒥᓂᒃ
ᒪᑐᐃᖓᓂᖃᑦᑎᐊᕐᓗᑎᒃ, ᓱᓕᔪᒥᒃ ᑐᙵᓂᖃᕐᓂᒃᑯᑦ, ᐃᒻᒥᒃᑯᓪᓗ
ᐊᒃᑐᐊᓂᖃᖅᑎᑦᑎᙱᓪᓗᑎᒃ ᐋᖅᑭᐅᒪᑎᑦᑎᔪᓐᓇᕐᓂᒃᑯᑦ, ᑕᒪᒃᑯᓂᖓᓗ
ᐱᓕᕆᔾᔪᑎᒋᒋᐊᖃᖅᑕᒥᓂᒃ ᑲᒪᒋᔭᖃᑦᑎᐊᕐᓗᑎᒃ;
(ᑭ) ᒪᓕᒐᓕᐅᖅᑏᑦ ᐱᔨᑦᑎᕋᑦᑎᐊᕈᓐᓇᖅᐳᑦ ᓄᓇᕗᒻᒥᐅᓄᑦ
ᐊᑐᕐᓂᖃᑦᑎᐊᖅᑐᒃᑯᑦ ᐊᔾᔨᒌᙱᑦᑑᑎᓂᒃ ᐃᖅᑲᓇᐃᔮᖃᕐᓂᑰᒍᑎᒃ
ᑲᔪᓯᑦᑎᐊᖏᓐᓇᕐᓗᑎᒡᓗ ᐱᓇᓱᐊᖃᑕᐅᖃᑦᑕᕐᓂᕐᒥᓂᒃ
ᑮᓇᐅᔾᔭᒃᓴᕈᑎᐅᔪᓐᓇᕋᔭᖅᑐᓂᒃ ᐊᒻᒪᓗ ᐃᓅᓯᖃᑦᑎᐊᕈᑕᐅᔪᓐᓇᕋᔭᖅᑐᓂᒃ
ᓄᓇᓕᖕᒥᐅᓄᑦ.

ᓱᓕᑦᑎᐊᕐᓂᕐᒧᑦ ᐱᖁᔭᕐᔪᐊᖅ ᐊᑕᐅᓯᐅᓐᖏᑦᑐᓂᒃ ᑭᓱᑐᐃᓐᓇᕐᓄᑦ ᑐᕌᖓᔪᓂᒃ ᐱᔭᒃᓴᖅᑖᖅᑎᑦᑎᓯᒪᕗᖅ ᖃᓄᐃᓕᐅᕆᐊᖃᖅᑎᑦᑎᕗᕐᓗ ᒪᓕᒐᓕᐅᕐᕕᖕᒥ ᒪᓕᒐᓕᐅᖅᑎᓕᒫᓄᑦ ᐊᑐᖅᑕᐅᔭᕆᐊᓕᖕᓂᒃ:

ᐱᓕᕆᐊᒃᓴᕆᔭᐅᔪᑦ ᐊᑐᖅᓯᑦᑎᐊᕈᑕᐅᒋᐊᖃᖅᑐᓪᓗ
4. ᐊᑐᓂ ᒪᓕᒐᓕᐅᖅᑎᐅᔪᑦ ᐃᒪᓐᓇ ᐊᑐᖅᓯᒋᐊᖃᖅᐳᑦ
(ᐃ) ᒪᓕᒐᓕᐅᖅᑎᐅᓂᕐᒥᓄᑦ ᐃᖅᑲᓇᐃᔮᖃᓕᕐᓂᖓᓄᑦ ᐱᓕᕆᐊᒃᓴᕆᔭᒥᓂᒃ
ᐱᓕᕆᐊᖃᑦᑎᐊᕐᓗᓂ ᐊᖅᑭᐅᒪᑎᑦᑎᑦᑎᐊᕐᓗᓂᓗ
ᐊᕕᒃᓯᒪᑎᑦᑎᔪᓐᓇᕐᓗᓂ ᐃᒻᒥᒃᑯᑦ ᑲᒪᒋᒋᐊᖃᖅᐸᒃᑕᒥᓂᒃ ᑕᖅᑲᒃᑯᓄᖓ
ᐅᒃᐱᕆᔭᐅᑦᑎᐊᕈᓐᓇᐃᓐᓇᕐᓂᐊᕐᒪᑦ ᓱᓕᑦᑎᐊᕈᓐᓇᕐᓂᖓᓄᑦ, ᓱᓕᔪᒥᒃ
ᑐᙵᓂᖃᕐᓗᓂ, ᐃᒻᒥᒃᑯᓪᓗ ᐊᒃᑐᐊᓂᖃᖅᑎᑦᑎᙱᓪᓗᓂ
ᐋᖅᑭᐅᒪᑎᑦᑎᔪᓐᓇᕐᓗᓂ ᑲᒪᒋᔭᐅᒋᐊᖃᖅᐸᒃᑐᓂᒃ ᒪᓕᒐᓕᐅᖅᑎᐅᓂᕐᒧᑦ;
(ᐱ) ᐃᖕᒥᓐᓄᑦ ᐊᑭᓕᐅᑕᐅᓇᓱᒃᑐᓂᒃ, ᑐᓐᓂᖅᑯᓯᐊᓂᒡᓗ
ᐃᑲᔫᓯᐊᖑᓇᓱᒃᑐᓂᒡᓘᓐᓃᑦ ᐊᖏᕈᑎᖃᖅᐸᙱᓪᓗᓂ, ᑕᐃᒪᐃᑦᑐᓂᒃ
ᐊᖏᕈᑎᖃᕐᓂᕈᓂ ᓈᒻᒪᒋᔭᐅᔪᓐᓃᑐᐃᓐᓇᕆᐊᖃᕐᒪᑦ ᑕᖅᑳᖓᑦ
ᐅᒃᐱᕆᔭᐅᔪᓐᓃᕈᑎᒋᑐᐃᓐᓇᕆᐊᖃᕐᒪᒍ ᓱᓕᑦᑎᐊᕈᓐᓇᕐᓂᖓᓄᑦ, ᓱᓕᔪᒥᒃ
ᑐᙵᓂᖃᑦᑎᐊᕈᓐᓇᕐᓂᕐᒧᑦ ᐊᒻᒪᓗ ᐃᒻᒥᒃᑯᑦ ᐊᒃᑐᐊᓂᖃᖅᑎᑦᑎᙱᓪᓗᓂ
ᐋᖅᑭᐅᒪᑎᑦᑎᔪᓐᓇᕐᓂᕐᒧᑦ ᒪᓕᒐᓕᐅᖅᑎᓂᕐᒧᑦ, ᐊᒻᒪᓗ ᐊᓯᖏᓐᓂᒃ
ᖃᓄᐃᓕᐊᕈᑎᒋᕙᒃᑕᖏᓐᓂᒃ ᑕᖅᑲᒃᑯᓄᖓ
ᓇᐅᑦᑎᖅᓱᖅᑕᐅᓕᕈᑎᒋᓇᔭᖅᑕᖏᓐᓂᒃ ᖃᓄᖅ ᐱᓕᕆᐊᒃᓴᒥᓂᒃ
ᐱᓕᕆᑦᑎᐊᕋᓱᒋᔭᐅᔪᓐᓃᕈᓂ;
(ᑎ) ᐊᖅᑭᐅᒪᑎᑦᑎᓗᓂ ᐊᕕᒃᓯᒪᑎᑦᑎᔪᓐᓇᕐᓂᕐᒧᑦ ᐃᒻᒥᒃᑯᑦ
ᑲᒪᒋᒋᐊᖃᖅᐸᒃᑕᒥᓂᒃ ᒪᓕᒍᑎᖃᑦᑎᐊᖅᑐᓂᒃ ᐋᖅᑭᒃᓯᒪᔾᔪᑎᓂᒃ
ᒪᓕᒐᒃᓴᐅᑎᑕᐅᔪᓂᒃ ᑕᕝᕙᓂ ᐱᖁᔭᕐᒥᑦ ᐊᒻᒪᓗ
ᖃᓄᐃᓕᐅᕈᑎᖃᖅᑎᑦᑎᓇᓱᒃᐸᒡᓗᓂ ᐱᑕᖃᓕᖅᑎᑦᑎᑦᑕᐃᓕᒪᑎᑦᑎᓂᕐᒧᑦ
ᑕᒪᒃᑯᓂᖓ ᐱᓕᕆᐊᒥᒃ ᐊᑐᕐᓂᕐᓘᑕᐅᔪᑦ ᐃᒻᒥᒃᑯᑦ
ᐱᕙᓪᓕᐊᔾᔪᑎᒋᔭᐅᓇᓱᐊᖅᑕᐅᓪᓗᑎᒃ; ᐊᒻᒪᓗ
(ᑭ) ᐱᔾᔪᑎᖃᑦᑎᐊᖅᑐᓂᒃ ᐊᒃᓱᕉᑎᖃᑦᑎᐊᖅᐸᒡᓗᑎᒃ ᐊᑐᖅᓯᓗᑎᒃ ᑕᖅᑲᒃᑯᐊ
ᐱᔪᒪᔭᖓᓐᓂᒃ ᐋᖅᑭᒃᓯᓇᓱᒃᐸᒡᓗᑎᒃ ᓈᒻᒪᙱᓕᐅᕈᑕᐅᔪᓂᒃ ᑕᒪᒃᑯᓂᖓ
ᓴᖅᑭᑐᐃᓐᓇᕆᐊᖃᖅᑐᓂᒃ ᖃᓄᑐᐃᓐᓇᖅ ᐱᓕᕆᐊᒥᒃ
ᐊᑐᕐᓂᕐᓘᑕᐅᔪᕕᓂᕐᓂᒃ ᐃᒻᒥᒃᑯᑦ ᐱᕙᓪᓕᐊᔾᔪᑎᒋᔭᐅᓇᓱᐊᖅᑎᓪᓗᒋᑦ.
ᓱᓕᑦᑎᐊᕐᓂᕐᒧᑦ ᐱᖁᔭᕐᔪᐊᖅ ᐃᒪᐃᓕᖓᑎᑦᑎᒃᑲᓐᓂᖅᐳᖅ:

ᐱᓕᕆᐊᒥᒃ ᐊᑐᕐᓂᕐᓘᑎᖃᕐᓂᖅ ᐃᒻᒥᒃᑯᑦ ᐱᕙᓪᓕᐊᔾᔪᑎᒋᓇᓱᐊᕐᓗᒍ
8. ᒪᓕᒐᓕᐅᖅᑎ ᐃᓱᒪᓕᐅᕆᐊᖃᙱᓚᖅ ᐅᕝᕙᓘᓐᓃᑦ ᐃᓱᒪᓕᐅᖃᑕᐅᓇᓱᒋᐊᖃᙱᓚᖅ
ᐱᔾᔪᑎᖃᕐᓂᐊᖅᑎᓪᓗᒋᑦ ᐱᓕᕆᔾᔪᑎᒋᖃᑦᑕᕐᓂᐊᖅᑕᖏᓐᓂᒃ ᒪᓕᒐᓕᐅᖅᑎᐅᓂᕐᒥᓄᑦ
ᐱᓕᕆᐊᒃᓴᖅᑖᕆᓯᒪᔭᖏᓐᓂᒃ ᐅᕝᕙᓘᓐᓃᑦ ᐊᑐᕈᑎᒋᖃᑦᑕᕐᓂᐊᖅᑕᖏᓐᓂᒃ ᐊᖓᔪᖅᑳᖑᓂᕐᒧᑦ
ᓴᙱᓂᖅᑖᕆᑎᑕᐅᓯᒪᔪᓂᒃ ᐅᕝᕙᓘᓐᓃᑦ ᐱᓕᕆᐊᕆᖃᑦᑕᕐᓂᐊᖅᑕᖏᓐᓂᒃ ᐊᖓᔪᖅᑳᖑᓂᕐᒧᑦ
ᐱᓕᕆᐊᒃᓴᖅᑖᕆᑎᑕᐅᓯᒪᔪᓂᒃ ᒪᓕᒐᓕᐅᖅᑎᐅᓂᕐᒥᓄᑦ ᐱᓕᕆᔾᔪᑎᒋᒋᐊᖃᖅᑕᖏᓐᓂᒃ ᑖᓐᓇ
ᒪᓕᒐᓕᐅᖅᑎᐅᔪᖅ ᖃᐅᔨᒪᒍᓂ ᐅᕝᕙᓘᓐᓃᑦ ᖃᐅᔨᒪᑐᐃᓐᓇᕆᐊᖃᕈᓂ ᑕᒪᒃᑯᓂᖓ
ᐱᓕᕆᔾᔪᑎᖃᕈᓂ ᐱᓕᕆᐊᓴᒃᓂ ᑖᔅᓱᒪ ᒪᓕᒐᓕᐅᖅᑎᐅᑉ ᐃᒻᒥᒃᑯᑦ
ᐊᑲᐅᓈᕈᑎᖃᒃᑲᓐᓂᕋᓱᓕᕋᔭᕐᒪᑦ ᐅᕝᕙᓗᓐᓃᑦ ᐊᑐᕐᓂᕐᓘᑎᖃᕐᓗᓂ ᐊᓯᒥᓂᒃ ᐃᓄᖕᒥᒃ ᐃᒻᒥᒃᑯᑦ
ᐊᑲᐅᓈᕈᑎᖃᖅᑎᑦᑎᓇᓱᒃᑲᓐᓂᕐᓗᓂ.

ᓱᓕᑦᑎᐊᕐᓂᕐᒧᑦ ᐱᖁᔭᕐᔪᐊᖅ ᑲᑎᖅᓱᖅᓯᒪᔪᖅ ᖃᕆᓴᐅᔭᒃᑯᑦ ᑕᑯᔭᐅᔪᓐᓇᖅᑐᖅ ᐊᒧᔭᐅᔪᓐᓇᖅᑐᕐᓗ PDF-ᑎᑐᑦ ᐋᖅᑭᒃᑕᐅᓯᒪᓪᓗᑎᒃ.